ਦ ਨਿਊਜ਼ੀਲੈਂਡ ਹੇਰਾਲਡ ਦੀ ਇੱਕ ਰਿਪੋਰਟ ਮੁਤਾਬਿਕ ਜ਼ਮਾਨਤ ‘ਤੇ ਰਹਿੰਦੇ ਸਮੇਂ ਜਿਨਸੀ ਅਪਰਾਧ ਕਰਨ ਵਾਲੇ ਵੈਲਿੰਗਟਨ ਦੇ ਇੱਕ ਸ਼ੈੱਫ ਨੂੰ 27 ਮਹੀਨਿਆਂ ਦੀ ਕੈਦ ਦੀ ਸਜ਼ਾ ਸੁਣਾਈ ਗਈ ਹੈ, ਜਦ ਕਿ ਜੱਜ ਨੇ ਉਨ੍ਹਾਂ ਦਾਅਵਿਆਂ ਨੂੰ ਰੱਦ ਕਰ ਦਿੱਤਾ ਕਿ ਮਾਨਸਿਕ ਬਿਮਾਰੀ ਨੇ ਉਸਦੇ ਵਿਵਹਾਰ ਵਿੱਚ ਕੋਈ ਯੋਗਦਾਨ ਪਾਇਆ ਸੀ। 27 ਸਾਲਾ ਆਕਾਸ਼ ਨੂੰ ਗੈਰ-ਕਾਨੂੰਨੀ ਜਿਨਸੀ ਸੰਬੰਧਾਂ, ਅਸ਼ਲੀਲ ਹਮਲੇ ਅਤੇ ਅਸ਼ਲੀਲ ਹਰਕਤ ਕਰਨ ਦੇ ਤਿੰਨ ਦੋਸ਼ਾਂ ਦਾ ਦੋਸ਼ੀ ਠਹਿਰਾਇਆ ਗਿਆ ਸੀ। ਇਹ ਦੋਸ਼ ਇੱਕ ਮਹਿਲਾ ‘ਤੇ ਕੀਤੇ ਗੰਭੀਰ ਜਿਨਸੀ ਹਮਲੇ ਅਤੇ ਬਾਅਦ ਵਿੱਚ ਜਨਤਕ ਤੌਰ ‘ਤੇ ਕੀਤੀਆਂ ਗਈਆਂ ਅਸ਼ਲੀਲ ਹਰਕਤਾਂ ਕਾਰਨ ਲੱਗੇ ਸਨ ਜਦੋਂ ਉਹ ਜ਼ਮਾਨਤ ‘ਤੇ ਸੀ। ਦੱਸ ਦੇਈਏ ਕਿ 27 ਸਾਲਾ ਆਕਾਸ਼ ਨੇ ਜਨਤਕ ਬੱਸ ਅਤੇ ਬੱਸ ਸਟਾਪ ‘ਤੇ ਸ਼ਰੇਆਮ ਅਸ਼ਲੀਲ ਹਰਕਤਾਂ ਕੀਤੀਆਂ ਸਨ।
ਰਿਪੋਰਟ ਮੁਤਾਬਿਕ ਮਾਰਚ 2025 ਵਿੱਚ ਆਕਾਸ਼ ਨੂੰ ਜਨਤਕ ਤੌਰ ‘ਤੇ ਹੱਥਰਸੀ ਕਰਨ ਦੇ ਦੋਸ਼ ‘ਚ ਫਿਰ ਗ੍ਰਿਫ਼ਤਾਰ ਕੀਤਾ ਗਿਆ ਸੀ। ਆਕਾਸ਼ ਦੇ ਵਕੀਲ ਜ਼ੈਕਰੀ ਮੀਹਨ ਨੇ ਦਲੀਲ ਦਿੱਤੀ ਕਿ ਉਸਨੂੰ ਇਸ ਘਟਨਾ ਦਾ ਪਛਤਾਵਾ ਹੈ ਅਤੇ ਉਸਦਾ ਪਹਿਲਾਂ ਵੀ ਕੋਈ ਅਪਰਾਧਿਕ ਰਿਕਾਰਡ ਨਹੀਂ ਹੈ ਅਤੇ ਸ਼ਰਾਬ ਦੀ ਆਦਤ ਛੱਡਣ ਲਈ ਕੋਸ਼ਿਸ਼ ਕਰ ਰਿਹਾ ਸੀ, ਪਰ ਜ਼ਮਾਨਤ ‘ਤੇ ਹੋਣ ਕਾਰਨ ਥੇਰੇਪੀ ਉਪਲਬਧ ਨਹੀਂ ਸੀ।