ਨੈਸ਼ਨਲ ਐਮਰਜੈਂਸੀ ਮੈਨੇਜਮੈਂਟ ਏਜੰਸੀ ਦਾ ਕਹਿਣਾ ਹੈ ਕਿ ਉਹ ਲੋਕਾਂ ਨੂੰ ਨਵੀਨਤਮ ਐਮਰਜੈਂਸੀ ਅਲਰਟ ਮੈਸਜ ਕਿਵੇਂ ਪ੍ਰਾਪਤ ਹੋਏ, ਇਸ ਵਿੱਚ ਸਪੱਸ਼ਟ ਕਮੀਆਂ ਦੀਆਂ ਰਿਪੋਰਟਾਂ ਦੀ ਜਾਂਚ ਕਰੇਗੀ। ਇੱਕ ਵਿਅਕਤੀ ਨੇ ਆਪਣੇ ਫ਼ੋਨ ‘ਤੇ ਲਗਭਗ 50 ਅਲਾਰਮ ਮੈਸਜ ਆਉਣ ਦੀ ਰਿਪੋਰਟ ਕੀਤੀ ਹੈ ਜਦਕਿ ਦੂਜਿਆਂ ਨੇ ਕਿਹਾ ਕਿ ਉਨ੍ਹਾਂ ਨੂੰ ਰੂਸ ‘ਚ ਆਏ 8.8 ਤੀਬਰਤਾ ਵਾਲੇ ਭੂਚਾਲ ਤੋਂ ਬਾਅਦ ਸੁਨਾਮੀ ਦੇ ਖ਼ਤਰੇ ਬਾਰੇ ਕੋਈ ਚਿਤਾਵਨੀ ਨਹੀਂ ਮਿਲੀ। NEMA ਦੇ ਬੁਲਾਰੇ ਜੌਨ ਪ੍ਰਾਈਸ ਨੇ ਕਿਹਾ ਕਿ ਏਜੰਸੀ ਨੇ ਦੋ ਅਲਰਟ ਭੇਜੇ ਹਨ, ਪਹਿਲਾ ਬੁੱਧਵਾਰ ਦੁਪਹਿਰ ਨੂੰ ਲਗਭਗ 4.15 ਵਜੇ ਜਾਰੀ ਕੀਤਾ ਗਿਆ ਸੀ ਅਤੇ ਦੂਜਾ ਵੀਰਵਾਰ ਸਵੇਰੇ 6.30 ਵਜੇ ਜਾਰੀ ਕੀਤਾ ਗਿਆ ਸੀ।
ਇਸ ਦੌਰਾਨ ਇੱਕ ਹੋਰ ਵਿਅਕਤੀ ਨੇ ਕਿਹਾ ਕਿ ਉਸ ਨੂੰ ਬੁਧਵਾਰ ਨੂੰ ਕੰਮ ਵਾਲੇ ਫੋਨ ਉੱਤੇ ਕਈ ਅਲਰਟ ਆਏ, ਪਰ ਪ੍ਰਸਨਲ ਫੋਨ ‘ਤੇ ਸਿਰਫ ਇੱਕ ਅਤੇ ਉਨ੍ਹਾਂ ਅੱਗੇ ਕਿਹਾ ਕਿ ਉਨ੍ਹਾਂ ਦੀ ਪਤਨੀ ਨੂੰ ਵੀ ਕੋਈ ਅਲਰਟ ਮੈਸਜ ਨਹੀਂ ਮਿਲਆ। ਪ੍ਰਾਈਸ ਨੇ ਕਿਹਾ ਕਿ ਉਹ ਇਸ ਗੱਲ ਦੀ ਜਾਂਚ ਕਰਨਗੇ ਕਿ ਕੁਝ ਲੋਕਾਂ ਨੂੰ 30 ਤੋਂ 50 ਅਲਰਟ ਕਿਉਂ ਮਿਲੇ ਤਾਂ ਜੋ ਇਹ ਸਮਝਿਆ ਜਾ ਸਕੇ ਕਿ ਅਜਿਹਾ ਕਿਉਂ ਹੋਇਆ। ਉਨ੍ਹਾਂ ਕਿਹਾ ਕਿ, “ਇਹ ਵੱਖ-ਵੱਖ ਪ੍ਰਦਾਤਾ ਅਤੇ ਵੱਖ-ਵੱਖ ਸੈੱਲ ਟਾਵਰ ਹੋ ਸਕਦੇ ਹਨ, ਬਹੁਤ ਸਾਰੀਆਂ ਸੰਭਾਵਨਾਵਾਂ ਹਨ।” ਜ਼ਿਕਰਯੋਗ ਹੈ ਕਿ ਨਿਊਜ਼ੀਲੈਂਡ ਦੇ ਲੋਕਾਂ ਨੇ ਨੈਸ਼ਨਲ ਇਮਰਜੈਂਸੀ ਮੈਨੇਜਮੈਂਟ ਏਜੰਸੀ ਵੱਲੋਂ ਭੇਜੇ ਗਏ ਐਮਰਜੈਂਸੀ ਮੋਬਾਈਲ ਅਲਰਟਸ ਸਬੰਧੀ ਨਰਾਜ਼ਗੀ ਜਤਾਈ ਹੈ।