ਨੈਲਸਨ ਤੋਂ ਇੱਕ ਹੈਰਾਨੀਜਨਕ ਮਾਮਲਾ ਸਾਹਮਣੇ ਆਇਆ ਹੈ। ਦਰਅਸਲ ਇੱਥੇ ਇੱਕ ਔਰਤ ਨੂੰ ਇੱਕ ਵਿਅਕਤੀ ਨੇ 15 ਘੰਟੇ ਤੱਕ ਬੰਦੂਕ ਦੀ ਨੋਕ ‘ਤੇ ਬੰਧਕ ਬਣਾ ਕਿ ਰੱਖਿਆ ਸੀ। ਹੁਣ ਇਸ ਮਾਮਲੇ ਦੀ ਸੁਣਵਾਈ ਕਰਦਿਆਂ ਮੰਗਲਵਾਰ ਨੂੰ ਨੈਲਸਨ ਜ਼ਿਲ੍ਹਾ ਅਦਾਲਤ ਵਿੱਚ ਉਸਨੂੰ ਨੌਂ ਦੋਸ਼ਾਂ ਵਿੱਚ ਪੰਜ ਸਾਲ ਅਤੇ ਦੋ ਮਹੀਨੇ ਕੈਦ ਦੀ ਸਜ਼ਾ ਸੁਣਾਈ ਗਈ ਹੈ, ਜਿਸ ਵਿੱਚ ਅਗਵਾ, ਅਪਰਾਧ ਕਰਨ ਲਈ ਵਿਸਫੋਟਕ ਦੀ ਵਰਤੋਂ, ਗੈਰ-ਕਾਨੂੰਨੀ ਤੌਰ ‘ਤੇ ਹਥਿਆਰ ਰੱਖਣਾ, ਹਥਿਆਰ ਨਾਲ ਅਪਰਾਧ ਕਰਨਾ, ਜਾਨੋਂ ਮਾਰਨ ਦੀ ਧਮਕੀ ਦੇਣਾ ਅਤੇ ਗੰਭੀਰ ਸਰੀਰਕ ਨੁਕਸਾਨ ਪਹੁੰਚਾਉਣਾ, ਸੁਰੱਖਿਆ ਆਦੇਸ਼ ਦੀ ਉਲੰਘਣਾ ਕਰਨ ਦੇ ਦੋ ਦੋਸ਼, ਅਤੇ ਇੱਕ ਰਿਹਾਇਸ਼ ਅਤੇ ਉਸ ਵਿੱਚ ਰਹਿਣ ਵਾਲੇ ਲੋਕਾਂ ਪ੍ਰਤੀ ਧਮਕੀ ਭਰੀ ਕਾਰਵਾਈ ਕਰਨਾ ਸ਼ਾਮਿਲ ਹੈ।
56 ਸਾਲ ਦੇ ਫਿਲਿਪ ਕਲਿੰਟਨ ਮੈਂਟ ਨੇ ਪਿਛਲੇ ਸਾਲ 12 ਅਗਸਤ ਨੂੰ ਇੱਕ ਔਰਤ ਅਤੇ ਉਸਦੇ ਪਿਤਾ ਨੂੰ ਅਗਵਾ ਕਰ ਲਿਆ ਸੀ, ਜਿਸ ਕਾਰਨ ਨੇੜਲੇ ਹਸਪਤਾਲ ਅਤੇ ਚਾਰ ਸਕੂਲਾਂ ਨੂੰ ਤਾਲਾ ਲਗਾਉਣਾ ਪਿਆ ਸੀ ਅਤੇ ਕਈ ਸੜਕਾਂ ਬੰਦ ਕਰ ਦਿੱਤੀਆਂ ਗਈਆਂ ਸਨ। ਮਹਿਲਾ ਮੈਂਟ ਦੀ ਜਾਣਕਾਰ ਸੀ। ਇਸ ਮਗਰੋਂ ਅਗਵਾਕਾਰ ਨੇ ਔਰਤ ਨੂੰ ਪੁਲਿਸ ਨੂੰ ਫ਼ੋਨ ਕਰਨ ਅਤੇ ਉਨ੍ਹਾਂ ਨੂੰ ਦੱਸਣ ਦਾ ਹੁਕਮ ਦਿੱਤਾ ਗਿਆ ਸੀ ਕਿ ਉਸਨੂੰ ਬੰਦੂਕ ਵਾਲੇ ਇੱਕ ਆਦਮੀ ਦੁਆਰਾ ਬੰਧਕ ਬਣਾਇਆ ਜਾ ਰਿਹਾ ਹੈ, ਜੋ ਚਾਹੁੰਦਾ ਸੀ ਕਿ ਪੁਲਿਸ ਉਸਦੀਆਂ ਮੰਗਾਂ ਸੁਣੇ।
ਮੰਟ ਨੂੰ ਫੋਨ ਦੇ ਪਿੱਛੇ ਗਾਲ੍ਹਾਂ ਕੱਢਦੇ ਅਤੇ ਘਰ ਨੂੰ ਉਡਾਉਣ ਦੀ ਧਮਕੀ ਦਿੰਦੇ ਸੁਣਿਆ ਜਾ ਸਕਦਾ ਸੀ। ਫਿਰ ਉਸ ਨੇ ਫ਼ੋਨ ਸੰਭਾਲਿਆ ਅਤੇ ਧਮਕੀ ਦੁਹਰਾਈ ਕਿ ਜੇਕਰ ਪੁਲਿਸ ਘਰ ਵਿੱਚ ਦਾਖਲ ਹੋਈ ਤਾਂ “ਇਹ ਜਗ੍ਹਾ ਖਤਮ ਹੋ ਜਾਵੇਗੀ”। ਇਹ ਫ਼ੋਨ ਕਾਲ ਲਗਭਗ 98 ਮਿੰਟ ਚੱਲੀ ਸੀ ਅਤੇ ਇੱਕ ਵਾਰ ਜਦੋਂ ਇਹ ਕਾਲ ਖਤਮ ਹੋ ਗਈ, ਤਾਂ ਪੁਲਿਸ ਗੱਲਬਾਤ ਟੀਮ ਨੇ ਸਥਿਤੀ ਨੂੰ ਸੁਲਝਾਉਣ ਦੀ ਕੋਸ਼ਿਸ਼ ਵਿੱਚ ਮੰਟ ਨਾਲ ਸੰਪਰਕ ਸ਼ੁਰੂ ਕੀਤਾ। ਇੰਨਾਂ ਹੀ ਨਹੀਂ ਘਰ ਵਿੱਚ ਦਾਖਲ ਹੋਣ ਤੋਂ ਦੋ ਘੰਟੇ ਬਾਅਦ ਪੁਲਿਸ ਦੇ ਸਾਹਮਣੇ ਆਤਮ ਸਮਰਪਣ ਕਰਨ ਵਿੱਚ ਹੋਰ 13 ਘੰਟੇ ਲੱਗ ਗਏ ਸੀ ਫੀ ਉਸਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਸੀ।