ਨਿਊਜ਼ੀਲੈਂਡ ਦੇ ਵੈਲਿੰਗਟਨ ਸ਼ਹਿਰ ਵਿੱਚ ਪਬਲਿਕ ਟਰਾਂਸਪੋਰਟ ਪ੍ਰਣਾਲੀ ‘ਤੇ ਡੀਜ਼ਲ ਦੀਆਂ ਵੱਧਦੀਆਂ ਕੀਮਤਾਂ ਦਾ ਵੱਡਾ ਅਸਰ ਪੈ ਰਿਹਾ ਹੈ। Metlink ਨੇ ਚਿਤਾਵਨੀ ਦਿੱਤੀ ਹੈ ਕਿ ਜੇ ਹਾਲਾਤ ਨਹੀਂ ਸੁਧਰੇ ਤਾਂ ਯਾਤਰੀਆਂ ਨੂੰ ਮਹਿੰਗੇ ਕਿਰਾਏ ਜਾਂ ਕੁਝ ਸੇਵਾਵਾਂ ਵਿੱਚ ਕਟੌਤੀ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ। Greater Wellington Regional Council ਦੇ ਚੇਅਰਮੈਨ Daran Ponter ਨੇ ਦੱਸਿਆ ਕਿ ਵੱਧਦੀਆਂ ਡੀਜ਼ਲ ਕੀਮਤਾਂ ਕਾਰਨ ਹਰ ਹਫ਼ਤੇ ਲਗਭਗ 130,000 ਡਾਲਰ ਦਾ ਵਾਧੂ ਖਰਚਾ ਆ ਰਿਹਾ ਹੈ। ਉਨ੍ਹਾਂ ਨੇ ਇਸ ਸਬੰਧੀ ਵਿੱਤ, ਟਰਾਂਸਪੋਰਟ ਅਤੇ ਊਰਜਾ ਮੰਤਰੀਆਂ ਨੂੰ ਚਿੱਠੀ ਲਿਖ ਕੇ ਸਰਕਾਰ ਤੋਂ ਮਦਦ ਦੀ ਮੰਗ ਕੀਤੀ ਹੈ।
ਪੋਂਟਰ ਨੇ ਸਰਕਾਰ ਨੂੰ ਸੁਝਾਅ ਦਿੱਤਾ ਹੈ ਕਿ ਲੋਕਾਂ ਨੂੰ ਪਬਲਿਕ ਟਰਾਂਸਪੋਰਟ ਵੱਲ ਆਕਰਸ਼ਿਤ ਕਰਨ ਲਈ ਕਿਰਾਏ ‘ਚ ਛੂਟ ਦਿੱਤੀ ਜਾਵੇ, ਖਾਸ ਕਰਕੇ ਟਾਰਗੇਟਡ ਡਿਸਕਾਊਂਟ ਲਾਗੂ ਕੀਤੇ ਜਾਣ। ਉਨ੍ਹਾਂ ਨੇ ਇਹ ਵੀ ਕਿਹਾ ਕਿ ਸਰਕਾਰੀ ਕਰਮਚਾਰੀਆਂ ਨੂੰ ਪੀਕ ਟਾਈਮ ਤੋਂ ਇਲਾਵਾ ਯਾਤਰਾ ਕਰਨ ਲਈ ਪ੍ਰੋਤਸਾਹਿਤ ਕੀਤਾ ਜਾਵੇ। ਉਨ੍ਹਾਂ ਨੇ ਦੱਸਿਆ ਕਿ ਕੌਂਸਲ ਵੱਲੋਂ ਕਿਰਾਏ ਵਧਾਉਣ ਤੋਂ ਬਚਣ ਲਈ ਕਰਜ਼ਾ ਲੈਣ ਵਰਗੇ ਕਦਮ ਵੀ ਸੋਚੇ ਜਾ ਰਹੇ ਹਨ, ਤਾਂ ਜੋ ਖਰਚੇ ਨੂੰ ਲੰਬੇ ਸਮੇਂ ਵਿੱਚ ਵੰਡਿਆ ਜਾ ਸਕੇ। ਪਰ ਜੇ ਹਾਲਾਤ ਅਜਿਹੇ ਹੀ ਰਹੇ ਤਾਂ ਘੱਟ ਯਾਤਰੀਆਂ ਵਾਲੀਆਂ ਰੂਟਾਂ ‘ਤੇ ਸੇਵਾਵਾਂ ਘਟਾਉਣ ਦੀ ਵੀ ਸੰਭਾਵਨਾ ਹੈ।
ਇਸਦੇ ਨਾਲ ਹੀ 15 ਮਈ ਤੋਂ ਬੱਸ ਅਤੇ ਰੇਲ ਕਿਰਾਏ ਵਿੱਚ ਪਹਿਲਾਂ ਹੀ 3.1 ਫੀਸਦੀ ਵਾਧਾ ਹੋਣਾ ਤੈਅ ਹੈ, ਜਦਕਿ ਕੁਝ ਸੇਵਾਵਾਂ 1 ਜੁਲਾਈ ਤੋਂ ਘਟਾਈਆਂ ਵੀ ਜਾ ਸਕਦੀਆਂ ਹਨ।
Local Government New Zealand ਦੀ ਪ੍ਰਧਾਨ Rehette Stoltz ਨੇ ਵੀ ਕਿਹਾ ਕਿ ਡੀਜ਼ਲ ਦੀਆਂ ਕੀਮਤਾਂ ਸਾਰੇ ਦੇਸ਼ ਦੀਆਂ ਕੌਂਸਲਾਂ ਲਈ ਵੱਡੀ ਚਿੰਤਾ ਬਣ ਚੁੱਕੀਆਂ ਹਨ। ਉਨ੍ਹਾਂ ਮੁਤਾਬਕ ਆਕਲੈਂਡ, ਕ੍ਰਾਇਸਟਚਰਚ ਅਤੇ ਵੈਲਿੰਗਟਨ ਵਰਗੇ ਸ਼ਹਿਰਾਂ ਵਿੱਚ ਵੱਡੇ ਪਬਲਿਕ ਟਰਾਂਸਪੋਰਟ ਨੈੱਟਵਰਕ ਕਾਰਨ ਖਰਚੇ ਕਾਫੀ ਵੱਧ ਰਹੇ ਹਨ।
ਹਾਲਾਂਕਿ ਕੁਝ ਖੇਤਰਾਂ ਵਿੱਚ ਹਾਲੇ ਤੱਕ ਇਸਦਾ ਵੱਡਾ ਅਸਰ ਨਹੀਂ ਵੇਖਿਆ ਗਿਆ, ਪਰ ਮਾਹਿਰਾਂ ਦਾ ਮੰਨਣਾ ਹੈ ਕਿ ਜਲਦੀ ਹੀ ਇਹ ਮੁੱਦਾ ਹਰ ਜਗ੍ਹਾ ਉੱਠ ਸਕਦਾ ਹੈ। ਸਰਕਾਰ ਵੱਲੋਂ ਇਸ ਮਾਮਲੇ ‘ਤੇ ਅਜੇ ਤੱਕ ਕੋਈ ਅਧਿਕਾਰਕ ਪ੍ਰਤੀਕਿਰਿਆ ਨਹੀਂ ਆਈ ਹੈ।