ਕੁੱਝ ਦਿਨ ਪਹਿਲਾ ਨਿਊਜੀਲੈਂਡ ਸਰਕਾਰ ਨੇ ਦੇਸ਼ ਨੂੰ ਸਮੋਕ ਫ੍ਰੀ ਕਰਨ ਦੇ ਵੱਲ ਇੱਕ ਵੱਡਾ ਕਦਮ ਚੁੱਕਿਆ ਸੀ। ਪਰ ਸਰਕਾਰ ਦੇ ਇਸ ਫੈਸਲੇ ਨੂੰ ਹੁਣ ਚਣੌਤੀ ਮਿਲਦੀ ਹੋਈ ਦਿਖਾਈ ਦੇ ਰਹੀ ਹੈ। ਦਰਅਸਲ ਸਥਾਨਕ ਡੇਅਰੀ ਨੁਮਾਇੰਦਿਆਂ ਦਾ ਕਹਿਣਾ ਹੈ ਕਿ ਸਮੋਕ ਫ੍ਰੀ 2025 ਬਿੱਲ ਪਹਿਲਾਂ ਹੀ ਚੁਣੌਤੀਪੂਰਨ ਸਾਲ ਤੋਂ ਬਾਅਦ ਉਦਯੋਗ ਨੂੰ ਖਤਮ ਕਰ ਸਕਦਾ ਹੈ। ਇਸ ਸਾਲ ਜੂਨ ਵਿੱਚ ਪੇਸ਼ ਕੀਤਾ ਗਿਆ ਬਿੱਲ, ਕਾਨੂੰਨ ਵਿੱਚ ਪਾਸ ਹੋ ਗਿਆ ਹੈ ਅਤੇ ਇਹ ਤੰਬਾਕੂ ਰਿਟੇਲਰਾਂ ਦੀ ਗਿਣਤੀ ਨੂੰ ਸੀਮਤ ਕਰੇਗਾ। ਦੱਸ ਦੇਈਏ ਨਿਊਜੀਲੈਂਡ ਸਰਕਾਰ ਸਿਗਰਟਨੋਸ਼ੀ ਤੋਂ ਮੁਕਤ ਪੀੜ੍ਹੀ ਚਾਹੁੰਦੀ ਹੈ ਅਤੇ ਇਸਦਾ ਉਦੇਸ਼ 1 ਜਨਵਰੀ 2009 ਨੂੰ ਜਾਂ ਇਸ ਤੋਂ ਬਾਅਦ ਪੈਦਾ ਹੋਏ ਨੌਜਵਾਨਾਂ ਨੂੰ ਕਦੇ ਵੀ ਤੰਬਾਕੂਨੋਸ਼ੀ ਕਰਨ ਤੋਂ ਰੋਕਣਾ ਹੈ। ਪਰ ਹੁਣ ਛੋਟੇ ਕਾਰੋਬਾਰ ਅਤੇ ਡੇਅਰੀ ਕਾਰੋਬਾਰੀ ਹੁਣ ਬਿੱਲ ਖਿਲਾਫ ਖੜ੍ਹਦੇ ਨਜਰ ਆ ਰਹੇ ਹਨ।
ਇਨ੍ਹਾਂ ਛੋਟੇ ਕਾਰੋਬਾਰਾਂ ਨੂੰ ਜਿਆਦਾਤਰ ਭਾਰਤੀ ਭਾਈਚਾਰੇ ਦੇ ਲੋਕ ਚਲਾਉਂਦੇ ਹਨ ਜਿਨ੍ਹਾਂ ਦਾ ਕਹਿਣਾ ਹੈ ਕਿ ਇਹ ਸਰਾਸਰ ਧੱਕਾ ਹੈ,ਕਿਉਂਕਿ ਉਨ੍ਹਾਂ ਦੇ ਕਾਰੋਬਾਰਾਂ ‘ਤੇ 50 ਤੋਂ 60% ਰੈਵੇਨਿਊ ਸਿਗਰੇਟ ਉਤਪਾਦ ਵੇਚ ਕੇ ਹੀ ਆਉਂਦਾ ਹੈ। ਪਰ ਸਰਕਾਰ ਸਿਗਰੇਟ ਵੇਚਣ ਵਾਲੇ ਛੋਟੇ ਕਾਰੋਬਾਰਾਂ ਦੀ ਗਿਣਤੀ 6000 ਤੋਂ ਘਟਾ ਕੇ 600 ਕਰਨਾ ਚਾਹੁੰਦੀ ਹੈ। ਕਾਰੋਬਾਰੀਆਂ ਦਾ ਮੰਨਣਾ ਹੈ ਕਿ ਸਰਕਾਰ ਨੂੰ ਲੋਅ ਸਮੋਕਿੰਗ ਵੈਪ ਉਤਪਾਦਾਂ ‘ਤੇ ਵੀ ਤੰਬਾਕੂ ਟੈਕਸ ਜੀਰੋ ਕਰ ਦੇਣਾ ਚਾਹੀਦਾ ਹੈ ਤਾਂ ਜੋ ਲੋਕਾਂ ਦਾ ਰੁਝਾਣ ਘੱਟ ਨਿਕੋਟੀਨ ਵਾਲੇ ਉਤਪਾਦ ਖ੍ਰੀਦਣ ਵੱਲ ਜਿਆਦਾ ਹੋਏ।