ਪੂਰੇ ਵਿਸ਼ਵ ‘ਚ ਤਬਾਹੀ ਮਚਾਉਣ ਵਾਲੇ ਕੋਰੋਨਾ ਵਾਇਰਸ ਦਾ ਕਹਿਰ ਨਿਊਜ਼ੀਲੈਂਡ ‘ਚ ਦੇਖਣ ਨੂੰ ਮਿਲਿਆ ਹੈ। ਨਿਊਜ਼ੀਲੈਂਡ ‘ਚ ਕੋਰੋਨਾ ਪਬੰਦੀਆਂ ਕਾਰਨ ਵਾਸੀ ਕਾਫੀ ਮੁਸ਼ਕਿਲਾਂ ਨਾਲ ਜੂਝ ਰਹੇ ਨੇ। ਉੱਥੇ ਹੀ ਕੋਰੋਨਾ ਕਾਰਨ ਨਿਊਜ਼ੀਲੈਂਡ ਵਿੱਚ ਕੀਵੀ ਤੋੜਨ ਲਈ ਕਾਮਿਆਂ ਦੀ ਘਾਟ ਮਾਲਕਾਂ ਲਈ ਪ੍ਰੇਸ਼ਾਨੀ ਦਾ ਸਬੱਬ ਬਣੀ ਹੋਈ ਹੈ। ਮਾਲਕਾਂ ਨੂੰ ਲੇਬਰ ਦੀ ਘਾਟ ਉੱਤੋਂ ਵਧੀ ਹੋਈ ਮਜ਼ਦੂਰੀ ਦਰ ਨਾਲ ਜੂਝਣਾ ਪੈ ਰਿਹਾ ਹੈ। ਕੀਵੀ ਫਰੂਟ ਇੰਡਸਟਰੀ ਵਿੱਚ ਕਾਮਿਆਂ ਦੀ ਕਮੀ ਦਾ ਅੰਦਾਜ਼ਾ ਇਸ ਗੱਲ ਤੋਂ ਲਗਾਇਆ ਜਾ ਸਕਦਾ ਹੈ ਕਿ ਕੰਪਨੀਆਂ ਵਰਕਰਾਂ ਨੂੰ $60 ਪ੍ਰਤੀ ਘੰਟੇ ਦੇ ਹਿਸਾਬ ਨਾਲ ਤਨਖਾਹ ਦੇ ਨਾਲ-ਨਾਲ ਰਿਹਾਇਸ਼, ਭੋਜਨ, ਮੁਫਤ ਟ੍ਰਾਂਸਪੋਰਟੇਸ਼ਨ ਅਤੇ ਕੈਸ਼ ਬੋਨਸ ਦੀ ਪੇਸ਼ਕਸ਼ ਵੀ ਕਰ ਰਹੀਆਂ ਹਨ।
ਦਰਅਸਲ ਬਾਰਡਰ ਪਾਬੰਦੀਆਂ ਦੇ ਕਾਰਨ ਇਸ ਵਾਰ ਨਿਊਜ਼ੀਲੈਂਡ ‘ਚ ਕਾਮਿਆਂ ਦੀ ਵੱਡੀ ਘਾਟ ਮਹਿਸੂਸ ਕੀਤੀ ਜਾ ਰਹੀ ਹੈ। ਸਰਕਾਰ ਨੂੰ ਮੁਲਕ ਤੋਂ ਬਾਹਰ ਫਸੇ ਵਰਕ ਵੀਜ਼ਾ ਹੋਲਡਰਾਂ ਬਾਰੇ ਸੁਹਿਰਦਤਾ ਨਾਲ ਸੋਚਣਾ ਚਾਹੀਦਾ ਹੈ ਤਾਂ ਕਿ ਕੰਮ ਕਾਜ ਵਿੱਚ ਵਿਘਨ ਨਾ ਪਵੇ। ਹਰ ਸੀਜ਼ਨ ਵਿੱਚ ਲੱਗਭਗ 24,000 ਕਰਮਚਾਰੀਆਂ ਦੀ ਜਰੂਰਤ ਹੁੰਦੀ ਹੈ, ਜਿਨ੍ਹਾਂ ਵਿੱਚੋ ਇਸ ਵੇਲੇ 6500 ਕਰਮਚਾਰੀਆਂ ਦੀ ਘਾਟ ਹੈ।