ਨਿਊਜ਼ੀਲੈਂਡ ਦੇ ਪ੍ਰਧਾਨ ਮੰਤਰੀ ਕ੍ਰਿਸਟੋਫਰ ਲਕਸਨ ਨੇ ਐਲਾਨ ਕੀਤਾ ਹੈ ਕਿ ਵਿਦੇਸ਼ੀ-ਅਧਾਰਿਤ ਨਿਵੇਸ਼ਕ ਜਿਨ੍ਹਾਂ ਕੋਲ ਨਿਵੇਸ਼ਕ ਨਿਵਾਸ ਵੀਜ਼ਾ ਹੈ, ਹੁਣ ਉਨ੍ਹਾਂ ਨੂੰ ਨਿਊਜ਼ੀਲੈਂਡ ਵਿੱਚ ਘਰ ਖਰੀਦਣ ਦੀ ਇਜਾਜ਼ਤ ਦਿੱਤੀ ਜਾਵੇਗੀ। ਹਾਲਾਂਕਿ ਇਸ ਲਈ ਵੀ ਕਕ ਸ਼ਰਤ ਹੈ ਕਿ ਉਨ੍ਹਾਂ ਵੱਲੋਂ ਨਿਊਜ਼ੀਲੈਂਡ ਵਿੱਚ ਘੱਟੋ-ਘੱਟ $5 ਮਿਲੀਅਨ ਦਾ ਨਿਵੇਸ਼ ਕੀਤਾ ਜਾਵੇ। ਚੰਗੇ ਚਰਿੱਤਰ ਦੀ ਪ੍ਰੀਖਿਆ ਪਾਸ ਕੀਤੀ ਜਾਵੇ ਅਤੇ ਉਨ੍ਹਾਂ ਦੀ ਸਿਹਤ ਸਥਿੱਤੀ ਸਵੀਕਾਰਯੋਗ ਹੋਵੇ।
ਲਕਸਨ ਨੇ ਕਿਹਾ ਕਿ ਵੀਜ਼ਾ ਧਾਰਕਾਂ ਦੁਆਰਾ ਖਰੀਦੇ ਜਾ ਸਕਣ ਵਾਲੇ ਘਰ ਦੀ ਘੱਟੋ-ਘੱਟ ਕੀਮਤ $5 ਮਿਲੀਅਨ ਹੋਣੀ ਚਾਹੀਦੀ ਹੈ ਜੋ ਕਿ ਨਿਊਜ਼ੀਲੈਂਡ ਦੀ ਰਿਹਾਇਸ਼ ਸਪਲਾਈ ਦੇ 1% ਤੋਂ ਘੱਟ ‘ਤੇ ਕੀਮਤ ਟੈਗ ਹੈ। ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਵਿਦੇਸ਼ੀ ਖਰੀਦਦਾਰਾਂ ‘ਤੇ ਪਾਬੰਦੀ ਬਣੀ ਰਹੇਗੀ। ਪ੍ਰਧਾਨ ਮੰਤਰੀ ਨੇ ਕਿਹਾ, “ਇਹ ਤਬਦੀਲੀ ਉਨ੍ਹਾਂ ਦੀ ਚਿੰਤਾ ਤੇ ਧਿਆਨ ਦਿੰਦੀ ਹੈ ਜੋ ਵਿਦੇਸ਼ੀ ਮਲਕੀਅਤ ਦਾ ਵਿਰੋਧ ਕਰਦੇ ਹਨ, ਤੇ ਨਾਲ ਹੀ ਅਮੀਰ ਨਿਵੇਸ਼ਕਾਂ ਨੂੰ ਦੇਸ਼ ਨਾਲ ਜੋੜ ਕੇ ਅਰਥਵਿਵਸਥਾ ਵਧਾਉਣ ਦਾ ਮੌਕਾ ਦਿੰਦੀ ਹੈ।”
ਇਹ ਫ਼ੈਸਲਾ ਨੈਸ਼ਨਲ ਅਤੇ ਐਨ ਜੈਡ ਫ਼ਰਸਟ ਪਾਰਟੀਆਂ ਵਿਚਕਾਰ ਮਹੀਨਿਆਂ ਤੋਂ ਚੱਲ ਰਹੀਆਂ ਵਿਚਾਰਾਂ ਤੋਂ ਬਾਅਦ ਆਇਆ ਹੈ। 2018 ਵਿੱਚ ਲੇਬਰ ਸਰਕਾਰ ਨਾਲ ਮਿਲਕੇ ਨਿਊਜ਼ੀਲੈਂਡ ਫ਼ਰਸਟ ਨੇ ਇਹ ਪਾਬੰਦੀ ਲਗਾਈ ਸੀ। ਦਰਅਸਲ 2018 ਤੋਂ ਵਿਦੇਸ਼ੀਆਂ ਲਈ ਨਿਊਜੀਲੈਂਡ ‘ਚ ਘਰ ਖਰੀਦ ‘ਤੇ ਪਾਬੰਦੀ ਸੀ, ਸਿਰਫ਼ ਆਸਟ੍ਰੇਲੀਆਈਆਂ ਅਤੇ ਸਿੰਗਾਪੁਰ ਦੇ ਨਾਗਰਿਕਾਂ ਨੂੰ ਵਪਾਰਿਕ ਸਮਝੌਤਿਆਂ ਤਹਿਤ ਛੂਟ ਸੀ।