ਨਿਊਜ਼ੀਲੈਂਡ ਦੀ 23 ਸਾਲਾ ਵਿਦਿਆਰਥਣ ਜੈੱਸ ਜੈਂਕਿਨਜ਼ ਨੇ ਹਾਰਵਰਡ ਯੂਨੀਵਰਸਿਟੀ ਵਿੱਚ ਆਪਣੀ ਖੋਜ ਦੇ ਜ਼ਰੀਏ ਵੱਡੀ ਉਪਲਬਧੀ ਹਾਸਿਲ ਕੀਤੀ ਹੈ। ਹਾਰਵਰਡ ਵੱਲੋਂ ਉਸਨੂੰ ਯੂਨੀਵਰਸਿਟੀ ਦੇ ਸਭ ਤੋਂ ਮਾਣਯੋਗ ਸਨਮਾਨਾਂ ਵਿੱਚੋਂ ਇੱਕ Captain Jonathan Fay Prize ਨਾਲ ਸਨਮਾਨਿਤ ਕੀਤਾ ਗਿਆ ਹੈ। Ngāti Kahungunu ki Tāmaki nui-a-Rua ਨਾਲ ਸਬੰਧਿਤ ਜੈੱਸ 2020 ਤੋਂ ਹਾਰਵਰਡ ਵਿੱਚ ਪੜ੍ਹ ਰਹੀ ਹੈ ਅਤੇ ਹੁਣ ਆਪਣੀ ਪੜ੍ਹਾਈ ਪੂਰੀ ਕਰਨ ਵਾਲੀ ਹੈ। ਗ੍ਰੈਜੂਏਸ਼ਨ ਤੋਂ ਪਹਿਲਾਂ ਮਿਲੇ ਇਸ ਅਵਾਰਡ ਨੇ ਉਸਦੀ ਅਕਾਦਮਿਕ ਯੋਗਤਾ ਨੂੰ ਵਿਸ਼ਵ ਪੱਧਰ ‘ਤੇ ਖਾਸ ਪਛਾਣ ਦਿੱਤੀ ਹੈ।
ਹਾਰਵਰਡ ਰੈਡਕਲਿਫ ਇੰਸਟੀਚਿਊਟ ਮੁਤਾਬਿਕ ਇਸ ਸਾਲ 71 ਸੀਨੀਅਰ ਵਿਦਿਆਰਥੀਆਂ ਵਿੱਚੋਂ ਕੇਵਲ ਚਾਰ ਨੂੰ Fay Prize ਲਈ ਚੁਣਿਆ ਗਿਆ ਸੀ। ਇਹ ਸਾਰੇ ਵਿਦਿਆਰਥੀ ਪਹਿਲਾਂ ਹੀ Thomas Temple Hoopes Prize ਜਿੱਤ ਚੁੱਕੇ ਸਨ, ਜੋ ਸ਼ਾਨਦਾਰ ਅੰਡਰਗ੍ਰੈਜੂਏਟ ਖੋਜ ਲਈ ਦਿੱਤਾ ਜਾਂਦਾ ਹੈ।
ਜੈੱਸ ਨੇ ਦੱਸਿਆ ਕਿ ਪਹਿਲਾਂ Hoopes Prize ਮਿਲਣਾ ਹੀ ਉਸ ਲਈ ਸੁਪਨੇ ਵਰਗਾ ਸੀ, ਪਰ ਕੁਝ ਦਿਨਾਂ ਬਾਅਦ ਜਦੋਂ ਉਸਨੂੰ Fay Prize ਬਾਰੇ ਪਤਾ ਲੱਗਾ ਤਾਂ ਉਹ ਹੈਰਾਨ ਰਹਿ ਗਈ। ਉਸਨੇ ਕਿਹਾ ਕਿ ਪਹਿਲਾਂ ਉਸਨੇ ਇੰਟਰਨੈੱਟ ‘ਤੇ ਇਸ ਬਾਰੇ ਖੋਜ ਕੀਤੀ ਅਤੇ ਫਿਰ ਸਮਝ ਆਇਆ ਕਿ ਇਹ ਕਿੰਨਾ ਵੱਡਾ ਸਨਮਾਨ ਹੈ।
ਨਿਊਜ਼ੀਲੈਂਡ ਵਿੱਚ ਮੌਕਿਆਂ ਅਤੇ ਆਮਦਨ ‘ਤੇ ਕੀਤੀ ਖੋਜ
ਪੋਰੀਰੂਆ ਦੇ Titahi Bay ਦੀ ਰਹਿਣ ਵਾਲੀ ਜੈੱਸ ਨੇ ਆਪਣਾ ਥੀਸਿਸ “Colonial Land Expropriation and the Modern Geography of Opportunity in Aotearoa New Zealand” ਵਿਸ਼ੇ ‘ਤੇ ਲਿਖਿਆ।
ਉਸਦੀ ਖੋਜ ਇਸ ਗੱਲ ‘ਤੇ ਕੇਂਦਰਿਤ ਸੀ ਕਿ ਬਚਪਨ ਕਿਸ ਖੇਤਰ ਵਿੱਚ ਬੀਤਦਾ ਹੈ, ਇਸਦਾ ਭਵਿੱਖੀ ਮੌਕਿਆਂ ਅਤੇ ਆਮਦਨ ‘ਤੇ ਕਿੰਨਾ ਅਸਰ ਪੈਂਦਾ ਹੈ। ਉਸਨੇ ਪਹਿਲੀ ਵਾਰ ਨਿਊਜ਼ੀਲੈਂਡ ਵਿੱਚ ਉਪਨਗਰ ਪੱਧਰ ‘ਤੇ ਪੀੜ੍ਹੀ ਦਰ ਪੀੜ੍ਹੀ ਆਮਦਨ ਗਤੀਸ਼ੀਲਤਾ ਨਾਲ ਜੁੜੇ ਅੰਕੜੇ ਤਿਆਰ ਕੀਤੇ। ਅਧਿਐਨ ਵਿੱਚ ਸਾਹਮਣੇ ਆਇਆ ਕਿ ਦੇਸ਼ ਦੇ ਵੱਖ-ਵੱਖ ਇਲਾਕਿਆਂ ਵਿੱਚ ਮੌਕਿਆਂ ਦੀ ਉਪਲਬਧਤਾ ਵਿੱਚ ਵੱਡਾ ਅੰਤਰ ਹੈ ਅਤੇ ਮਾਓਰੀ ਅਤੇ ਪਾਕੇਹਾ ਭਾਈਚਾਰਿਆਂ ਵਿਚਕਾਰ ਆਰਥਿਕ ਅਸਮਾਨਤਾ ਅਜੇ ਵੀ ਮੌਜੂਦ ਹੈ।
ਗ੍ਰੈਜੂਏਸ਼ਨ ਤੋਂ ਬਾਅਦ ਨਿਊਯਾਰਕ ਵਿੱਚ ਕਰੇਗੀ ਕੰਮ
ਜੈੱਸ ਅਗਲੇ ਹਫ਼ਤੇ ਹਾਰਵਰਡ ਤੋਂ ਗ੍ਰੈਜੂਏਟ ਹੋਵੇਗੀ। ਇਸ ਤੋਂ ਬਾਅਦ ਉਹ ਆਪਣੇ ਦੋਸਤਾਂ ਨਾਲ ਨਿਊਯਾਰਕ ਵਿੱਚ ਰਹਿ ਕੇ ਕੰਮ ਕਰਨ ਦੀ ਯੋਜਨਾ ਬਣਾ ਰਹੀ ਹੈ। ਉਸਨੇ ਕਿਹਾ ਕਿ ਭਾਵੇਂ ਉਹ ਵਿਦੇਸ਼ ਵਿੱਚ ਕਰੀਅਰ ਬਣਾਉਣ ਜਾ ਰਹੀ ਹੈ, ਪਰ ਨਿਊਜ਼ੀਲੈਂਡ ਹਮੇਸ਼ਾਂ ਉਸਦਾ ਘਰ ਰਹੇਗਾ ਅਤੇ ਭਵਿੱਖ ਵਿੱਚ ਉਹ ਮੁੜ ਆਪਣੇ ਦੇਸ਼ ਵਾਪਸ ਆਉਣਾ ਚਾਹੁੰਦੀ ਹੈ।