ਆਕਲੈਂਡ ਦੀ ਮੈਨੂਕਾਊ ਜ਼ਿਲ੍ਹਾ ਅਦਾਲਤ ਦੇ ਜੱਜ ਨੇ ਲੋਕਲ ਬਾਡੀ ਚੋਣਾਂ ਸਬੰਧੀ ਪਟੀਸ਼ਨ ‘ਤੇ ਸੁਣਵਾਈ ਕਰਦਿਆਂ ਵੱਡਾ ਫੈਸਲਾ ਸੁਣਾਇਆ ਹੈ। ਦਰਅਸਲ ਸਾਊਥ ਆਕਲੈਂਡ ਦੀ ਲੋਕਲ ਬਾਡੀ ਚੋਣ ਨੂੰ ਅਦਾਲਤ ਨੇ ਧੋਖਾਧੜੀ ਦੇ ਇਲਜ਼ਾਮਾਂ ਕਾਰਨ ਰੱਦ ਕਰ ਦਿੱਤਾ ਹੈ। ਪਟੀਸ਼ਨ ‘ਚ ਆਕਲੈਂਡ ਸਥਾਨਕ ਸੰਸਥਾ ਚੋਣਾਂ ਵਿੱਚ ਧੋਖਾਧੜੀ ਦੇ ਦੋਸ਼ਾਂ ਤੋਂ ਬਾਅਦ ਨਿਆਂਇਕ ਜਾਂਚ ਦੀ ਮੰਗ ਕੀਤੀ ਗਈ ਸੀ। ਜੱਜ ਰਿਚਰਡ ਮੈਕਇਲਰੇਥ ਨੇ ਫੈਸਲਾ ਦਿੱਤਾ ਕਿ Ōtara–Papatoetoe Local Board ਦੀ ਚੋਣ ਵਿੱਚ ਅਜਿਹੀਆਂ ਬੇਤਰਤੀਬੀਆਂ ਹੋਈਆਂ, ਜਿਨ੍ਹਾਂ ਨੇ ਨਤੀਜੇ ‘ਤੇ ਸਿੱਧਾ ਅਸਰ ਪਾਇਆ। ਇਸ ਫੈਸਲੇ ਨਾਲ ਹੁਣ ਨਵੀਂ ਚੋਣ ਕਰਵਾਉਣੀ ਲਾਜ਼ਮੀ ਹੋ ਗਈ ਹੈ, ਜੋ 9 ਅਪ੍ਰੈਲ 2026 ਤੱਕ ਪੂਰੀ ਕਰਨੀ ਹੋਵੇਗੀ। ਮਾਮਲਾ ਲੋਕਲ ਬੋਰਡ ਦੇ ਸਾਬਕਾ ਡਿਪਟੀ ਚੇਅਰ ਵੀ ਹੌਸੀਆ ਵੱਲੋਂ ਦਾਇਰ ਕੀਤਾ ਗਿਆ ਸੀ। ਉਨ੍ਹਾਂ ਨੇ ਚੀਫ਼ ਇਲੈਕਟੋਰਲ ਅਫ਼ਸਰ ਡੇਲ ਔਫ਼ਸੋਸਕੇ ਦੇ ਖ਼ਿਲਾਫ਼ ਪਟੀਸ਼ਨ ਦਾਖ਼ਲ ਕਰਦੇ ਹੋਏ ਦਾਅਵਾ ਕੀਤਾ ਸੀ ਕਿ ਚੋਣ ਦੌਰਾਨ: • ਵੋਟਿੰਗ ਪੇਪਰਾਂ ਦੀ ਚੋਰੀ • ਚੋਰੀਸ਼ੁਦਾ ਵੋਟ ਪੇਪਰਾਂ ਦੀ ਧੋਖੇ ਨਾਲ ਵਰਤੋਂ ਅਤੇ ਹੋਰ ਗੰਭੀਰ ਅਨਿਯਮਤਤਾਵਾਂ ਵੱਡੇ ਪੱਧਰ ‘ਤੇ ਹੋਈਆਂ ਸਨ।
ਮਨੂਕਾਉ ਡਿਸਟ੍ਰਿਕਟ ਕੋਰਟ ਵਿੱਚ ਪਿਛਲੇ ਹਫ਼ਤੇ ਸੁਣਵਾਈ ਤੋਂ ਬਾਅਦ ਜੱਜ ਨੇ ਫੈਸਲਾ ਰਾਖਵਾਂ ਰੱਖਿਆ ਸੀ ਜੋ ਅੱਜ ਜਾਰੀ ਕੀਤਾ ਹੈ। ਹੌਸੀਆ ਨੇ ਕਿਹਾ ਕਿ ਇਹ ਫੈਸਲਾ ਲੋਕਤੰਤਰ ਅਤੇ ਚੋਣੀ ਇਮਾਨਦਾਰੀ ਦੀ ਜਿੱਤ ਹੈ। ਅਦਾਲਤੀ ਫੈਸਲੇ ਦੇ ਤਹਿਤ ਹੁਣ ਚੋਣ ਮੁੜ ਕਰਵਾਉਣੀ ਪਵੇਗੀ। ਉਮੀਦਵਾਰਾਂ ਦੀ ਨਾਮਜ਼ਦਗੀ 31 ਦਸੰਬਰ ਤੋਂ ਖੁੱਲੇਗੀ ਅਤੇ 28 ਜਨਵਰੀ (ਦੁਪਹਿਰ 12 ਵਜੇ) ਤੱਕ ਚਲੇਗੀ।