Auckland ‘ਚ ਭਾਰਤੀ ਮੂਲ ਦੇ ਵਿਅਕਤੀ Davinder Rahal ਨੂੰ ਨਿਊਜ਼ੀਲੈਂਡ ਹਾਈ ਕੋਰਟ ਵੱਲੋਂ 8.25 ਲੱਖ ਡਾਲਰ ਤੋਂ ਵੱਧ ਹਰਜਾਨਾ ਭਰਨ ਦੇ ਹੁਕਮ ਜਾਰੀ ਕੀਤੇ ਗਏ ਹਨ।ਇਹ ਮਾਮਲਾ ਇੱਕ “Leaky Home” ਜਾਇਦਾਦ ਦੀ ਵਿਕਰੀ ਨਾਲ ਜੁੜਿਆ ਹੋਇਆ ਹੈ, ਜਿਸ ਵਿੱਚ ਖਰੀਦਦਾਰਾਂ ਨੂੰ ਘਰ ਦੀ ਅਸਲ ਹਾਲਤ ਬਾਰੇ ਗਲਤ ਜਾਣਕਾਰੀ ਦੇਣ ਦੇ ਦੋਸ਼ ਲੱਗੇ ਸਨ। ਅਦਾਲਤ ‘ਚ ਸੁਣਵਾਈ ਦੌਰਾਨ ਸਾਹਮਣੇ ਆਇਆ ਕਿ ਖਰੀਦਦਾਰ ਜੋੜੇ ਨੇ ਇਹ ਘਰ ਇਸ ਭਰੋਸੇ ‘ਤੇ ਖਰੀਦਿਆ ਸੀ ਕਿ ਜਾਇਦਾਦ ਵਿੱਚ ਕੋਈ ਵੱਡੀ ਤਕਨੀਕੀ ਜਾਂ ਢਾਂਚਾਗਤ ਖਾਮੀ ਨਹੀਂ। ਪਰ ਘਰ ਵਿੱਚ ਰਹਿਣ ਮਗਰੋਂ ਉਨ੍ਹਾਂ ਨੂੰ ਨਮੀ, ਫਫੂੰਦ ਅਤੇ weather-tightness ਨਾਲ ਸੰਬੰਧਿਤ ਗੰਭੀਰ ਸਮੱਸਿਆਵਾਂ ਦਾ ਪਤਾ ਲੱਗਾ। ਇਨ੍ਹਾਂ ਖਾਮੀਆਂ ਨੂੰ ਠੀਕ ਕਰਨ ਲਈ ਉਨ੍ਹਾਂ ਨੂੰ ਲੱਖਾਂ ਡਾਲਰ ਖਰਚਣੇ ਪਏ।
ਖਰੀਦਦਾਰਾਂ ਨੇ ਅਦਾਲਤ ਨੂੰ ਦੱਸਿਆ ਕਿ ਜੇਕਰ ਘਰ ਦੀ ਅਸਲੀ ਹਾਲਤ ਬਾਰੇ ਪਹਿਲਾਂ ਜਾਣਕਾਰੀ ਮਿਲ ਜਾਂਦੀ ਤਾਂ ਉਹ ਕਦੇ ਵੀ ਇਹ ਜਾਇਦਾਦ ਨਾ ਖਰੀਦਦੇ। ਹਾਈ ਕੋਰਟ ਨੇ ਸਬੂਤਾਂ ਦੇ ਆਧਾਰ ‘ਤੇ ਖਰੀਦਦਾਰਾਂ ਦੇ ਹੱਕ ਵਿੱਚ ਫੈਸਲਾ ਸੁਣਾਇਆ ਅਤੇ ਮੁਰੰਮਤ, ਨੁਕਸਾਨ ਅਤੇ ਹੋਰ ਖਰਚਿਆਂ ਸਮੇਤ ਕਰੀਬ $825,000 ਦੇ ਹਰਜਾਨੇ ਦੇ ਹੁਕਮ ਦਿੱਤੇ।
ਇਹ ਮਾਮਲਾ ਨਿਊਜ਼ੀਲੈਂਡ ਵਿੱਚ ਕਾਫ਼ੀ ਸਮੇਂ ਤੋਂ ਚੱਲ ਰਹੇ “Leaky Homes Crisis” ਨੂੰ ਇਕ ਵਾਰ ਫਿਰ ਚਰਚਾ ਵਿੱਚ ਲੈ ਆਇਆ ਹੈ। ਖ਼ਾਸ ਕਰਕੇ 1990 ਦੇ ਅੰਤ ਅਤੇ 2000 ਦੇ ਸ਼ੁਰੂ ਵਿੱਚ ਬਣੇ ਹਜ਼ਾਰਾਂ ਘਰ ਨਮੀ ਅਤੇ ਢਾਂਚਾਗਤ ਖਾਮੀਆਂ ਕਾਰਨ ਪ੍ਰਭਾਵਿਤ ਹੋਏ ਸਨ।
ਕਾਨੂੰਨੀ ਮਾਹਿਰਾਂ ਦੇ ਅਨੁਸਾਰ ਇਹ ਫੈਸਲਾ ਜਾਇਦਾਦ ਵੇਚਣ ਸਮੇਂ ਪੂਰੀ ਅਤੇ ਸਹੀ ਜਾਣਕਾਰੀ ਸਾਂਝੀ ਕਰਨ ਦੀ ਜ਼ਿੰਮੇਵਾਰੀ ਨੂੰ ਹੋਰ ਮਜ਼ਬੂਤ ਕਰਦਾ ਹੈ। ਉਨ੍ਹਾਂ ਕਿਹਾ ਕਿ ਜੇ ਕੋਈ ਵਿਕਰੇਤਾ ਜਾਣਬੁੱਝ ਕੇ ਮਹੱਤਵਪੂਰਨ ਖਾਮੀਆਂ ਲੁਕਾਉਂਦਾ ਹੈ ਤਾਂ ਉਸਨੂੰ ਭਾਰੀ ਆਰਥਿਕ ਅਤੇ ਕਾਨੂੰਨੀ ਨਤੀਜੇ ਭੁਗਤਣੇ ਪੈ ਸਕਦੇ ਹਨ।