ਨਿਊਜ਼ੀਲੈਂਡ ਦੇ Auckland Airport ‘ਤੇ ਪਾਰਕਿੰਗ ਸਿਸਟਮ ਦੀ ਗਲਤੀ ਕਾਰਨ ਇੱਕ ਯਾਤਰੀ ਨੂੰ ਵੀਕਐਂਡ ਪਾਰਕਿੰਗ ਲਈ $2600 ਤੋਂ ਵੱਧ ਦਾ ਚਾਰਜ ਲੱਗਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਮੀਡੀਆ ਰਿਪੋਰਟਾਂ ਮੁਤਾਬਕ ਕਲੇਟਨ ਨਾਮਕ ਇਕ ਕਾਰੋਬਾਰੀ ਨੇ ਨੇਪੀਅਰ ਜਾਣ ਲਈ ਆਪਣੀ ਕਾਰ ਦੀ ਪਾਰਕਿੰਗ ਪਹਿਲਾਂ ਹੀ ਆਨਲਾਈਨ ਬੁੱਕ ਕੀਤੀ ਸੀ। ਉਸ ਨੇ ਬੁਕਿੰਗ ਸਮੇਂ $96 ਦੀ ਅਗਾਊਂ ਅਦਾਇਗੀ ਵੀ ਕਰ ਦਿੱਤੀ ਸੀ।
ਬੁਕਿੰਗ ਦੇ ਨਿਯਮਾਂ ਅਨੁਸਾਰ ਕਾਰ ਪਾਰਕ ਵਿੱਚ ਦਾਖਲ ਹੋਣ ਅਤੇ ਬਾਹਰ ਨਿਕਲਣ ਵੇਲੇ ਉਸੇ ਕਰੈਡਿਟ ਕਾਰਡ ਨੂੰ ਟੈਪ ਕਰਨਾ ਸੀ ਜੋ ਆਨਲਾਈਨ ਭੁਗਤਾਨ ਲਈ ਵਰਤਿਆ ਗਿਆ ਸੀ। ਪਰ 1 ਮਾਰਚ ਨੂੰ ਜਦੋਂ ਉਹ ਪਾਰਕਿੰਗ ਤੋਂ ਬਾਹਰ ਨਿਕਲਣ ਲੱਗਾ ਤਾਂ ਮਸ਼ੀਨ ‘ਤੇ $2646 ਦਾ ਬਿੱਲ ਦਿਖਾਇਆ ਗਿਆ, ਜਿਸਨੂੰ ਦੇਖ ਕੇ ਉਹ ਹੈਰਾਨ ਰਹਿ ਗਿਆ।
ਕਲੇਟਨ ਨੇ ਤੁਰੰਤ ਮਦਦ ਲਈ ਹੇਲਪ ਬਟਨ ਦਬਾਇਆ, ਜਿਸ ਤੋਂ ਬਾਅਦ ਓਪਰੇਟਰ ਨੇ ਦੱਸਿਆ ਕਿ ਇਹ ਸਿਸਟਮ ਦੀ ਗਲਤੀ ਹੈ ਅਤੇ ਉਸਨੂੰ ਰਿਫੰਡ ਮਿਲ ਜਾਵੇਗਾ। ਪਰ ਇੱਕ ਹਫ਼ਤਾ ਬੀਤ ਜਾਣ ਦੇ ਬਾਵਜੂਦ ਵੀ ਉਸਨੂੰ ਕੋਈ ਜਵਾਬ ਨਹੀਂ ਮਿਲਿਆ।
ਉਸਦਾ ਕਹਿਣਾ ਹੈ ਕਿ ਇਸ ਤੋਂ ਪਹਿਲਾਂ ਵੀ 2024 ਵਿੱਚ ਉਸ ਨਾਲ ਦੋ ਵਾਰ ਵਾਧੂ ਚਾਰਜ ਹੋ ਚੁੱਕੇ ਹਨ—ਇੱਕ ਵਾਰ $264 ਅਤੇ ਦੂਜੀ ਵਾਰ $177। ਉਸਨੂੰ ਇਹ ਗੱਲ ਬਾਅਦ ਵਿੱਚ ਬੈਂਕ ਸਟੇਟਮੈਂਟ ਵੇਖਣ ਤੋਂ ਪਤਾ ਲੱਗੀ ਸੀ।
ਕਲੇਟਨ ਨੇ ਕਿਹਾ ਕਿ ਕਈ ਲੋਕ ਹਫ਼ਤਿਆਂ ਪਹਿਲਾਂ ਹੀ ਪਾਰਕਿੰਗ ਬੁੱਕ ਕਰਦੇ ਹਨ ਅਤੇ ਸੰਭਵ ਹੈ ਕਿ ਉਹ ਆਪਣੇ ਖਾਤਿਆਂ ਵਿੱਚ ਲੱਗੇ ਵਾਧੂ ਚਾਰਜਾਂ ‘ਤੇ ਧਿਆਨ ਨਾ ਦੇਣ। ਉਸਨੇ ਏਅਰਪੋਰਟ ਦੀ ਰਿਫੰਡ ਪ੍ਰਕਿਰਿਆ ਨੂੰ ਵੀ ਨਿਰਾਸ਼ਾਜਨਕ ਕਰਾਰ ਦਿੱਤਾ ਹੈ।