ਕ੍ਰਾਇਸਟਚਰਚ ਸਿਟੀ ਕੌਂਸਲ ਨੇ ਸ਼ਨੀਵਾਰ ਦੁਪਹਿਰ ਸ਼ਹਿਰ ਦੇ ਕਈ ਪੂਰਬੀ ਇਲਾਕਿਆਂ ਲਈ Boil Water Notice ਜਾਰੀ ਕੀਤਾ ਹੈ। ਇਹ ਚਿਤਾਵਨੀ ਲੋਕਾਂ ਲਈ ਸਿਹਤ ਖਤਰੇ ਨੂੰ ਦੇਖਦੇ ਹੋਏ ਜਾਰੀ ਕੀਤੀ ਗਈ ਹੈ। ਦੁਪਹਿਰ ਕਰੀਬ 1 ਵਜੇ ਤੋਂ ਪਹਿਲਾਂ ਐਮਰਜੈਂਸੀ ਮੋਬਾਈਲ ਅਲਰਟ ਭੇਜਿਆ ਗਿਆ ਸੀ, ਜਿਸ ਵਿੱਚ Rawhiti ਵਾਟਰ ਸਪਲਾਈ ਨਾਲ ਜੁੜੇ ਇਲਾਕਿਆਂ ਨੂੰ ਪ੍ਰਭਾਵਿਤ ਦੱਸਿਆ ਗਿਆ ਸੀ।
ਪ੍ਰਭਾਵਿਤ ਇਲਾਕੇ
ਚਿਤਾਵਨੀ ਹੇਠ ਲਿਖੇ ਇਲਾਕਿਆਂ ਲਈ ਲਾਗੂ ਹੈ:
ਨਿਊ ਬ੍ਰਾਈਟਨ
ਬਰਵੁੱਡ
ਵੈਨੋਨੀ
ਅਰਾਨੂਈ
ਸਾਊਥਸ਼ੋਰ
ਅਧਿਕਾਰੀਆਂ ਨੇ ਹਦਾਇਤ ਦਿੱਤੀ ਹੈ ਕਿ ਇਨ੍ਹਾਂ ਇਲਾਕਿਆਂ ਦੇ ਸਾਰੇ ਵਸਨੀਕ ਅਗਲੀ ਸੂਚਨਾ ਤੱਕ ਪੀਣ ਵਾਲਾ ਪਾਣੀ ਜ਼ਰੂਰ ਉਬਾਲ ਕੇ ਵਰਤਣ।
ਕਿੱਥੇ-ਕਿੱਥੇ ਉਬਾਲਿਆ ਪਾਣੀ ਵਰਤਣਾ ਲਾਜ਼ਮੀ
ਲੋਕਾਂ ਨੂੰ ਹਦਾਇਤ ਦਿੱਤੀ ਗਈ ਹੈ ਕਿ ਉਬਾਲਿਆ ਪਾਣੀ ਹੇਠ ਲਿਖੇ ਕੰਮਾਂ ਲਈ ਵਰਤਿਆ ਜਾਵੇ:
ਪੀਣ ਲਈ
ਬੱਚਿਆਂ ਦੀ ਫਾਰਮੂਲਾ ਦੁੱਧ ਤਿਆਰੀ
ਜੂਸ ਅਤੇ ਬਰਫ ਬਣਾਉਣ ਲਈ
ਫਲ ਅਤੇ ਸਬਜ਼ੀਆਂ ਧੋਣ ਲਈ
ਖਾਣਾ ਬਣਾਉਣ ਲਈ
ਦੰਦ ਸਾਫ ਕਰਨ ਲਈ
ਸਾਰੇ ਪਾਣੀ (ਫਿਲਟਰ ਕੀਤਾ ਪਾਣੀ ਵੀ) ਨੂੰ ਘੱਟੋ-ਘੱਟ 1 ਮਿੰਟ ਲਈ ਲਗਾਤਾਰ ਉਬਾਲਣਾ ਲਾਜ਼ਮੀ ਹੈ।
ਬੈਕਟੀਰੀਆ ਦੀ ਮੌਜੂਦਗੀ
ਕ੍ਰਾਇਸਟਚਰਚ ਸਿਟੀ ਕੌਂਸਲ ਮੁਤਾਬਿਕ ਟੈਸਟਿੰਗ ਦੌਰਾਨ ਪੀਣ ਵਾਲੇ ਪਾਣੀ ਵਿੱਚ ਬੈਕਟੀਰੀਆ ਦੀ ਮੌਜੂਦਗੀ ਮਿਲੀ ਹੈ, ਜਿਸ ਕਾਰਨ ਪਾਣੀ ਪੀਣ ਲਈ ਅਸੁਰੱਖਿਅਤ ਘੋਸ਼ਿਤ ਕੀਤਾ ਗਿਆ ਹੈ। ਸਟਾਫ ਅਤੇ ਕਾਂਟ੍ਰੈਕਟਰ ਮੌਕੇ ‘ਤੇ ਹੋਰ ਟੈਸਟ ਅਤੇ ਜਾਂਚ ਕਰ ਰਹੇ ਹਨ ਤਾਂ ਜੋ ਦੂਸ਼ਣ ਦੇ ਕਾਰਨ ਦਾ ਪਤਾ ਲੱਗ ਸਕੇ। ਅਗਲੀ ਜਾਣਕਾਰੀ ਮਿਲਣ ਤੱਕ ਇਹ ਚਿਤਾਵਨੀ ਲਾਗੂ ਰਹੇਗੀ। ਤਾਜ਼ਾ ਜਨਗਣਨਾ ਅਨੁਸਾਰ ਲਗਭਗ 30,000 ਵਸਨੀਕ ਇਸ ਨੋਟਿਸ ਨਾਲ ਪ੍ਰਭਾਵਿਤ ਹੋ ਰਹੇ ਹਨ।