ਨਿਊਜ਼ੀਲੈਂਡ ‘ਚ ਇੱਕ ਵਾਰ ਫਿਰ ਭੂਚਾਲ ਕਾਰਨ ਧਰਤੀ ਕੰਬੀ ਹੈ। ਬੁੱਧਵਾਰ ਨੂੰ ਉੱਤਰੀ ਟਾਪੂ ਦੇ ਪੂਰਬੀ ਤੱਟ ‘ਤੇ 4.8 ਤੀਬਰਤਾ ਦੇ ਭੂਚਾਲ ਨੇ ਦਸਤਕ ਦਿੱਤੀ ਹੈ। 5600 ਤੋਂ ਵੱਧ ਲੋਕਾਂ ਨੇ ਭੂਚਾਲ ਮਹਿਸੂਸ ਕਰਨ ਦੀ ਰਿਪੋਰਟ ਸਾਂਝੀ ਕੀਤੀ ਹੈ। ਫੇਸਬੁੱਕ ‘ਤੇ ਲੋਕਾਂ ਨੇ ਇਸਨੂੰ “ਵੱਡਾ ਝਟਕਾ” ਦੱਸਿਆ ਹੈ, ਇੱਕ ਵਿਅਕਤੀ ਨੇ ਕਿਹਾ ਕਿ ਉਨ੍ਹਾਂ ਦਾ ਘਰ ਹਿੱਲ ਗਿਆ ਸੀ। ਜੀਓਨੈੱਟ ਨੇ ਕਿਹਾ ਕਿ ਭੂਚਾਲ ਹੇਸਟਿੰਗਜ਼ ਤੋਂ 20 ਕਿਲੋਮੀਟਰ ਦੱਖਣ ਵਿੱਚ ਸਥਿਤ ਸੀ, ਅਤੇ 30 ਕਿਲੋਮੀਟਰ ਡੂੰਘਾ ਸੀ। ਇਹ ਬੁੱਧਵਾਰ ਸ਼ਾਮ 5:53 ਵਜੇ ਆਇਆ। ਜੀਓਨੈੱਟ ਨੇ ਕਿਹਾ ਕਿ ਇਹ ਹਾਕਸ ਬੇ, ਮਨਵਾਤੂ ਅਤੇ ਗ੍ਰੇਟਰ ਵੈਲਿੰਗਟਨ ਖੇਤਰ ਦੇ ਕੁਝ ਹਿੱਸਿਆਂ ਵਿੱਚ ਮਹਿਸੂਸ ਕੀਤਾ ਗਿਆ। ਇਸ ਤੋਂ ਬਾਅਦ ਸ਼ਾਮ 6.25 ਵਜੇ ਹੇਸਟਿੰਗਜ਼ ਤੋਂ 30 ਕਿਲੋਮੀਟਰ ਦੱਖਣ ਵਿੱਚ 3.6 ਤੀਬਰਤਾ ਦਾ ਭੂਚਾਲ ਆਇਆ।
