ਵੂਲਵਰਥਸ ਨਿਊਜ਼ੀਲੈਂਡ ਦੇ ਕਰਮਚਾਰੀਆਂ ਅਤੇ ਪ੍ਰਬੰਧਕਾਂ ਨੂੰ “ਚੂਹਿਆਂ” ਨੇ ਸਤਾਇਆ ਹੋਇਆ ਹੈ। ਚੂਹਿਆਂ ਦੇ ਕਾਰਨ ਪਿਛਲੇ ਸਾਲ ਡੁਨੇਡਿਨ ਸਾਊਥ ਸੁਪਰਮਾਰਕੀਟ ਲਗਭਗ ਤਿੰਨ ਹਫ਼ਤਿਆਂ ਲਈ ਬੰਦ ਵੀ ਕੀਤੀ ਗਈ ਸੀ। ਪਰ ਹੁਣ ਨਿਊਜ਼ੀਲੈਂਡ ਫੂਡ ਸੇਫ਼ਟੀ (NZFS) ਨੇ ਡੁਨੇਡਿਨ ਦੇ Countdown South ਸੁਪਰਮਾਰਕੀਟ ਵਿੱਚ ਚੂਹਿਆਂ ਦੀ ਭਰਮਾਰ ਦੇ ਮਾਮਲੇ ਵਿੱਚ Woolworths New Zealand Limited ‘ਤੇ ਫੂਡ ਐਕਟ 2014 ਅਧੀਨ ਮਾਮਲਾ ਦਰਜ ਕੀਤਾ ਹੈ।ਨਿਊਜ਼ੀਲੈਂਡ ਫੂਡ ਸੇਫਟੀ (NZFS) ਦੇ ਡਿਪਟੀ ਡਾਇਰੈਕਟਰ-ਜਨਰਲ ਵਿਨਸੈਂਟ ਆਰਬਕਲ ਨੇ ਕਿਹਾ ਕਿ “ਪਿਛਲੇ ਸਾਲ ਕਾਊਂਟਡਾਊਨ ਡੁਨੇਡਿਨ ਸਾਊਥ ਵਿਖੇ ਚੂਹਿਆਂ ਦੀ ਗਤੀਵਿਧੀ ਦੀ ਪੂਰੀ ਜਾਂਚ ਤੋਂ ਬਾਅਦ, ਨਿਊਜ਼ੀਲੈਂਡ ਫੂਡ ਸੇਫਟੀ ਨੇ ਵੂਲਵਰਥਸ ਨਿਊਜ਼ੀਲੈਂਡ ਲਿਮਟਿਡ ਦੇ ਖਿਲਾਫ ਫੂਡ ਐਕਟ 2014 ਦੇ ਤਹਿਤ ਦੋਸ਼ ਲਗਾਇਆ ਹੈ”।
ਉਨ੍ਹਾਂ ਕਿਹਾ ਕਿ ਪਿਛਲੇ ਸਾਲ ਸਟੋਰ ‘ਚ ਚੂਹਿਆਂ ਦੀ ਗਤੀਵਿਧੀ ਦੀ ਵਿਆਪਕ ਜਾਂਚ ਤੋਂ ਬਾਅਦ Woolworths ‘ਤੇ ਇਹ ਦੋਸ਼ ਲਗਾਇਆ ਗਿਆ ਹੈ ਕਿ ਉਹ ਆਪਣੇ ਫੂਡ ਕੰਟਰੋਲ ਪਲਾਨ ਅਨੁਸਾਰ ਚੂਹਿਆਂ ਦੀ ਭਰਮਾਰ ਨੂੰ ਸਮੇਂ ਸਿਰ ਪਛਾਣਣ ਅਤੇ ਹੱਲ ਕਰਨ ਵਿੱਚ ਅਸਫ਼ਲ ਰਹੇ ਸੀ। ਇਸ ਦੋਸ਼ ਤਹਿਤ ਕੰਪਨੀ ਨੂੰ ਵੱਧ ਤੋਂ ਵੱਧ $200,000 ਜੁਰਮਾਨਾ ਹੋ ਸਕਦਾ ਹੈ।
Woolworths NZ ਦੇ ਡਾਇਰੈਕਟਰ ਆਫ ਸਟੋਰਜ਼, ਜੇਸਨ ਸਟਾਕਿਲ ਨੇ ਕਿਹਾ, “ਅਸੀਂ ਦੋਸ਼ਾਂ ਨੂੰ ਮੰਨਦੇ ਹਾਂ ਅਤੇ ਭੋਜਨ ਸੁਰੱਖਿਆ ਨੂੰ ਆਪਣੀ ਟੀਮ ਅਤੇ ਗਾਹਕਾਂ ਦੀ ਸਿਹਤ ਨਾਲ ਜੋੜਕੇ ਗੰਭੀਰਤਾ ਨਾਲ ਲੈਂਦੇ ਹਾਂ। ਅਸੀਂ NZFS ਨਾਲ ਮਿਲਕੇ ਇਸ ਮਾਮਲੇ ਨੂੰ ਸੁਧਾਰਨ ਲਈ ਕਦਮ ਚੁੱਕੇ ਹਨ।” ਸਟੋਰ ਨੂੰ ਪਹਿਲਾਂ ਇਕ ਵੀਕਐਂਡ ਲਈ ਬੰਦ ਕਰਨ ਦੀ ਯੋਜਨਾ ਸੀ ਪਰ NZFS ਦੀ ਮਨਜ਼ੂਰੀ ਅਨੁਸਾਰ, ਆਖਰੀ ਚੂਹੇ ਦੇ ਦੇਖੇ ਜਾਂ ਫੜੇ ਜਾਣ ਤੋਂ ਬਾਅਦ ਘੱਟੋ-ਘੱਟ 48 ਘੰਟੇ ਲਈ ਬੰਦ ਰੱਖਣਾ ਲਾਜ਼ਮੀ ਹੋਵੇਗਾ। ਦੱਸ ਦੇਈਏ ਲਗਭਗ ਤਿੰਨ ਹਫ਼ਤਿਆਂ ਲਈ ਬੰਦ ਹੋਣ ਤੋਂ ਬਾਅਦ, ਸਟੋਰ ਨੇ ਅੰਤ ਵਿੱਚ 28 ਫਰਵਰੀ ਨੂੰ ਆਪਣੇ ਦਰਵਾਜ਼ੇ ਦੁਬਾਰਾ ਖੋਲ੍ਹੇ ਸਨ, ਵੂਲਵਰਥਸ ਨੇ ਗਾਹਕਾਂ ਨੂੰ ਭਰੋਸਾ ਦਿਵਾਇਆ ਕਿ ਇੱਕ ਨਵੀਂ ਵਧੀਆ-ਅਭਿਆਸ ਕੀਟ ਪ੍ਰਬੰਧਨ ਰਣਨੀਤੀ ਲਾਗੂ ਕੀਤੀ ਗਈ ਹੈ।