Tauranga ਦੇ ਇਲਾਕੇ Mount Maunganui ਵਿੱਚ ਸ਼ਨੀਵਾਰ ਦੇਰ ਰਾਤ ਇੱਕ ਗੰਭੀਰ ਸੜਕ ਹਾਦਸਾ ਵਾਪਰਿਆ, ਜਿਸ ਵਿੱਚ ਇੱਕ ਪੰਜਾਬੀ ਉਬਰ ਡਰਾਈਵਰ ਅਤੇ ਉਸ ਦੀ ਗੱਡੀ ‘ਚ ਸਵਾਰ ਮਹਿਲਾ ਯਾਤਰੀ ਮਸਾਂ ਮਸਾਂ ਬਚੇ ਜਦਕਿ ਦੂਜੀ ਕਾਰ ਅੱਗ ਦੀ ਲਪੇਟ ਵਿੱਚ ਆ ਗਈ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਉਬਰ ਡਰਾਈਵਰ ਮਹਿਲਾ ਯਾਤਰੀ ਨੂੰ ਟੋਟਾਰਾ ਸਟਰੀਟ ਤੋਂ ਲੈ ਕੇ ਜਾ ਰਿਹਾ ਸੀ। ਇਸ ਦੌਰਾਨ ਸਾਹਮਣੇ ਵੱਲੋਂ ਆ ਰਹੀ ਕਾਰ ਨੇ ਅਚਾਨਕ ਲੇਨ ਤੋਂ ਹਟ ਕੇ ਉਬਰ ਕਾਰ ਨੂੰ ਸਿੱਧੀ ਟੱਕਰ ਮਾਰ ਦਿੱਤੀ। ਟੱਕਰ ਇੰਨੀ ਜ਼ਬਰਦਸਤ ਸੀ ਕਿ ਦੋਵੇਂ ਵਾਹਨ ਬੇਕਾਬੂ ਹੋ ਗਏ ਅਤੇ ਸੜਕ ਕਿਨਾਰੇ ਪਹੁੰਚ ਗਏ।
ਹਾਦਸੇ ਤੋਂ ਬਾਅਦ ਦੋਵੇਂ ਗੱਡੀਆਂ ਵਿੱਚੋਂ ਧੂੰਆਂ ਨਿਕਲਣਾ ਸ਼ੁਰੂ ਹੋ ਗਿਆ ਅਤੇ ਕੁਝ ਹੀ ਸਮੇਂ ਵਿੱਚ ਇੱਕ ਕਾਰ ਨੂੰ ਅੱਗ ਲੱਗ ਗਈ। ਇਲਾਕੇ ਦੇ ਲੋਕ ਤੁਰੰਤ ਮੌਕੇ ‘ਤੇ ਪਹੁੰਚੇ ਅਤੇ ਐਮਰਜੈਂਸੀ ਸੇਵਾਵਾਂ ਨੂੰ ਸੂਚਿਤ ਕੀਤਾ। ਪੁਲਿਸ, ਐਂਬੂਲੈਂਸ ਅਤੇ ਫਾਇਰ ਬ੍ਰਿਗੇਡ ਨੇ ਮੌਕੇ ‘ਤੇ ਪਹੁੰਚ ਕੇ ਹਾਲਾਤ ਕਾਬੂ ਵਿੱਚ ਕੀਤੇ ਅਤੇ ਅੱਗ ਬੁਝਾਈ। ਪੁਲਿਸ ਮੁਤਾਬਕ ਟੱਕਰ ਮਾਰਨ ਵਾਲਾ ਡਰਾਈਵਰ ਨਸ਼ੇ ਦੀ ਹਾਲਤ ਵਿੱਚ ਸੀ। ਉਸਦੇ ਖੂਨ ਦੇ ਸੈਂਪਲ ਜਾਂਚ ਲਈ ਭੇਜੇ ਗਏ ਹਨ। ਦੋਸ਼ੀ ਚਾਲਕ ਨੂੰ ਵੀ ਇਲਾਜ ਲਈ ਹਸਪਤਾਲ ਦਾਖਲ ਕਰਵਾਇਆ ਗਿਆ ਹੈ ਅਤੇ ਮਾਮਲੇ ਦੀ ਜਾਂਚ ਜਾਰੀ ਹੈ।
ਹਾਦਸੇ ਦੌਰਾਨ ਉਬਰ ਵਿੱਚ ਸਵਾਰ ਮਹਿਲਾ ਨੂੰ ਸਦਮਾ ਅਤੇ ਕੁਝ ਸੱਟਾਂ ਆਈਆਂ, ਜਿਸ ਕਰਕੇ ਉਸ ਨੂੰ ਹਸਪਤਾਲ ਲਿਜਾਇਆ ਗਿਆ। ਉਬਰ ਡਰਾਈਵਰ ਨੇ ਕਿਹਾ ਕਿ ਏਅਰਬੈਗ ਖੁਲ੍ਹਣ ਕਾਰਨ ਉਹ ਗੰਭੀਰ ਸੱਟ ਤੋਂ ਬਚ ਗਿਆ ਅਤੇ ਉਸ ਨੂੰ ਸਿਰਫ਼ ਹਲਕੀਆਂ ਰਗੜਾਂ ਹੀ ਲੱਗੀਆਂ ਸਨ। ਬਚੇ ਹੋਏ ਡਰਾਈਵਰ ਨੇ ਸਾਰੇ ਵਾਹਨ ਚਾਲਕਾਂ ਨੂੰ ਅਪੀਲ ਕੀਤੀ ਕਿ ਸੜਕ ‘ਤੇ ਹਮੇਸ਼ਾਂ ਸਾਵਧਾਨੀ ਅਤੇ ਹੌਲੀ ਰਫ਼ਤਾਰ ਨਾਲ ਗੱਡੀ ਚਲਾਈ ਜਾਵੇ। ਪੁਲਿਸ ਵੱਲੋਂ ਹਾਦਸੇ ਸਬੰਧੀ ਹੋਰ ਜਾਂਚ ਕੀਤੀ ਜਾ ਰਹੀ ਹੈ ਅਤੇ ਅਗਲੀ ਕਾਰਵਾਈ ਰਿਪੋਰਟ ਆਉਣ ਤੋਂ ਬਾਅਦ ਕੀਤੀ ਜਾਵੇਗੀ।