ਓਟਾਗੋ ਤੋਂ ਇੱਕ ਹੈਰਾਨੀਜਨਕ ਮਾਮਲਾ ਸਾਹਮਣੇ ਆਇਆ ਹੈ। ਦਰਅਸਲ ਇੱਥੇ ਇੱਕ ਕਾਰ ਚੋਰੀ ਹੋਈ ਹੈ ਜਿਸ ‘ਚ 2 ਕੁੱਤੇ ਵੀ ਸਵਾਰ ਸਨ। ਗੱਡੀ ਚੋਰੀ ਹੋਣ ਤੋਂ ਬਾਅਦ ਮਾਲਿਕ ਦੇ ਵੱਲੋਂ ਮਦਦ ਦੀ ਗੁਹਾਰ ਲਗਾਈ ਹੈ। ਜੇਕ ਨੋਲਨ ਨੇ ਕਿਹਾ ਕਿ ਉਹ ਓਮਾਕਾਉ ਸ਼ਹਿਰ ਵਿੱਚ ਆਪਣੇ ਦੋਸਤ ਨੂੰ ਮਿਲਣ ਲਈ ਆਪਣੀ ਗੱਡੀ ਤੋਂ ਕੁਝ ਮਿੰਟਾਂ ਲਈ ਹੀ ਬਾਹਰ ਨਿਕਲਿਆ ਸੀ ਜਦੋਂ ਉਸਨੇ ਖਿੜਕੀ ਤੋਂ ਬਾਹਰ ਦੇਖਿਆ ਅਤੇ ਕਿਸੇ ਨੂੰ ਅੰਦਰ ਛਾਲ ਮਾਰ ਕੇ ਭੱਜਦੇ ਦੇਖਿਆ। ਨੋਲਨ ਨੇ ਫੇਸਬੁੱਕ ‘ਤੇ ਇੱਕ ਪੋਸਟ ਸਾਂਝੀ ਕੀਤੀ ਜਿਸ ਵਿੱਚ ਕੁੱਤਿਆਂ ਅਤੇ ਕਾਰ ਨੂੰ ਲੱਭਣ ‘ਚ ਜਨਤਾ ਦੀ ਮਦਦ ਦੀ ਅਪੀਲ ਕੀਤੀ ਗਈ ਹੈ। ਮਾਲਿਕ ਦਾ ਕਹਿਣਾ ਹੈ ਕਿ ਮੈਨੂੰ ਆਪਣੀ ਕਾਰ ਨਾਲੋਂ ਕੁੱਤਿਆਂ ਦੀ ਜਿਆਦਾ ਫਿਕਰ ਹੈ। ਪੁਲਿਸ ਨੇ ਪੁਸ਼ਟੀ ਕੀਤੀ ਕਿ ਗੱਡੀ ਕੱਲ੍ਹ ਦੁਪਹਿਰ 1 ਵਜੇ ਦੇ ਕਰੀਬ ਇਲਾਕੇ ਤੋਂ ਚੋਰੀ ਹੋ ਗਈ ਸੀ।
