ਦੋ ਕੂਰੀਅਰ ਕੰਪਨੀਆਂ ਨੂੰ ਕਾਰਟੇਲ ਗਤੀਵਿਧੀਆਂ ਵਿੱਚ ਸ਼ਾਮਿਲ ਹੋਣ ਦੇ ਦੋਸ਼ਾਂ ਤਹਿਤ ਕੁੱਲ ਮਿਲਾ ਕੇ $1.2 ਮਿਲੀਅਨ ਤੋਂ ਵੱਧ ਦਾ ਜੁਰਮਾਨਾ ਭਰਨ ਦਾ ਹੁਕਮ ਦਿੱਤਾ ਗਿਆ ਹੈ। ਕੂਰੀਅਰ ਸੇਵਾ Aramex ‘ਤੇ $700,000 ਦਾ ਜੁਰਮਾਨਾ ਲਗਾਇਆ ਗਿਆ ਹੈ, ਜਦਕਿ ਦੂਜੀ ਕੰਪਨੀ GoSweetSpot ਨੂੰ ਵੱਖ-ਵੱਖ ਦੋ ਮਾਮਲਿਆਂ ਵਿੱਚ $525,000 ਜੁਰਮਾਨਾ ਕੀਤਾ ਗਿਆ ਹੈ। ਇਹ ਮਾਮਲੇ Commerce Commission ਵੱਲੋਂ ਜਾਂਚੇ ਗਏ ਸਨ।
ਕਮਿਸ਼ਨ ਨੇ ਕਿਹਾ ਕਿ ਉਹ ਹੋਰ ਨੌਂ ਕੂਰੀਅਰ ਸੇਵਾਵਾਂ ਨੂੰ ਵੀ ਚਿਤਾਵਨੀਆਂ ਜਾਰੀ ਕਰ ਰਿਹਾ ਹੈ, ਕਿਉਂਕਿ ਉਨ੍ਹਾਂ ਦਾ ਵਰਤਾਅ ਕਾਨੂੰਨ ਅਧੀਨ ਕਾਰਟੇਲ ਗਤੀਵਿਧੀ ਮੰਨੀ ਜਾ ਸਕਦੀ ਹੈ। ਕਾਮਰਸ ਕਮਿਸ਼ਨ ਦੇ ਚੇਅਰ ਡਾ. ਜੌਨ ਸਮਾਲ ਨੇ ਕਿਹਾ, “ਫ੍ਰੇਟ ਅਤੇ ਕੂਰੀਅਰ ਸੈਕਟਰ ਸਾਡੇ ਲਈ ਲਗਾਤਾਰ ਚਿੰਤਾ ਅਤੇ ਧਿਆਨ ਦਾ ਖੇਤਰ ਰਿਹਾ ਹੈ। ਪਿਛਲੇ 15 ਸਾਲਾਂ ਵਿੱਚ ਕਮਿਸ਼ਨ ਇਸ ਸੈਕਟਰ ਨਾਲ ਸਬੰਧਿਤ ਪੰਜ ਅਦਾਲਤੀ ਕੇਸ ਲੈ ਚੁੱਕਾ ਹੈ।”
ਉਨ੍ਹਾਂ ਨੇ ਕਿਹਾ, “ਅਸੀਂ ਉਮੀਦ ਕਰਦੇ ਹਾਂ ਕਿ ਇਹ ਜੁਰਮਾਨੇ ਅਤੇ ਚਿਤਾਵਨੀਆਂ ਕੂਰੀਅਰ ਸੈਕਟਰ ਵਿੱਚ ਵਿਹਾਰ ਵਿੱਚ ਬਦਲਾਅ ਲਿਆਉਣਗੀਆਂ।”ਦੋਵੇਂ ਕੰਪਨੀਆਂ ਨੇ ਪਹਿਲਾਂ ਹੀ ਸਵੀਕਾਰਿਆ ਸੀ ਕਿ ਉਨ੍ਹਾਂ ਨੇ ਇਕ ਪ੍ਰਤੀਯੋਗੀ ਨਾਲ ਮਿਲ ਕੇ ਗਾਹਕਾਂ ਦੀ ਵੰਡ ਕਰਨ ਵਾਲੇ ਸਮਝੌਤੇ ਕੀਤੇ ਸਨ। ਇਸ ਤੋਂ ਇਲਾਵਾ, Aramex ਨੇ ਆਪਣੇ ਕਾਂਟ੍ਰੈਕਟ ਵਿੱਚ ਨਿਰਧਾਰਤ ਕੀਮਤਾਂ ਸ਼ਾਮਲ ਕਰਨ ਦੀ ਵੀ ਗਲਤੀ ਮੰਨੀ ਸੀ। ਇਹ ਉਲੰਘਣਾਂ ਵੱਖ-ਵੱਖ ਸਨ ਅਤੇ ਦੋਨੋਂ ਕੰਪਨੀਆਂ ਵਿਚਕਾਰ ਆਪਸੀ ਸਮਝੌਤਾ ਨਹੀਂ ਸੀ।
ਡਾ. ਸਮਾਲ ਨੇ ਕਿਹਾ ਕਿ ਕੂਰੀਅਰ ਸੈਕਟਰ ਦਾ ਮੁਕਾਬਲੇਬਾਜ਼ ਅਤੇ ਪਾਰਦਰਸ਼ੀ ਰਹਿਣਾ ਬਹੁਤ ਜ਼ਰੂਰੀ ਹੈ। ਉਨ੍ਹਾਂ ਨੇ ਕਿਹਾ, “ਇਹ ਨਤੀਜਾ ਸਾਫ਼ ਸੰਦੇਸ਼ ਦਿੰਦਾ ਹੈ ਕਿ ਇਸ ਤਰ੍ਹਾਂ ਦੀ ਗੁਪਤ ਸਹਿਮਤੀਆਂ ਬਰਦਾਸ਼ਤ ਨਹੀਂ ਕੀਤੀਆਂ ਜਾਣਗੀਆਂ।” ਉਨ੍ਹਾਂ ਕਿਹਾ ਕਿ, “ਕਾਰਟੇਲ ਗਤੀਵਿਧੀਆਂ ਵਿੱਚ ਸ਼ਾਮਲ ਕੰਪਨੀਆਂ ਨੂੰ ਕਾਨੂੰਨੀ ਕਾਰਵਾਈ ਦਾ ਸਾਹਮਣਾ ਕਰਨ ਲਈ ਤਿਆਰ ਰਹਿਣਾ ਚਾਹੀਦਾ ਹੈ।”