ਨਿਊਜ਼ੀਲੈਂਡ ਵਿੱਚ ਆਪਣੀ 5 ਸਾਲਾ ਧੀ ਦੇ ਕਤਲ ਦੇ ਦੋਸ਼ਾਂ ਦਾ ਸਾਹਮਣਾ ਕਰ ਰਹੇ ਭਾਰਤੀ ਮੂਲ ਦੇ Mukesh Prashad ਖ਼ਿਲਾਫ਼ ਚੱਲ ਰਿਹਾ ਮਰਡਰ ਟ੍ਰਾਇਲ ਅਚਾਨਕ ਰੱਦ ਕਰ ਦਿੱਤਾ ਗਿਆ ਹੈ। ਅਦਾਲਤ ਵਿੱਚ ਜੂਰੀ ਦੀ ਚੋਣ ਹੋਣ ਤੋਂ ਬਾਅਦ ਮਾਮਲੇ ਦੀ ਸੁਣਵਾਈ ਵੀ ਸ਼ੁਰੂ ਹੋ ਚੁੱਕੀ ਸੀ, ਪਰ ਬੁੱਧਵਾਰ ਨੂੰ ਜਸਟਿਸ Pheroze Jagose ਨੇ ਟ੍ਰਾਇਲ ਰੱਦ ਕਰਨ ਦੇ ਹੁਕਮ ਜਾਰੀ ਕਰ ਦਿੱਤੇ। ਅਦਾਲਤ ਵੱਲੋਂ ਟ੍ਰਾਇਲ ਰੱਦ ਕਰਨ ਦੇ ਕਾਰਨਾਂ ਨੂੰ ਜਨਤਕ ਕਰਨ ‘ਤੇ ਰੋਕ ਲਗਾਈ ਗਈ ਹੈ।
ਦੱਸਣਯੋਗ ਹੈ ਕਿ Mukesh Prashad ਨੂੰ ਜਨਵਰੀ 2025 ਵਿੱਚ ਉਸ ਵੇਲੇ ਗ੍ਰਿਫ਼ਤਾਰ ਕੀਤਾ ਗਿਆ ਸੀ ਜਦੋਂ ਉਹ ਆਪਣੀ 5 ਸਾਲਾ ਧੀ Tulsi Amola ਦੀ ਲਾਸ਼ ਕਾਰ ਦੀ ਡਿੱਗੀ ਵਿੱਚ ਰੱਖ ਕੇ Manukau Police Station ਪਹੁੰਚਿਆ ਸੀ। ਅਦਾਲਤ ਵਿੱਚ ਮੁਕੇਸ਼ ਪ੍ਰਸ਼ਾਦ ਨੇ ਮੰਨਿਆ ਸੀ ਕਿ ਉਸ ਨੇ ਆਪਣੀ ਧੀ ਨੂੰ ਮਾਰਿਆ, ਪਰ ਬਚਾਅ ਪੱਖ ਦੇ ਵਕੀਲਾਂ ਨੇ ਦਲੀਲ ਦਿੱਤੀ ਕਿ ਘਟਨਾ ਸਮੇਂ ਉਹ ਮਾਨਸਿਕ ਬਿਮਾਰੀ ਨਾਲ ਪੀੜਤ ਸੀ। ਵਕੀਲਾਂ ਮੁਤਾਬਿਕ ਉਸ ਨੂੰ “insanity defence” ਹਾਸਿਲ ਹੈ, ਜਿਸ ਤਹਿਤ ਉਸ ਨੇ “not guilty by reason of insanity” ਦੀ ਦਲੀਲ ਦਿੱਤੀ। ਹੁਣ ਇਸ ਮਾਮਲੇ ਦੀ ਅਗਲੀ ਸੁਣਵਾਈ ਲਈ ਨਵੀਂ ਟ੍ਰਾਇਲ ਤਾਰੀਖ ਇਸ ਮਹੀਨੇ ਦੇ ਅੰਤ ਤੱਕ ਤੈਅ ਕੀਤੇ ਜਾਣ ਦੀ ਸੰਭਾਵਨਾ ਹੈ।