ਪੂਰੇ ਉੱਤਰੀ ਟਾਪੂ ਵਿੱਚ ਵੱਡੇ ਪੱਧਰ ‘ਤੇ ਨਸ਼ੀਲੇ ਪਦਾਰਥਾਂ ਦੀ ਵੰਡ ਦੀ ਜਾਂਚ ਕਰਨ ਵਾਲੀ ਚਾਰ ਮਹੀਨਿਆਂ ਦੀ ਲੰਬੀ ਪੁਲਿਸ ਕਾਰਵਾਈ ਦੇ ਨਤੀਜੇ ਵਜੋਂ ਕੱਲ੍ਹ ਅੱਠ ਗ੍ਰਿਫਤਾਰੀਆਂ ਹੋਈਆਂ ਹਨ। ਡਿਟੈਕਟਿਵ ਇੰਸਪੈਕਟਰ ਗ੍ਰਾਹਮ ਪਿਟਕਥਲੇ ਨੇ ਕਿਹਾ ਕਿ 20 ਤੋਂ 50 ਸਾਲ ਦੀ ਉਮਰ ਦੇ ਵਿਅਕਤੀਆਂ ਨੂੰ “ਸੰਗਠਿਤ ਅਪਰਾਧਿਕ ਗਤੀਵਿਧੀ” ਅਤੇ ਮੱਧ ਉੱਤਰੀ ਟਾਪੂ ਵਿੱਚ ਨਸ਼ਿਆਂ ਦੇ ਵੱਡੇ ਪੱਧਰ ‘ਤੇ ਫੈਲਾਉਣ ਦੇ ਸਬੰਧ ਵਿੱਚ ਗ੍ਰਿਫਤਾਰ ਕੀਤਾ ਗਿਆ ਸੀ ਅਤੇ ਉਨ੍ਹਾਂ ‘ਤੇ ਦੋਸ਼ ਲਗਾਏ ਗਏ ਸਨ। ਇਹ ਗ੍ਰਿਫਤਾਰੀਆਂ ਓਪਰੇਸ਼ਨ ਮਿਕਾਡੋ ਦਾ ਇੱਕ ਹਿੱਸਾ ਸਨ, ਜੋ ਕਿ ਮੈਥਾਮਫੇਟਾਮਾਈਨ, ਕੋਕੀਨ, ਐਕਸਟਸੀ, MDMA ਅਤੇ ਕੈਨਾਬਿਸ ਦੀ ਵੱਡੇ ਪੱਧਰ ‘ਤੇ ਵੰਡ ਦੀ ਜਾਂਚ ਸੀ।
ਉਨ੍ਹਾਂ ਨੇ ਕਿਹਾ ਕਿ, “ਸਰਚ ਵਾਰੰਟਾਂ ਦੌਰਾਨ ਹਥਿਆਰ, ਨਕਦੀ, ਨਸ਼ੀਲੇ ਪਦਾਰਥ, ਚੋਰੀ ਦੀ ਜਾਇਦਾਦ ਅਤੇ ਮੋਟਰ ਵਾਹਨ ਜ਼ਬਤ ਕੀਤੇ ਗਏ ਹਨ। ਸੰਗਠਿਤ ਅਪਰਾਧ ਸਮੂਹਾਂ ਨੂੰ ਨਿਸ਼ਾਨਾ ਬਣਾ ਕੇ, ਸਪਲਾਈ ਲੜੀ ਨੂੰ ਵਿਗਾੜਨਾ ਅਤੇ ਸਾਡੇ ਭਾਈਚਾਰੇ ਨੂੰ ਪ੍ਰਭਾਵਿਤ ਕਰਨ ਵਾਲੇ ਨਾਜਾਇਜ਼ ਨਸ਼ਿਆਂ ਨੂੰ ਰੋਕਣਾ ਸੰਭਵ ਹੈ। ਨਸ਼ੀਲੇ ਪਦਾਰਥਾਂ ਦੀ ਵਰਤੋਂ ਉਪਭੋਗਤਾਵਾਂ ਦੇ ਜੀਵਨ ਨੂੰ ਤਬਾਹ ਕਰਨ ਦੇ ਨਾਲ-ਨਾਲ ਉਨ੍ਹਾਂ ਦੇ ਆਲੇ-ਦੁਆਲੇ ਦੇ ਦੋਸਤਾਂ, ਪਰਿਵਾਰ ਅਤੇ ਭਾਈਚਾਰੇ ਨੂੰ ਨੁਕਸਾਨ ਪਹੁੰਚਾਉਂਦੀ ਹੈ।” ਉਨ੍ਹਾਂ ਕਿਹਾ ਕਿ ਨਸ਼ੇ ਦੀ ਲਤ ਤੋਂ ਪ੍ਰਭਾਵਿਤ ਵਿਅਕਤੀਆਂ ਨੂੰ ਮਦਦ ਲਈ ਪੁਲਿਸ ਜਾਂ ਹੋਰ ਸਮਾਜਿਕ ਏਜੰਸੀਆਂ ਕੋਲ ਜਾਣ ਤੋਂ ਡਰਨਾ ਨਹੀਂ ਚਾਹੀਦਾ। ਉਨ੍ਹਾਂ ਆਮ ਲੋਕਾਂ ਨੂੰ ਇਹ ਵੀ ਸਲਾਹ ਦਿੱਤੀ ਕਿ ਜੇਕਰ ਉਨ੍ਹਾਂ ਦੇ ਆਸ-ਪਾਸ ਕੋਈ ਸ਼ੱਕੀ ਨਸ਼ੀਲੇ ਪਦਾਰਥਾਂ ਦੀ ਗਤੀਵਿਧੀ ਹੁੰਦੀ ਹੈ, ਜਾਂ ਜੇਕਰ ਉਹ ਕਿਸੇ ਦੇ ਨਸ਼ਿਆਂ ਨਾਲ ਜੁੜੇ ਹੋਣ ਬਾਰੇ ਚਿੰਤਤ ਹਨ ਤਾਂ ਪੁਲਿਸ ਨਾਲ ਸੰਪਰਕ ਕਰਨ।