ਸਿਹਤ ਮੰਤਰਾਲੇ ਨੇ ਬੁੱਧਵਾਰ ਨੂੰ ਐਲਾਨ ਕੀਤਾ ਹੈ ਕਿ ਨਿਊਜ਼ੀਲੈਂਡ ਵਿੱਚ 8150 ਨਵੇਂ ਕੋਵਿਡ -19 ਕਮਿਊਨਿਟੀ ਕੇਸ ਦਰਜ ਕੀਤੇ ਗਏ ਹਨ, ਇਸ ਦੇ ਨਾਲ ਹੀ ਮੰਤਰਾਲੇ ਨੇ ਕੋਵਿਡ-19 ਕਾਰਨ 10 ਸਾਲ ਤੋਂ ਘੱਟ ਉਮਰ ਦੇ ਇੱਕ ਬੱਚੇ ਸਮੇਤ 11 ਮੌਤਾਂ ਦੀ ਪੁਸ਼ਟੀ ਵੀ ਕੀਤੀ ਹੈ। ਇਹ ਅੰਕੜੇ ਪਿਛਲੇ 24 ਘੰਟਿਆਂ ਦੌਰਾਨ ਦਰਜ ਕੀਤੇ ਗਏ ਹਨ। ਉੱਥੇ ਹੀ ਵਾਇਰਸ ਕਾਰਨ 368 ਲੋਕ ਹਸਪਤਾਲ ਵਿੱਚ ਹਨ। ਗਿਆਰਾਂ ਲੋਕ ਇੰਟੈਂਸਿਵ ਕੇਅਰ ਜਾਂ ਉੱਚ ਨਿਰਭਰਤਾ ਯੂਨਿਟ ਅਧੀਨ ਹਨ। ਉੱਥੇ ਹੀ ਤਾਜ਼ਾ ਮੌਤਾਂ ਮਗਰੋਂ ਕੋਵਿਡ -19 ਕਾਰਨ ਨਿਊਜ਼ੀਲੈਂਡ ‘ਚ ਹੋਈਆਂ ਕੁੱਲ ਮੌਤਾਂ ਦੀ ਸੰਖਿਆ 1086 ਹੋ ਗਈ ਹੈ।
ਮੰਤਰਾਲੇ ਨੇ ਇਹ ਵੀ ਘੋਸ਼ਣਾ ਕੀਤੀ ਕਿ ਨਿਊਜ਼ੀਲੈਂਡ ਵਿੱਚ ਪਹਿਲੀ ਵਾਰ ਓਮੀਕਰੋਨ ਸਬਵੇਰੀਐਂਟ BA.2.12.1 ਦਾ ਕੇਸ ਵੀ ਸਾਹਮਣੇ ਆਇਆ ਹੈ। ਇਸਨੂੰ ਹਾਕਸ ਬੇਅ ਵਿੱਚ ਇੱਕ ਕਮਿਊਨਿਟੀ ਕੇਸ ਵਿੱਚ ਪਾਇਆ ਗਿਆ ਹੈ ਅਤੇ ਇਸ ਦਾ ਸਰਹੱਦ ਨਾਲ ਕੋਈ ਸਪੱਸ਼ਟ ਲਿੰਕ ਨਹੀਂ ਹੈ। ਵਿਅਕਤੀ ਦਾ 10 ਮਈ ਨੂੰ ਟੈਸਟ ਪੌਜੇਟਿਵ ਆਇਆ ਸੀ। Omicron ਦਾ ਇਹ ਉਪ ਰੂਪ ਅਮਰੀਕਾ ਵਿੱਚ ਪ੍ਰਚਲਿਤ ਹੈ।