ਉੱਤਰੀ ਵੈਲਿੰਗਟਨ ਵਿੱਚ ਅੱਜ ਸਵੇਰੇ ਇੱਕ ਕਾਰ ਦੇ ਖੱਡ ਵਿੱਚ ਡਿੱਗ ਕੇ ਰੇਲ ਪਟੜੀ ਉੱਤੇ ਆ ਜਾਣ ਕਾਰਨ ਕੁਝ ਕਮਿਊਟਰ ਰੇਲ ਸੇਵਾਵਾਂ ਪ੍ਰਭਾਵਿਤ ਰਹੀਆਂ। ਪੁਲਿਸ ਮੁਤਾਬਿਕ ਉਹਨਾਂ ਨੂੰ ਬੁੱਧਵਾਰ ਸਵੇਰੇ ਕਰੀਬ 8:50 ਵਜੇ ਗਲੈਂਸਾਈਡ ਦੇ ਮਿਡਲਟਨ ਰੋਡ ‘ਤੇ ਘਟਨਾ ਸਥਾਨ ‘ਤੇ ਬੁਲਾਇਆ ਗਿਆ ਸੀ। ਪੁਲਿਸ ਨੇ ਕਿਹਾ, “ਇੱਕ ਇਕੱਲੀ ਕਾਰ ਖੱਡ ਵਿੱਚ ਡਿੱਗ ਕੇ ਰੇਲ ਪਟੜੀਆਂ ਉੱਤੇ ਆ ਗਈ ਸੀ।”
ਵੈਲਿੰਗਟਨ ਫ੍ਰੀ ਐਂਬੂਲੈਂਸ ਦੇ ਅਨੁਸਾਰ, ਇੱਕ ਜਖਮੀ ਵਿਅਕਤੀ ਨੂੰ ਦਰਮਿਆਨੀ ਹਾਲਤ ਵਿੱਚ ਵੈਲਿੰਗਟਨ ਹਸਪਤਾਲ ਲਿਜਾਇਆ ਗਿਆ ਸੀ। ਮੈਟਲਿੰਕ ਨੇ ਦੱਸਿਆ ਕਿ ਵੈਲਿੰਗਟਨ ਅਤੇ ਪੋਰਿਰੂਆ ਦਰਮਿਆਨ ਕਾਪੀਟੀ ਲਾਈਨ ਦੀਆਂ ਸੇਵਾਵਾਂ ਰੱਦ ਕਰ ਦਿੱਤੀਆਂ ਗਈਆਂ ਸਨ, ਪਰ ਕਰੀਬ 11 ਵਜੇ ਮੁੜ ਚਾਲੂ ਹੋ ਗਈਆਂ। ਪੁਲਿਸ ਨੇ ਕਿਹਾ ਕਿ ਵਾਹਨ ਨੂੰ ਹਟਾਉਣ ਲਈ ਟੋ ਵੈਨ ਬੁਲਾਈ ਗਈ ਸੀ।