ਸਾਬਕਾ ਪ੍ਰਧਾਨ ਮੰਤਰੀ Chris Hipkins ਨੂੰ ਆਪਣੀ ਸਾਬਕਾ ਪਤਨੀ ਵੱਲੋਂ ਸੋਸ਼ਲ ਮੀਡੀਆ ‘ਤੇ ਕੀਤੇ ਦਾਵਿਆਂ ਤੋਂ ਬਾਅਦ ਨਵੇਂ ਵਿਵਾਦ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਰਿਪੋਰਟਾਂ ਅਨੁਸਾਰ ਇਹ ਦਾਅਵੇ ਉਨ੍ਹਾਂ ਦੀ ਸਾਬਕਾ ਪਤਨੀ Jade Paul ਨੇ ਆਪਣੇ ਨਿੱਜੀ ਫੇਸਬੁੱਕ ਪੇਜ ‘ਤੇ ਐਤਵਾਰ ਸ਼ਾਮ ਪੋਸਟ ਕੀਤੇ ਸਨ, ਜੋ ਬਾਅਦ ਵਿੱਚ ਹਟਾ ਦਿੱਤੇ ਗਏ।
ਹਾਲਾਂਕਿ ਦੱਸਿਆ ਜਾ ਰਿਹਾ ਹੈ ਕਿ ਇਹ ਦਾਅਵੇ ਕਿਸੇ ਵੀ ਗੈਰਕਾਨੂੰਨੀ ਗਤੀਵਿਧੀ ਨਾਲ ਸਬੰਧਿਤ ਨਹੀਂ ਹਨ। ਜਾਰੀ ਬਿਆਨ ਵਿੱਚ ਹਿਪਕਿਨਸ ਨੇ ਇਨ੍ਹਾਂ ਦੋਸ਼ਾਂ ਨੂੰ ਪੂਰੀ ਤਰ੍ਹਾਂ ਨਕਾਰਦਿਆਂ ਕਿਹਾ ਕਿ ਉਹ ਇਸ ਮਾਮਲੇ ਵਿੱਚ ਕਾਨੂੰਨੀ ਸਲਾਹ ਲੈ ਰਹੇ ਹਨ ਅਤੇ ਇਸ ‘ਤੇ ਹੋਰ ਕੋਈ ਟਿੱਪਣੀ ਨਹੀਂ ਕਰਨਗੇ।
ਦੂਜੇ ਪਾਸੇ, ਜੇਡ ਪਾਲ ਨੇ ਕਿਹਾ ਹੈ ਕਿ ਉਹ ਆਪਣੇ ਬਿਆਨਾਂ ‘ਤੇ ਕਾਇਮ ਹਨ। ਇਸ ਮਾਮਲੇ ਬਾਰੇ ਸੰਸਦ ਵਿੱਚ ਪੁੱਛੇ ਜਾਣ ‘ਤੇ Barbara Edmonds ਨੇ ਕਿਹਾ ਕਿ ਉਨ੍ਹਾਂ ਨੇ ਖੁਦ ਉਹ ਪੋਸਟਾਂ ਨਹੀਂ ਵੇਖੀਆਂ ਅਤੇ ਨਾ ਹੀ ਉਹ ਇਸ ਬਾਰੇ ਹਿਪਕਿਨਸ ਨਾਲ ਗੱਲ ਕਰ ਸਕੇ ਹਨ।
ਐਡਮੰਡਸ ਦਾ ਕਹਿਣਾ ਹੈ ਕਿ ਪਾਰਟੀ ਦੇ ਸੰਸਦੀ ਮੈਂਬਰਾਂ ਨੂੰ ਹਾਲੇ ਵੀ ਹਿਪਕਿਨਸ ‘ਤੇ ਪੂਰਾ ਭਰੋਸਾ ਹੈ। ਉਨ੍ਹਾਂ ਨੇ ਕਿਹਾ ਕਿ ਵਿਆਹ ਦੇ ਟੁੱਟਣ ਵਾਲੇ ਮਾਮਲੇ ਹਮੇਸ਼ਾਂ ਸੰਵੇਦਨਸ਼ੀਲ ਹੁੰਦੇ ਹਨ, ਖ਼ਾਸ ਕਰਕੇ ਜਦੋਂ ਬੱਚੇ ਵੀ ਹੋਣ। ਉਨ੍ਹਾਂ ਦੇ ਅਨੁਸਾਰ ਨਿੱਜੀ ਵਿਵਾਦਾਂ ਨੂੰ ਰਾਜਨੀਤਿਕ ਮਸਲੇ ਬਣਾਉਣਾ ਠੀਕ ਨਹੀਂ ਅਤੇ ਉਮੀਦ ਹੈ ਕਿ ਨਿਊਜ਼ੀਲੈਂਡ ਦੀ ਰਾਜਨੀਤੀ ਨਿੱਜੀ ਹਮਲਿਆਂ ਵੱਲ ਨਹੀਂ ਵਧੇਗੀ।
ਜਾਣਕਾਰੀ ਮੁਤਾਬਿਕ ਕ੍ਰਿਸ ਹਿਪਕਿਨਸ ਅਤੇ ਜੇਡ ਪਾਲ ਨੇ 2020 ਦੀ ਸ਼ੁਰੂਆਤ ਵਿੱਚ ਵਿਆਹ ਕੀਤਾ ਸੀ, ਪਰ 2022 ਵਿੱਚ ਦੋਵੇਂ ਵੱਖ ਹੋ ਗਏ। ਦੋਹਾਂ ਦੇ ਦੋ ਬੱਚੇ ਹਨ। ਜਨਵਰੀ 2023 ਵਿੱਚ ਹਿਪਕਿਨਸ ਨੇ ਆਪਣੇ ਵੱਖ ਹੋਣ ਦੀ ਪੁਸ਼ਟੀ ਕੀਤੀ ਸੀ, ਉਸੇ ਸਮੇਂ ਉਹ ਨਿਊਜ਼ੀਲੈਂਡ ਦੇ ਪ੍ਰਧਾਨ ਮੰਤਰੀ ਬਣੇ ਸਨ।
ਬਾਅਦ ਵਿੱਚ ਚੋਣ ਨਤੀਜਿਆਂ ਵਾਲੀ ਰਾਤ ਹਿਪਕਿਨਸ ਨੇ ਆਪਣੀ ਨਵੀਂ ਸਾਥੀ Toni Grace ਬਾਰੇ ਵੀ ਖੁਲਾਸਾ ਕੀਤਾ ਸੀ ਅਤੇ ਨਵੰਬਰ ਵਿੱਚ ਉਨ੍ਹਾਂ ਨੂੰ ਵਿਆਹ ਲਈ ਪ੍ਰਪੋਜ਼ ਕੀਤਾ ਸੀ।