ਸੁਪਰੀਮ ਸਿੱਖ ਸੋਸਾਇਟੀ ਨਿਊਜ਼ੀਲੈਂਡ ਦੇ ਵੱਲੋਂ ਸਮੇਂ ਸਮੇਂ ‘ਤੇ ਭਾਈਚਾਰੇ ਦੇ ਨਾਲ ਸਬੰਧਿਤ ਮਾਮਲਿਆਂ ਨੂੰ NZ ਸਰਕਾਰ ਦੇ ਕੋਲ ਚੁੱਕਿਆ ਗਿਆ ਹੈ। ਹੁਣ ਇੱਕ ਵਾਰ ਫਿਰ ਸੁਪਰੀਮ ਸਿੱਖ ਸੋਸਾਇਟੀ ਦੇ ਵੱਲੋਂ ਨਿਊਜ਼ੀਲੈਂਡ ਸਰਕਾਰ ਨਾਲ ਇਮੀਗ੍ਰੇਸ਼ਨ ਮਾਮਲਿਆਂ ‘ਤੇ ਮਹੱਤਵਪੂਰਨ ਮੀਟਿੰਗ ਕੀਤੀ ਗਈ ਹੈ। ਇਸ ਮੀਟਿੰਗ ‘ਚ ਦੇਸ਼ ਦੇ ਪ੍ਰਧਾਨ ਮੰਤਰੀ ਕ੍ਰਿਸਟੋਫਰ ਲਕਸਨ, ਉਪ ਪ੍ਰਧਾਨ ਮੰਤਰੀ ਡੇਵਿਡ ਸੀਮੋਰ, ਵਿਦੇਸ਼ ਮਾਮਲਿਆਂ ਦੇ ਮੰਤਰੀ ਵਿਨਸਟਨ ਪੀਟਰਸ, ਇਮੀਗ੍ਰੇਸ਼ਨ ਮੰਤਰੀ ਐਰਿਕਾ ਸਟੈਂਫੋਰਡ, ਅਤੇ ਹੋਰ ਕਈ ਸੰਸਦ ਮੈਂਬਰ ਸ਼ਾਮਿਲ ਸਨ। ਸੁਪਰੀਮ ਸਿੱਖ ਸੋਸਾਇਟੀ ਨਿਊਜ਼ੀਲੈਂਡ ਦੇ ਵੱਲੋਂ ਰਣਬੀਰ ਸਿੰਘ ਲਾਲੀ ਅਤੇ ਦਲਜੀਤ ਸਿੰਘ ਨੇ ਇਸ ਮੀਟਿੰਗ ਦੌਰਾਨ ਪਰਵਾਸੀ ਭਾਈਚਾਰੇ ਨਾਲ ਜੁੜੇ ਅਨੇਕਾਂ ਮਸਲਿਆਂ ‘ਤੇ ਗੰਭੀਰ ਚਰਚਾ ਕੀਤੀ। ਪ੍ਰਤਿਨਿਧੀਆਂ ਨੇ ਸਰਕਾਰ ਅੱਗੇ ਸੁਝਾਅ ਰੱਖੇ ਤਾਂ ਜੋ ਇਮੀਗ੍ਰੇਸ਼ਨ ਪ੍ਰਕਿਰਿਆ ਹੋਰ ਨਿਰਪੱਖ ਅਤੇ ਸੱਭਿਆਚਾਰਕ ਤੌਰ ‘ਤੇ ਸੰਵੇਦਨਸ਼ੀਲ ਬਣਾਈ ਜਾ ਸਕੇ। ਦੱਸ ਦੇਈਏ ਇਸ ਮੀਟਿੰਗ ਵਿੱਚ ਹੋਰ ਪ੍ਰਮੁੱਖ ਨੇਤਾ ਐਮ.ਪੀ. ਰੀਮਾ ਨਖਲੇ , ਗ੍ਰੇਗ ਫਲੈਮਿੰਗ, ਪਰਮਜੀਤ ਪਰਮਾਰ, ਅਰੀਨਾ ਵਿਲੀਅਮ, ਕੈਥਰੀਨ ਵੈੱਡ , ਅਤੇ ਗ੍ਰੀਨ ਪਾਰਟੀ ਦੇ ਕਲੋਇ ਸਵਾਰਬਰਿਕ ਤੇ ਮਰਾਮਾ ਡੇਵਿਡਸਨ ਵੀ ਮੌਜੂਦ ਸਨ।
ਇਸ ਮੀਟਿੰਗ ਦੇ ਦੌਰਾਨ ਸੱਭਿਆਚਾਰਕ ਤੌਰ ‘ਤੇ ਤੈਅ ਕੀਤੇ ਵਿਆਹਾਂ (Culturally Arranged Marriages) – ਇਮੀਗ੍ਰੇਸ਼ਨ ਨੀਤੀਆਂ ਵਿੱਚ ਸੱਭਿਆਚਾਰਕ ਸਮਝ ਅਤੇ ਨਿਰਪੱਖਤਾ ਯਕੀਨੀ ਬਣਾਉਣ, ਧਾਰਮਿਕ ਪ੍ਰੀਚਰਾਂ ਲਈ ਵੀਜ਼ਾ ਫੀਸ (Preachers Visa Fees), ਮਾਪਿਆਂ ਦੇ ਵੀਜ਼ਾ ਲਈ ਆਮਦਨ ਦੀ ਹੱਦ (Parent Visa Income Threshold) – ਸਪਾਂਸਰ ਦੀ ਆਮਦਨ ਦੀ ਹੱਦ ਨੂੰ ਘਟਾ ਕੇ ਘੱਟੋ-ਘੱਟ ਤਨਖ਼ਾਹ $23.50 ਪ੍ਰਤੀ ਘੰਟੇ ਦੇ ਬਰਾਬਰ ਕਰਨ, ਸੀਮਤ ਉਦੇਸ਼ ਵੀਜ਼ਾ (Limited Purpose Visa – LPV) – ਪਰਿਵਾਰਕ ਜਾਂ ਸੱਭਿਆਚਾਰਕ ਸਮਾਗਮਾਂ (ਵਿਆਹ, ਅੰਤਿਮ ਸੰਸਕਾਰ ਆਦਿ) ਲਈ ਐਲ.ਪੀ.ਵੀ. ਜਾਰੀ ਕਰਨ, ਕਮਿਊਨਿਟੀ ਨਾਲ ਨੀਤੀ ‘ਤੇ ਸਲਾਹ-ਮਸ਼ਵਰਾ (Policy Consultation), ਰਾਜਨੀਤਿਕ ਆਗੂਆਂ ਨਾਲ ਨਿਯਮਤ ਸੰਪਰਕ (Regular Engagement) – ਹਰ ਚਾਰ ਮਹੀਨੇ ਬਾਅਦ ਕਮਿਊਨਿਟੀ ਗਰੁੱਪਾਂ ਅਤੇ ਸਰਕਾਰੀ ਏਜੰਸੀਆਂ ਵਿਚਕਾਰ ਨਿਯਮਤ ਮੀਟਿੰਗਾਂ ਕਰਨ ਦਾ ਸੁਝਾਅ, ਐਥਨਿਕ ਕਮਿਊਨਿਟੀਆਂ ਲਈ ਮੰਤਰਾਲਾ (Ministry for Ethnic Communities) ਆਦਿ ਮੰਗਾਂ ਰੱਖੀਆਂ ਗਈਆਂ ਸਨ। ਸੁਪਰੀਮ ਸਿੱਖ ਸੋਸਾਇਟੀ ਦੇ ਪ੍ਰਤਿਨਿਧੀਆਂ ਨੇ ਕਿਹਾ ਕਿ ਇਹ ਮੀਟਿੰਗ ਕਮਿਊਨਿਟੀ ਦੀ ਆਵਾਜ਼ ਨੂੰ ਸਰਕਾਰ ਤੱਕ ਪਹੁੰਚਾਉਣ ਵੱਲ ਇੱਕ ਮਹੱਤਵਪੂਰਨ ਕਦਮ ਹੈ, ਜਿਸ ਨਾਲ ਭਵਿੱਖ ਵਿੱਚ ਇਮੀਗ੍ਰੇਸ਼ਨ ਨੀਤੀਆਂ ਹੋਰ ਨਿਰਪੱਖ ਅਤੇ ਮਨੁੱਖੀ ਹਿੱਤਾਂ ਅਨੁਸਾਰ ਬਣ ਸਕਣਗੀਆਂ।