ਬੁੱਧਵਾਰ ਨੂੰ ਪ੍ਰਧਾਨ ਮੰਤਰੀ ਜੈਸਿੰਡਾ ਆਰਡਰਨ ਦੀ ਘੋਸ਼ਣਾ ਤੋਂ ਬਾਅਦ, ਕੁੱਝ ਕੋਵਿਡ -19 ਨਿਯਮਾਂ ਵਿੱਚ ਬਦਲਾਅ ਲਾਗੂ ਹੋ ਗਏ ਹਨ। ਨਿਊਜ਼ੀਲੈਂਡ ਅਜੇ ਵੀ ਟ੍ਰੈਫਿਕ ਲਾਈਟ ਸਿਸਟਮ ਵਿੱਚ ਰੈੱਡ ‘ਤੇ ਹੈ, ਪਰ ਸ਼ੁੱਕਰਵਾਰ ਰਾਤ 11.59 ਵਜੇ ਤੋਂ ਕੁੱਝ ਨਿਯਮ ਬਦਲ ਗਏ ਹਨ। ਇੰਨ੍ਹਾਂ ਤਬਦੀਲੀਆਂ ਕਾਰਨ ਆਮ ਲੋਕਾਂ ਨੂੰ ਰਾਹਤ ਵੀ ਮਿਲੀ ਹੈ। ਹੁਣ ਬਾਹਰੀ ਇਕੱਠਾਂ ਲਈ ਕੋਈ ਸੀਮਾ ਨਹੀਂ ਹੋਵੇਗੀ, ਜਦਕਿ ਇਨਡੋਰ ਸੈਟਿੰਗਾਂ ਵਿੱਚ ਸੀਮਾ ਦੁੱਗਣੀ ਹੋ ਕੇ 200 ਹੋ ਗਈ ਹੈ। ਇਸ ਸ਼ੁੱਕਰਵਾਰ ਅੱਧੀ ਰਾਤ ਤੋਂ ਬਾਹਰੀ ਇਕੱਠ ਦੀਆਂ ਸੀਮਾਵਾਂ ਹਟਾ ਦਿੱਤੀਆਂ ਗਈਆਂ ਹਨ। ਇਸ ਸਬੰਧੀ ਪ੍ਰਧਾਨ ਮੰਤਰੀ ਆਰਡਰਨ ਨੇ ਕਿਹਾ ਸੀ ਕਿ ਅਸੀਂ ਜਾਣਦੇ ਹਾਂ ਕਿ ਇਕੱਠਾਂ ਲਈ ਬਾਹਰ ਜਾਣਾ ਸੁਰੱਖਿਅਤ ਹੈ।
ਹਾਲਾਂਕਿ, 4 ਅਪ੍ਰੈਲ ਨੂੰ ਰਾਤ 11.59 ਵਜੇ ਤੱਕ, ਅਜੇ ਵੀ ਵੈਕਸੀਨ ਪਾਸ ਦੋਵਾਂ ਥਾਵਾਂ ‘ਤੇ ਵਰਤਿਆ ਜਾਵੇਗਾ। ਸੈਟਿੰਗਾਂ ਦੀ ਅਗਲੀ ਸਮੀਖਿਆ 4 ਅਪ੍ਰੈਲ ਨੂੰ ਕੀਤੀ ਜਾਵੇਗੀ। ਆਰਡਰਨ ਨੇ ਵੀਰਵਾਰ ਨੂੰ ਕਿਹਾ ਕਿ ਹਸਪਤਾਲ ਵਿੱਚ ਭਰਤੀ ਹੋਣ ਦੀ ਦਰ ਦੇ ਅਧਾਰ ‘ਤੇ ਕੁੱਝ ਖੇਤਰ ਦੂਜਿਆਂ ਤੋਂ ਪਹਿਲਾਂ ਔਰੇਂਜ ਵਿੱਚ ਜਾ ਸਕਦੇ ਹਨ। ਆਰਡਰਨ ਨੇ ਪਿੱਛਲੇ ਦੋ ਸਾਲਾਂ ਨੂੰ ਦੇਖਦੇ ਹੋਏ ਬੁੱਧਵਾਰ ਨੂੰ ਕਿਹਾ ਸੀ ਕਿ, “ਅਸੀਂ ਸਫਲ ਰਹੇ ਹਾਂ, ਹਰ ਕੋਈ ਸੁਰੱਖਿਅਤ ਰਿਹਾ ਹੈ, ਪਰ ਹਰ ਕੋਈ ਥੱਕ ਗਿਆ ਹੈ। ਹੁਣ ਹੋਰ ਸਾਧਨਾਂ ਅਤੇ ਦੁਨੀਆ ਦੇ ਸਭ ਤੋਂ ਉੱਚ ਟੀਕੇ ਵਾਲੇ ਦੇਸ਼ਾਂ ਵਿੱਚੋਂ ਇੱਕ ਹੋਣ ਦੇ ਨਾਲ ਇਸਦਾ ਮਤਲਬ ਹੈ ਕਿ ਅਸੀਂ ਅੱਗੇ ਵੱਧਦੇ ਰਹਿ ਸਕਦੇ ਹਾਂ।”