ਇਨਵਰਕਾਰਗਿਲ ਤੋਂ ਇੱਕ ਹੋਸ਼ ਉਡਾਉਣ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ, ਜਿੱਥੇ ਇੱਕ ਪੰਜਾਬੀ ਨੌਜਵਾਨ ਨੇ ਪੁਲਿਸ ਤੋਂ ਬਚਣ ਦੀ ਕੋਸ਼ਿਸ਼ ਕਰਦੇ ਹੋਏ ਰਿਹਾਇਸ਼ੀ ਇਲਾਕਿਆਂ ਵਿੱਚ ਬਹੁਤ ਤੇਜ਼ ਰਫ਼ਤਾਰ ਨਾਲ ਕਾਰ ਚਲਾਈ। ਦੱਸਿਆ ਜਾ ਰਿਹਾ ਹੈ ਕਿ ਕਾਰ ਦੀ ਰਫ਼ਤਾਰ ਕਰੀਬ 125 ਕਿਲੋਮੀਟਰ ਪ੍ਰਤੀ ਘੰਟਾ ਸੀ ਅਤੇ ਹੈਰਾਨੀ ਦੀ ਗੱਲ ਇਹ ਹੈ ਕਿ ਉਸ ਸਮੇਂ ਕਾਰ ਵਿੱਚ ਉਸ ਦੀ ਇੱਕ ਸਾਲ ਦੀ ਧੀ ਵੀ ਮੌਜੂਦ ਸੀ।
30 ਸਾਲਾ Jasmeet Dhaliwal ਨੇ ਇਨਵਰਕਾਰਗਿਲ ਡਿਸਟ੍ਰਿਕਟ ਕੋਰਟ ਵਿੱਚ ਆਡੀਓ-ਵਿਜ਼ੂਅਲ ਲਿੰਕ ਰਾਹੀਂ ਪੇਸ਼ ਹੋ ਕੇ ਕਈ ਦੋਸ਼ਾਂ ਨੂੰ ਮੰਨ ਲਿਆ ਸੀ। ਉਸ ‘ਤੇ ਬੱਚੇ ਨਾਲ ਲਾਪਰਵਾਹੀ, ਪੁਲਿਸ ਹਿਰਾਸਤ ਤੋਂ ਭੱਜਣਾ, ਖਤਰਨਾਕ ਅਤੇ ਲਾਪਰਵਾਹ ਡਰਾਈਵਿੰਗ, ਇਨਫੋਰਸਮੈਂਟ ਅਧਿਕਾਰੀ ਦੇ ਸੰਕੇਤ ਦੇ ਬਾਵਜੂਦ ਨਾ ਰੁਕਣਾ (ਤੀਜੀ ਜਾਂ ਇਸ ਤੋਂ ਵੱਧ ਵਾਰ), ਜ਼ਮਾਨਤ ਦੀ ਉਲੰਘਣਾ ਅਤੇ ਬਿਨਾਂ ਲਾਇਸੈਂਸ ਡਰਾਈਵ ਕਰਨ ਦੇ ਦੋਸ਼ ਲੱਗੇ ਹਨ।
ਅਦਾਲਤ ਨੂੰ ਦੱਸਿਆ ਗਿਆ ਕਿ ਪੁਲਿਸ ਤੋਂ ਭੱਜਦੇ ਸਮੇਂ ਉਹ ਰਿਹਾਇਸ਼ੀ ਸੜਕਾਂ ‘ਤੇ ਬੇਹੱਦ ਤੇਜ਼ੀ ਨਾਲ ਕਾਰ ਦੌੜਾ ਰਿਹਾ ਸੀ ਅਤੇ ਇੱਕ ਸਮੇਂ ਤੇਜ਼ ਰਫ਼ਤਾਰ ਕਾਰਨ ਵਾਹਨ ਸੜਕ ਤੋਂ ਉੱਛਲ ਵੀ ਗਿਆ। ਇਸ ਦੌਰਾਨ ਕਾਰ ਵਿੱਚ ਮੌਜੂਦ ਬੱਚੀ ਦੀ ਜਾਨ ਨੂੰ ਵੀ ਗੰਭੀਰ ਖਤਰਾ ਬਣ ਗਿਆ ਸੀ।
ਪੁਲਿਸ ਦੇ ਅਨੁਸਾਰ, ਇਸ ਤੋਂ ਪਹਿਲਾਂ ਵੀ ਉਹ ਹੋਰ ਮਾਮਲਿਆਂ ਵਿੱਚ ਜ਼ਮਾਨਤ ‘ਤੇ ਸੀ। ਜਨਵਰੀ ਵਿੱਚ Manukau District Court ਵਿੱਚ ਹੋਣ ਵਾਲੀ ਸੁਣਵਾਈ ‘ਤੇ ਹਾਜ਼ਰ ਨਾ ਹੋਣ ਕਾਰਨ ਉਸ ਦੇ ਖਿਲਾਫ਼ ਗ੍ਰਿਫ਼ਤਾਰੀ ਵਾਰੰਟ ਵੀ ਜਾਰੀ ਕੀਤਾ ਗਿਆ ਸੀ। ਅਦਾਲਤ ਵੱਲੋਂ ਇਸ ਮਾਮਲੇ ਵਿੱਚ ਅਗਲੀ ਸੁਣਵਾਈ ਦੌਰਾਨ ਸਜ਼ਾ ਬਾਰੇ ਫੈਸਲਾ ਸੁਣਾਇਆ ਜਾ ਸਕਦਾ ਹੈ।