ਨਿਊਜ਼ੀਲੈਂਡ ਦੀ ਮਸ਼ਹੂਰ ਟ੍ਰਾਂਜ਼ਐਲਪਾਈਨ ਯਾਤਰੀ ਟ੍ਰੇਨ ਸ਼ਨੀਵਾਰ ਨੂੰ ਇੱਕ ਸੁਰੰਗ ਅੰਦਰ ਖਰਾਬ ਹੋ ਗਈ, ਜਿਸ ਕਾਰਨ 103 ਯਾਤਰੀ ਇੱਕ ਘੰਟੇ ਤੋਂ ਵੱਧ ਸਮੇਂ ਲਈ ਫਸੇ ਰਹੇ। ਘਟਨਾ ਤੋਂ ਬਾਅਦ ਟਰਾਂਸਪੋਰਟ ਐਕਸੀਡੈਂਟ ਇਨਵੈਸਟੀਗੇਸ਼ਨ ਕਮਿਸ਼ਨ (TAIC) ਨੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਅਧਿਕਾਰੀਆਂ ਮੁਤਾਬਿਕ ਟ੍ਰੇਨ ਕ੍ਰਾਈਸਟਚਰਚ ਤੋਂ ਗ੍ਰੇਮਾਊਥ ਜਾ ਰਹੀ ਸੀ, ਜਦੋਂ ਸਵੇਰੇ ਕਰੀਬ 9:50 ਵਜੇ ਮਿਡਲੈਂਡ ਲਾਈਨ ਦੀ ਟਨਲ ਨੰਬਰ 9 ਵਿੱਚ ਦਾਖਲ ਹੋਣ ਦੌਰਾਨ ਇੰਜਣ ਵਿੱਚ ਤਕਨੀਕੀ ਖਰਾਬੀ ਆ ਗਈ। ਇਸ ਕਾਰਨ ਟ੍ਰੇਨ ਸਟੇਅਰਕੇਸ ਅਤੇ ਕ੍ਰੈਗੀਬਰਨ ਦੇ ਵਿਚਕਾਰ ਸੁਰੰਗ ਅੰਦਰ ਹੀ ਰੁਕ ਗਈ।
TAIC ਦੀ ਮੁੱਖ ਜਾਂਚ ਅਧਿਕਾਰੀ ਲੂਈਜ਼ ਕੂਕ ਨੇ ਟ੍ਰੇਨ ਵਿੱਚ ਸਵਾਰ ਸਾਰੇ 103 ਯਾਤਰੀਆਂ ਨੂੰ ਅੱਗੇ ਆ ਕੇ ਆਪਣਾ ਤਜਰਬਾ ਸਾਂਝਾ ਕਰਨ ਦੀ ਅਪੀਲ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਜਾਂਚ ਲਈ ਯਾਤਰੀਆਂ ਦੀਆਂ ਯਾਦਾਂ ਅਤੇ ਜਾਣਕਾਰੀ ਬਹੁਤ ਮਹੱਤਵਪੂਰਨ ਹਨ। ਕਰੀਬ 11 ਵਜੇ ਇੱਕ ਇੰਜੀਨੀਅਰ ਨੇ ਲੋਕੋਮੋਟਿਵ ਨੂੰ ਰੀਸੈੱਟ ਕਰਕੇ ਟ੍ਰੇਨ ਨੂੰ ਸੁਰੰਗ ਤੋਂ ਬਾਹਰ ਕੱਢਿਆ। ਇਸ ਤੋਂ ਬਾਅਦ ਇੱਕ ਰਾਹਤ ਟ੍ਰੇਨ ਨੇ ਇਸਨੂੰ ਵਾਪਸ ਕ੍ਰਾਈਸਟਚਰਚ ਲਿਆਂਦਾ।
ਕੀਵੀਰੇਲ ਦੀ ਯਾਤਰੀ ਸੇਵਾਵਾਂ ਦੀ ਜਨਰਲ ਮੈਨੇਜਰ ਕਲੇਅਰ ਮੋਰਗਨ ਨੇ ਕਿਹਾ ਕਿ ਇਸ ਘਟਨਾ ਦੌਰਾਨ ਯਾਤਰੀਆਂ ਦੀ ਸੁਰੱਖਿਆ ਨੂੰ ਕੋਈ ਖਤਰਾ ਨਹੀਂ ਸੀ। ਉਨ੍ਹਾਂ ਇਸ ਅਸੁਵਿਧਾ ਲਈ ਮਾਫ਼ੀ ਮੰਗਦਿਆਂ ਕਿਹਾ ਕਿ ਕੰਪਨੀ ਪੂਰੇ ਮਾਮਲੇ ਦੀ ਜਾਂਚ ਕਰੇਗੀ।
ਯਾਤਰੀ ਲੀਸਾ ਬ੍ਰਾਇਨ ਹਰਡ, ਜੋ ਆਪਣੇ ਪਰਿਵਾਰ ਨਾਲ ਆਪਣੀ ਮਾਂ ਦੇ 70ਵੇਂ ਜਨਮਦਿਨ ਮੌਕੇ ਟ੍ਰਾਂਜ਼ਐਲਪਾਈਨ ਯਾਤਰਾ ਲਈ ਆਈ ਸੀ, ਨੇ ਦੱਸਿਆ ਕਿ ਸ਼ੁਰੂ ਵਿੱਚ ਸਭ ਨੂੰ ਲੱਗਿਆ ਕਿ ਇਹ ਇੱਕ ਛੋਟੀ ਜਿਹੀ ਰੁਕਾਵਟ ਹੈ। ਪਰ ਕੁਝ ਮਿੰਟਾਂ ਬਾਅਦ ਐਲਾਨ ਕੀਤਾ ਗਿਆ ਕਿ ਇੰਜਣ ਵਿੱਚ ਸਮੱਸਿਆ ਆ ਗਈ ਹੈ ਅਤੇ ਇਸਨੂੰ ਠੀਕ ਕਰਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ।
ਘਟਨਾ ਤੋਂ ਪ੍ਰਭਾਵਿਤ ਯਾਤਰੀਆਂ ਨੂੰ ਪੂਰਾ ਰਿਫੰਡ ਦੇਣ ਦੀ ਪੇਸ਼ਕਸ਼ ਕੀਤੀ ਗਈ। ਜਿਹੜੇ ਯਾਤਰੀ ਆਪਣੀ ਯਾਤਰਾ ਜਾਰੀ ਰੱਖਣਾ ਚਾਹੁੰਦੇ ਸਨ, ਉਨ੍ਹਾਂ ਲਈ ਗ੍ਰੇਮਾਊਥ ਤੱਕ ਮੁਫ਼ਤ ਬੱਸਾਂ ਦਾ ਪ੍ਰਬੰਧ ਵੀ ਕੀਤਾ ਗਿਆ। ਇਸ ਦੇ ਨਾਲ ਹੀ ਗ੍ਰੇਮਾਊਥ ਦੀਆਂ ਕਾਰ ਰੈਂਟਲ ਕੰਪਨੀਆਂ ਨਾਲ ਸੰਪਰਕ ਕਰਕੇ ਪ੍ਰਭਾਵਿਤ ਗਾਹਕਾਂ ਲਈ ਵਾਧੂ ਸਮੇਂ ਤੱਕ ਸੇਵਾਵਾਂ ਉਪਲਬਧ ਕਰਵਾਈਆਂ ਗਈਆਂ।
ਹਾਲਾਂਕਿ ਯਾਤਰਾ ਵਿੱਚ ਵੱਡੀ ਰੁਕਾਵਟ ਆਈ, ਪਰ ਯਾਤਰੀਆਂ ਨੇ ਟ੍ਰੇਨ ਸਟਾਫ਼ ਦੀ ਕਾਰਗੁਜ਼ਾਰੀ ਦੀ ਸ਼ਲਾਘਾ ਕੀਤੀ। ਲੀਸਾ ਨੇ ਕਿਹਾ ਕਿ ਸਟਾਫ਼ ਨੇ ਪੂਰੀ ਸਥਿਤੀ ਨੂੰ ਬਹੁਤ ਵਧੀਆ ਢੰਗ ਨਾਲ ਸੰਭਾਲਿਆ ਅਤੇ ਯਾਤਰੀਆਂ ਦੀ ਹਰ ਸੰਭਵ ਮਦਦ ਕੀਤੀ।