ਨਿਊਜ਼ੀਲੈਂਡ ਦੇ ਵਾਈਕਾਟੋ ਖੇਤਰ ਵਿੱਚ ਇੱਕ ਦਰਦਨਾਕ ਹਾਦਸੇ ਦੌਰਾਨ ਭਾਰਤੀ ਮੂਲ ਦੇ 33 ਸਾਲਾ ਪਰਦੀਪ ਸਿੰਘ ਦੀ ਮੌਤ ਹੋ ਗਈ। ਇਹ ਘਟਨਾ ਕੈਂਬ੍ਰਿਜ ਦੇ Racecourse Road ਇਲਾਕੇ ਵਿੱਚ ਉਸ ਵੇਲੇ ਵਾਪਰੀ ਜਦੋਂ ਉਹ ਆਪਣੇ ਸਾਥੀਆਂ ਨਾਲ ਲਾਨ ਦੀ ਸਫਾਈ ਅਤੇ ਦਰੱਖਤਾਂ ਦੀਆਂ ਟਾਹਣੀਆਂ ਕੱਟਣ ਦਾ ਕੰਮ ਕਰ ਰਹੇ ਸਨ। ਮਿਲੀ ਜਾਣਕਾਰੀ ਅਨੁਸਾਰ, ਪਰਦੀਪ ਨੇ ਦੁਪਹਿਰ ਦਾ ਖਾਣਾ ਖਾਣ ਤੋਂ ਬਾਅਦ ਆਪਣੀ ਪਤਨੀ ਕਮਲ ਨੂੰ ਕਿਹਾ ਸੀ ਕਿ ਉਹ ਕਰੀਬ 3:30 ਵਜੇ ਤੱਕ ਕੰਮ ਖਤਮ ਕਰਕੇ ਘਰ ਵਾਪਸ ਆ ਜਾਵੇਗਾ। ਪਰ ਕੁਝ ਸਮੇਂ ਬਾਅਦ ਉਸਦੇ ਦੋਸਤਾਂ ਨੇ ਅਚਾਨਕ ਉਸਦੀ ਚੀਕ ਸੁਣੀ।
ਸ਼ੁਰੂਆਤੀ ਜਾਣਕਾਰੀ ਮੁਤਾਬਕ ਸ਼ੱਕ ਜਤਾਇਆ ਜਾ ਰਿਹਾ ਹੈ ਕਿ ਦਰੱਖਤ ਦੀ ਟਾਹਣੀ ਵਾਪਸ ਉੱਛਲ ਕੇ ਉਸਦੇ ਸਿਰ ’ਤੇ ਲੱਗੀ ਜਾਂ ਮਸ਼ੀਨ ਦੇ ਝਟਕੇ ਕਾਰਨ ਉਹ ਪਿੱਛੇ ਡਿੱਗ ਗਿਆ, ਜਿਸ ਨਾਲ ਸਿਰ ’ਤੇ ਗੰਭੀਰ ਸੱਟ ਲੱਗੀ। ਦੋਸਤਾਂ ਨੇ ਤੁਰੰਤ ਐਂਬੂਲੈਂਸ ਅਤੇ ਪੁਲਿਸ ਨੂੰ ਸੂਚਿਤ ਕੀਤਾ, ਪਰ ਕੁਝ ਹੀ ਮਿੰਟਾਂ ਵਿੱਚ ਪਰਦੀਪ ਦੀ ਮੌਤ ਹੋ ਗਈ। ਦੋਸਤਾਂ ਨੇ ਦੱਸਿਆ ਕਿ ਉਸਦੇ ਸਰੀਰ ’ਤੇ ਬਾਹਰੀ ਸੱਟਾਂ ਜ਼ਿਆਦਾ ਨਹੀਂ ਸਨ, ਪਰ ਅੱਖ ਬੁਰੀ ਤਰ੍ਹਾਂ ਸੁੱਜੀ ਹੋਈ ਸੀ ਅਤੇ ਕੰਨਾਂ ਤੇ ਮੂੰਹ ਵਿੱਚੋਂ ਖੂਨ ਨਿਕਲ ਰਿਹਾ ਸੀ।
ਵਾਈਕਾਟੋ ਪੁਲਿਸ ਦੀ Senior Sergeant Mary van Dongen ਨੇ ਕਿਹਾ ਕਿ ਪੁਲਿਸ ਨੂੰ ਦੁਪਹਿਰ ਕਰੀਬ 3:15 ਵਜੇ ਐਂਬੂਲੈਂਸ ਦੀ ਮਦਦ ਲਈ ਬੁਲਾਇਆ ਗਿਆ ਸੀ। ਮਾਮਲੇ ਦੀ ਜਾਂਚ ਜਾਰੀ ਹੈ ਅਤੇ ਕੇਸ ਕੋਰੋਨਰ ਕੋਲ ਭੇਜ ਦਿੱਤਾ ਗਿਆ ਹੈ। ਪਰਦੀਪ ਸਿੰਘ 2023 ਵਿੱਚ ਰਾਜਸਥਾਨ ਦੇ ਗੰਗਾਨਗਰ ਤੋਂ ਨਿਊਜ਼ੀਲੈਂਡ ਆਏ ਸਨ ਅਤੇ ਇੱਕ horticulture ਕੰਪਨੀ ਵਿੱਚ operations manager ਵਜੋਂ ਕੰਮ ਕਰ ਰਹੇ ਸਨ। ਉਸਦੀ ਪਤਨੀ ਕਮਲ ਪਿਛਲੇ ਸਾਲ partnership visa ’ਤੇ ਨਿਊਜ਼ੀਲੈਂਡ ਪਹੁੰਚੀ ਸੀ।
ਪਰਿਵਾਰਕ ਦੋਸਤਾਂ ਅਨੁਸਾਰ, ਕਮਲ ਇਸ ਘਟਨਾ ਤੋਂ ਬਾਅਦ ਗਹਿਰੇ ਸਦਮੇ ਵਿੱਚ ਹੈ। ਪਰਦੀਪ ਆਪਣੇ ਪਰਿਵਾਰ ਦਾ ਇਕੱਲਾ ਕਮਾਉਣ ਵਾਲਾ ਸੀ। ਭਾਰਤ ਵਿੱਚ ਉਸਦੀ ਮਾਤਾ ਗੰਭੀਰ ਬਿਮਾਰੀਆਂ ਨਾਲ ਜੂਝ ਰਹੀ ਹੈ, ਜਦਕਿ ਪਿਤਾ ਬਜ਼ੁਰਗ ਹਨ। ਹੁਣ ਦੋਸਤ ਅਤੇ ਜਾਣ-ਪਛਾਣ ਵਾਲੇ ਪਰਦੀਪ ਦੀ ਦੇਹ ਭਾਰਤ ਭੇਜਣ ਅਤੇ ਪਰਿਵਾਰ ਦੀ ਆਰਥਿਕ ਮਦਦ ਲਈ ਫੰਡ ਇਕੱਠੇ ਕਰ ਰਹੇ ਹਨ।
https://givealittle.co.nz/cause/help-kamal-take-deep-home-to-india?fbclid=IwZnRzaAR6-adleHRuA2FlbQIxMQBzcnRjBmFwcF9pZAo2NjI4NTY4Mzc5AAEedWXE5IFKGVU0Dbcn2duRiYKy_gIvmToP99HxPV3Jkv8WbM8ZQ5qbOniEH-s_aem_rkL1meIhC_ANgigPVAGpYQ