ਦੋ ਪ੍ਰਵਾਸੀ ਕਾਮਿਆਂ ਦਾ ਸ਼ੋਸ਼ਣ ਕਰਨ ਅਤੇ ਇਮੀਗ੍ਰੇਸ਼ਨ ਨਿਊਜ਼ੀਲੈਂਡ ਨੂੰ ਗਲਤ ਜਾਣਕਾਰੀ ਪ੍ਰਦਾਨ ਕਰਨ ਦਾ ਦੋਸ਼ੀ ਮੰਨਣ ਤੋਂ ਬਾਅਦ, ਪੇਰੋਆ ( Paeroa ) ਅਧਾਰਿਤ ਕੰਪਨੀ ਇੱਕ ਮਾਲਕ ਨੂੰ $159,250 ਦਾ ਜੁਰਮਾਨਾ ਲਗਾਇਆ ਗਿਆ ਹੈ। ਸੁਪਰ ਕਲੀਅਰੈਂਸ ਵੱਜੋਂ ਵਪਾਰ ਕਰਨ ਵਾਲੀ ਦੇਵ ਟ੍ਰੇਡਿੰਗ ਲਿਮਟਿਡ ਨੂੰ ਹਰੇਕ ਕਾਮੇ ਨੂੰ ਤਨਖਾਹ ਮੁਆਵਜ਼ੇ ਵਿੱਚ $18,684.72 ਅਤੇ ਭਾਵਨਾਤਮਕ ਨੁਕਸਾਨ ਦੇ ਭੁਗਤਾਨ ਵਿੱਚ $5000 ਦਾ ਭੁਗਤਾਨ ਕਰਨ ਦਾ ਵੀ ਹੁਕਮ ਦਿੱਤਾ ਗਿਆ ਹੈ। ਵਪਾਰ, ਨਵੀਨਤਾ ਅਤੇ ਰੁਜ਼ਗਾਰ ਮੰਤਰਾਲੇ (MBIE) ਦੇ ਵੱਲੋਂ ਮੰਗਲਵਾਰ ਨੂੰ ਜਾਰੀ ਇੱਕ ਬਿਆਨ ਵਿੱਚ ਕਿਹਾ ਗਿਆ ਹੈ ਕਿ ਕੰਪਨੀ ਦੇ ਨਿਰਦੇਸ਼ਕ, ਚੇਤਨਾ ਦੇਵ ਅਤੇ ਉਸਦੇ ਪਤੀ ਹਿਤੇਸ਼ ਦੇਵ ਨੇ ਮਾਨਤਾ ਪ੍ਰਾਪਤ ਮਾਲਕ ਵਰਕ ਵੀਜ਼ਾ ਸਕੀਮ ਦੇ ਤਹਿਤ ਦੋ ਭਾਰਤੀ ਨਾਗਰਿਕਾਂ ਨੂੰ ਭਰਤੀ ਕੀਤਾ, ਫਿਰ ਉਨ੍ਹਾਂ ਨੂੰ ਗੈਰ-ਕਾਨੂੰਨੀ ਕੰਮ ਕਰਨ ਦੀਆਂ ਸਥਿਤੀਆਂ ਵਿੱਚ ਰੱਖ ਕੰਮ ਕਰਵਾਇਆ। MBIE ਦੀ ਜਾਂਚ ਵਿੱਚ ਖੁਲਾਸਾ ਹੋਇਆ ਕਿ ਮਜ਼ਦੂਰਾਂ ਤੋਂ: 14-14 ਘੰਟੇ, ਹਫ਼ਤੇ ਦੇ 7 ਦਿਨ, ਪਬਲਿਕ ਹਾਲੀਡੇ ਸਮੇਤ, ਕੰਮ ਕਰਵਾਇਆ ਗਿਆ—ਉਹ ਵੀ ਬਿਨਾਂ ਕਾਨੂੰਨੀ ਅਧਿਕਾਰਾਂ ਅਤੇ ਤਨਖ਼ਾਹ ਦੇ।
ਜਾਂਚ ਵਿੱਚ ਪਾਇਆ ਗਿਆ ਕਿ ਦੇਵ ਟ੍ਰੇਡਿੰਗ ਨੇ ਇਮੀਗ੍ਰੇਸ਼ਨ ਅਧਿਕਾਰੀਆਂ ਨੂੰ ਜਾਅਲੀ ਤਨਖਾਹ ਸਲਿੱਪਾਂ, ਰੋਸਟਰ ਅਤੇ ਹੋਰ ਦਸਤਾਵੇਜ਼ ਜਮ੍ਹਾਂ ਕਰਵਾਏ, ਇੱਥੋਂ ਤੱਕ ਕਿ ਕਰਮਚਾਰੀਆਂ ਵੱਲੋਂ ਰੁਜ਼ਗਾਰ ਸਿਖਲਾਈ ਮਾਡਿਊਲ ਵੀ ਖੁਦ ਪੂਰੇ ਕੀਤੇ। ਜਾਂਚ ਦੇ ਰਾਸ਼ਟਰੀ ਪ੍ਰਬੰਧਕ ਜੇਸਨ ਪੈਰੀ ਨੇ ਕਿਹਾ ਕਿ “ਇਹ ਇਮੀਗ੍ਰੇਸ਼ਨ ਨਿਊਜ਼ੀਲੈਂਡ ਲਈ ਅਤੇ ਸਭ ਤੋਂ ਮਹੱਤਵਪੂਰਨ, ਪੀੜਤਾਂ ਲਈ ਇੱਕ ਚੰਗਾ ਨਤੀਜਾ ਹੈ।”