ਆਕਲੈਂਡ ਤੋਂ ਇੱਕ ਹੈਰਾਨੀਜਨਕ ਮਾਮਲਾ ਸਾਹਮਣੇ ਆਇਆ ਹੈ। ਇੱਕ ਸਥਾਨਕ ਰਿਪੋਰਟ ਮੁਤਾਬਿਕ ਪਿਛਲੇ 24 ਘੰਟਿਆਂ ਦੌਰਾਨ ਇੱਥੇ ਸਿੰਥੈਟਿਕ ਕੈਨਾਬਿਨਾਇਡਸ, ਜਿਨ੍ਹਾਂ ਨੂੰ ਆਮ ਤੌਰ ‘ਤੇ “ਸਿੰਥੈਟਿਕਸ” ਜਾਂ “ਸਿੰਨੀਜ਼” ਕਿਹਾ ਜਾਂਦਾ ਹੈ, ਦੀ ਵਰਤੋਂ ਤੋਂ ਬਾਅਦ ਕਈ ਲੋਕਾਂ ਨੂੰ ਹਸਪਤਾਲ ਵਿੱਚ ਦਾਖ਼ਲ ਕਰਵਾਉਣਾ ਪਿਆ ਹੈ। ਅਧਿਕਾਰੀਆਂ ਮੁਤਾਬਿਕ ਹਾਲੇ ਤੱਕ ਇਹ ਸਪਸ਼ਟ ਨਹੀਂ ਹੋ ਸਕਿਆ ਕਿ ਕਿਹੜਾ ਖ਼ਾਸ ਸਿੰਥੈਟਿਕ ਨਸ਼ਾ ਇਸ ਦਾ ਮੁੱਖ ਕਾਰਨ ਹੈ। ਪਰ ਮੰਨਿਆ ਜਾ ਰਿਹਾ ਹੈ ਕਿ ਪ੍ਰਭਾਵਿਤ ਬੈਚ ਆਕਲੈਂਡ ਭਰ ਵਿੱਚ ਫੈਲਿਆ ਹੋ ਸਕਦਾ ਹੈ ਅਤੇ ਹੋਰ ਇਲਾਕਿਆਂ ਤੱਕ ਵੀ ਪਹੁੰਚਿਆ ਹੋਵੇਗਾ। ਸਿਹਤ ਅਧਿਕਾਰੀਆਂ ਨੇ ਵੀ ਅਚਾਨਕ ਵਧੇ ਮਾਮਲਿਆਂ ਕਾਰਨ ਤੁਰੰਤ ਚਿਤਾਵਨੀ ਜਾਰੀ ਕੀਤੀ ਹੈ। ਇਸ ਸਬੰਧੀ PHF Science ਵੱਲੋਂ ਵੀ ਜਾਂਚ ਕੀਤੀ ਜਾ ਰਹੀ ਹੈ। ਰਿਪੋਰਟ ਮੁਤਾਬਿਕ ਇਨ੍ਹਾਂ ਦੇ ਸਾਈਡ ਇਫੈਕਟਾਂ ਵਿੱਚ ਦੌਰੇ ਪੈਣਾ, ਸਾਹ ਲੈਣ ਵਿੱਚ ਦਿੱਕਤ, ਬੇਹੋਸ਼ੀ, ਭਰਮ ਅਤੇ ਦਿਲ ਦੀ ਧੜਕਣ ਦਾ ਵਧਣਾ ਸ਼ਾਮਿਲ ਹਨ।
