ਵੈਲਿੰਗਟਨ ਸਿਟੀ ਕੌਂਸਲ ਵੱਲੋਂ ਨਵੀਂ ਕੇਂਦਰੀ ਲਾਇਬ੍ਰੇਰੀ ਲਈ ਬਣਾਈ ਗਈ ਵੈੱਬਸਾਈਟ ‘ਤੇ 6 ਲੱਖ ਡਾਲਰ ਤੋਂ ਵੱਧ ਖਰਚ ਕੀਤੇ ਜਾਣ ‘ਤੇ ਵਿਵਾਦ ਖੜ੍ਹਾ ਹੋ ਗਿਆ ਹੈ। ਸ਼ਹਿਰ ਦੇ ਡਿਪਟੀ ਮੇਅਰ ਬੈਨ ਮੈਕਨਲਟੀ ਨੇ ਇਸ ਖਰਚ ਨੂੰ “ਹੱਦ ਤੋਂ ਵੱਧ” ਅਤੇ “ਚਿੰਤਾਜਨਕ” ਕਰਾਰ ਦਿੱਤਾ ਹੈ। ਸਾਹਮਣੇ ਆਏ ਅੰਕੜਿਆਂ ਮੁਤਾਬਕ, ਵੈੱਬਸਾਈਟ ਦੀ ਡਿਜ਼ਾਈਨਿੰਗ ਅਤੇ ਵਿਕਾਸ ‘ਤੇ ਕੁੱਲ 5,95,801 ਡਾਲਰ ਖਰਚ ਕੀਤੇ ਗਏ। ਇਸ ਤੋਂ ਇਲਾਵਾ ਵੈੱਬਸਾਈਟ ਦੀ ਇੱਕ ਸਾਲ ਦੀ ਹੋਸਟਿੰਗ ਅਤੇ ਰੱਖ-ਰਖਾਅ ਲਈ 72,000 ਡਾਲਰ ਦਾ ਵੱਖਰਾ ਖਰਚ ਵੀ ਕੀਤਾ ਗਿਆ।
ਡਿਪਟੀ ਮੇਅਰ ਬੈਨ ਮੈਕਨਲਟੀ ਨੇ ਸੋਸ਼ਲ ਮੀਡੀਆ ‘ਤੇ ਆਪਣੀ ਨਾਰਾਜ਼ਗੀ ਜ਼ਾਹਿਰ ਕਰਦਿਆਂ ਕਿਹਾ ਕਿ ਜਦੋਂ ਕੌਂਸਲ ਨੂੰ ਰਿਕਾਰਡ ਗਿਣਤੀ ਵਿੱਚ ਆਈਆਂ ਅਰਜ਼ੀਆਂ ਕਾਰਨ 30 ਲੱਖ ਡਾਲਰ ਦੀ ਕਮਿਊਨਿਟੀ ਫੰਡਿੰਗ ਰੱਦ ਕਰਨੀ ਪਈ, ਉਸ ਤੋਂ ਤੁਰੰਤ ਬਾਅਦ ਇਸ ਵੈੱਬਸਾਈਟ ਦੇ ਖਰਚ ਬਾਰੇ ਜਾਣਨਾ ਹੈਰਾਨ ਕਰਨ ਵਾਲਾ ਸੀ।ਉਨ੍ਹਾਂ ਕਿਹਾ ਕਿ ਇੱਕ ਆਮ ਵੈੱਬ ਡਿਵੈਲਪਰ ਇਸ ਤਰ੍ਹਾਂ ਦੀ ਵੈੱਬਸਾਈਟ ਕਾਫ਼ੀ ਘੱਟ ਲਾਗਤ ਵਿੱਚ ਤਿਆਰ ਕਰ ਸਕਦਾ ਸੀ। ਮੈਕਨਲਟੀ ਨੇ ਦਲੀਲ ਦਿੱਤੀ ਕਿ ਕੌਂਸਲ ਨੂੰ ਜਨਤਕ ਧਨ ਦੀ ਵਰਤੋਂ ਵਿੱਚ ਹੋਰ ਸਾਵਧਾਨੀ ਅਤੇ ਜਵਾਬਦੇਹੀ ਦਿਖਾਉਣੀ ਚਾਹੀਦੀ ਹੈ।
ਵੈਲਿੰਗਟਨ ਸਿਟੀ ਕੌਂਸਲ ਦੇ ਬੁਲਾਰੇ ਨੇ ਇਸ ਮਾਮਲੇ ‘ਤੇ ਕਿਹਾ ਕਿ ਮੌਜੂਦਾ ਵਿੱਤੀ ਹਾਲਾਤਾਂ ਨੂੰ ਦੇਖਦਿਆਂ ਅਜਿਹਾ ਪ੍ਰੋਜੈਕਟ ਅੱਜ ਮਨਜ਼ੂਰ ਹੋਣਾ ਮੁਸ਼ਕਿਲ ਹੈ। ਉਨ੍ਹਾਂ ਮੰਨਿਆ ਕਿ ਇਹ ਇੱਕ ਵੱਡੀ ਰਕਮ ਹੈ, ਪਰ ਇਹ ਖਰਚ ਡਿਜ਼ਾਈਨ, ਡਿਵੈਲਪਮੈਂਟ, ਵੈੱਬਸਾਈਟ ਨਿਰਮਾਣ, ਯੂਜ਼ਰ ਟੈਸਟਿੰਗ ਅਤੇ ਲਾਂਚ ਸਮੇਤ ਪੂਰੇ ਪ੍ਰੋਜੈਕਟ ਲਈ ਕੀਤਾ ਗਿਆ ਸੀ।
ਕੌਂਸਲ ਅਨੁਸਾਰ ਇਹ ਠੇਕਾ ਆਕਲੈਂਡ ਦੀ ਡਿਜ਼ਿਟਲ ਏਜੰਸੀ Journey Digital ਨੂੰ ਪੂਰੀ ਖਰੀਦ ਪ੍ਰਕਿਰਿਆ ਤੋਂ ਬਾਅਦ ਦਿੱਤਾ ਗਿਆ ਸੀ। ਵੱਖਰੀ ਵੈੱਬਸਾਈਟ ਦਾ ਮਕਸਦ ਨਵੀਂ ਲਾਇਬ੍ਰੇਰੀ ਦਾ ਪ੍ਰਚਾਰ ਕਰਨਾ ਅਤੇ ਵੱਧ ਤੋਂ ਵੱਧ ਲੋਕਾਂ ਨੂੰ ਉੱਥੇ ਆਕਰਸ਼ਿਤ ਕਰਨਾ ਸੀ।
ਕੌਂਸਲ ਨੇ ਦੱਸਿਆ ਕਿ ਲਾਇਬ੍ਰੇਰੀ ਦੇ ਖੁੱਲ੍ਹਣ ਤੋਂ ਬਾਅਦ ਸਿਰਫ਼ 10 ਹਫ਼ਤਿਆਂ ਵਿੱਚ ਹੀ 3.5 ਲੱਖ ਤੋਂ ਵੱਧ ਲੋਕ ਇੱਥੇ ਆ ਚੁੱਕੇ ਹਨ। ਅਨੁਮਾਨ ਹੈ ਕਿ ਪਹਿਲੇ ਸਾਲ ਦੌਰਾਨ ਲਾਇਬ੍ਰੇਰੀ ਵਿੱਚ ਕਰੀਬ 18 ਲੱਖ ਦਰਸ਼ਕ ਪਹੁੰਚਣਗੇ, ਜੋ ਔਸਤਨ 4,900 ਲੋਕ ਪ੍ਰਤੀ ਦਿਨ ਬਣਦੇ ਹਨ। ਇਸ ਖਰਚ ਨੂੰ ਲੈ ਕੇ ਜਨਤਕ ਪੱਧਰ ‘ਤੇ ਚਰਚਾ ਜਾਰੀ ਹੈ ਅਤੇ ਕੌਂਸਲ ਦੀ ਖਰਚ ਨੀਤੀ ‘ਤੇ ਵੀ ਸਵਾਲ ਉੱਠ ਰਹੇ ਹਨ।