ਆਕਲੈਂਡ ਜ਼ਿਲ੍ਹਾ ਅਦਾਲਤ ਨੇ ਇੱਕ ਵੱਡਾ ਫੈਸਲਾ ਸੁਣਾਉਂਦਿਆਂ ਇੱਕ ਪੰਜਾਬੀ ਨੌਜਵਾਨ ਨੂੰ ਸਜ਼ਾ ਸੁਣਾਈ ਹੈ। ਦਰਅਸਲ ਮੋਰਟਗੇਜ ਧੋਖਾਧੜੀ ਰਾਹੀਂ $2 ਮਿਲੀਅਨ ਤੋਂ ਵੱਧ ਰਕਮ ਹਾਸਲ ਕਰਨ ਵਾਲੇ ਗੁਰਰਾਜ ਸਿੰਘ ਨੂੰ 9 ਮਹੀਨੇ ਦੀ ਹੋਮ ਡਿਟੈਂਸ਼ਨ ਦੀ ਸਜ਼ਾ ਸੁਣਾਈ ਹੈ। ਗੁਰਰਾਜ ਨੇ ਪਿਛਲੇ ਸਾਲ ਸਤੰਬਰ ‘ਚ 12 ਦੋਸ਼ਾਂ ਨੂੰ ਕਬੂਲ ਕੀਤਾ ਸੀ, ਜੋ 4 ਜਾਇਦਾਦਾਂ ਨਾਲ ਸੰਬੰਧਿਤ ਸਨ। ਦੱਸ ਦੇਈਏ ਗੁਰਰਾਜ 2019 ‘ਚ ਦੇਸ਼ ਛੱਡ ਚਲਾ ਗਿਆ ਸੀ ਅਤੇ ਦਸੰਬਰ 2023 ‘ਚ ਵਾਪਸੀ ‘ਤੇ ਉਸ ਨੂੰ ਗ੍ਰਿਫ਼ਤਾਰ ਕਰਕੇ ਦੋਸ਼ ਲਗਾਏ ਗਏ ਸਨ।
Serious Fraud Office (SFO) ਵੱਲੋਂ ਸਾਂਝੀ ਕੀਤੀ ਜਾਣਕਾਰੀ ਦੇ ਅਨੁਸਾਰ ਨੌਜਵਾਨ ਨੇ ਵਪਾਰਕ ਆਮਦਨ ਅਤੇ ਨਕਦੀ ਤੋਹਫ਼ਿਆਂ ਸਬੰਧੀ ਝੂਠੇ ਦਸਤਾਵੇਜ਼ ਤਿਆਰ ਕੀਤੇ ਅਤੇ ਬੈਂਕਾਂ ਅਤੇ ਪ੍ਰਾਪਰਟੀ ਵਕੀਲਾਂ ਨੂੰ ਗਲਤ ਜਾਣਕਾਰੀ ਦਿੱਤੀ ਫਿਰ ਤਿੰਨ ਰਹਾਇਸ਼ੀ ਘਰਾਂ ਲਈ ਕੁੱਲ $2,862,650 ਦੇ ਬੈਂਕ ਲੋਨ ਹਾਸਿਲ ਕੀਤੇ ਸੀ। SFO ਨੇ ਕਿਹਾ ਕਿ ਉਸ ਨੇ ਆਪਣੇ ਲਈ ਜਾਂ ਹੋਰਨਾਂ ਲਈ ਜਾਇਦਾਦਾਂ ‘ਤੇ ਕਬਜ਼ਾ ਹਾਸਲ ਕਰਨ ਲਈ ਵੀ ਝੂਠੀਆਂ ਪੇਸ਼ਕਾਰੀਆਂ ਕੀਤੀਆਂ।