ਭਾਵੇਂ ਇਸ ਵੇਲੇ ਨਿਊਜ਼ੀਲੈਂਡ ਦੇ ਕਈ ਹਿੱਸਿਆਂ ਵਿੱਚ ਠੰਢ ਦਾ ਅਹਿਸਾਸ ਹੋ ਰਿਹਾ ਹੈ, ਪਰ ਅਰਥ ਸਾਇੰਸਜ਼ ਨਿਊਜ਼ੀਲੈਂਡ ਦੀ ਤਾਜ਼ਾ ਜਲਵਾਯੂ ਰਿਪੋਰਟ ਮੁਤਾਬਿਕ ਸਾਲ 2026 ਦਾ ਜੂਨ ਮਹੀਨਾ ਦੇਸ਼ ਦੇ ਇਤਿਹਾਸ ਦਾ ਸਭ ਤੋਂ ਗਰਮ ਜੂਨ ਦਾ ਮਹੀਨਾ ਦਰਜ ਕੀਤਾ ਗਿਆ ਹੈ। ਰਿਪੋਰਟ ਅਨੁਸਾਰ ਜੂਨ ਮਹੀਨੇ ਦੌਰਾਨ ਦੇਸ਼ ਦਾ ਔਸਤ ਤਾਪਮਾਨ 10.6 ਡਿਗਰੀ ਸੈਲਸੀਅਸ ਰਿਹਾ, ਜੋ ਕਿ 1909 ਤੋਂ ਸ਼ੁਰੂ ਹੋਏ ਸੱਤ-ਸਟੇਸ਼ਨ ਤਾਪਮਾਨ ਰਿਕਾਰਡ ਵਿੱਚ ਸਭ ਤੋਂ ਵੱਧ ਹੈ।
ਮਹੀਨੇ ਦਾ ਸਭ ਤੋਂ ਉੱਚਾ ਤਾਪਮਾਨ 20 ਜੂਨ ਨੂੰ ਕ੍ਰਾਇਸਟਚਰਚ ਦੇ ਬ੍ਰੋਮਲੀ ਇਲਾਕੇ ਵਿੱਚ 26 ਡਿਗਰੀ ਸੈਲਸੀਅਸ ਦਰਜ ਕੀਤਾ ਗਿਆ। ਇਹ ਨਿਊਜ਼ੀਲੈਂਡ ਦੇ ਇਤਿਹਾਸ ਵਿੱਚ ਜੂਨ ਮਹੀਨੇ ਦੌਰਾਨ ਦਰਜ ਕੀਤਾ ਗਿਆ ਸਭ ਤੋਂ ਵੱਧ ਤਾਪਮਾਨ ਵੀ ਹੈ। ਦੂਜੇ ਪਾਸੇ, ਸਭ ਤੋਂ ਘੱਟ ਤਾਪਮਾਨ 27 ਜੂਨ ਨੂੰ ਰੈਨਫਰਲੀ ਵਿੱਚ -7.7 ਡਿਗਰੀ ਸੈਲਸੀਅਸ ਦਰਜ ਕੀਤਾ ਗਿਆ।
ਦੇਸ਼ ਦੇ ਛੇ ਮੁੱਖ ਸ਼ਹਿਰਾਂ ਵਿੱਚ ਆਕਲੈਂਡ ਅਤੇ ਟੌਰਾਂਗਾ ਸਭ ਤੋਂ ਗਰਮ ਰਹੇ। ਟੌਰਾਂਗਾ ਵਿੱਚ ਸਭ ਤੋਂ ਵੱਧ ਧੁੱਪ ਰਹੀ, ਡੁਨੇਡਿਨ ਸਭ ਤੋਂ ਸੁੱਕਾ (driest) , ਕ੍ਰਾਇਸਟਚਰਚ ਸਭ ਤੋਂ ਠੰਢਾ, ਜਦਕਿ ਵੈਲਿੰਗਟਨ ਸਭ ਤੋਂ ਵੱਧ ਮੀਂਹ ਅਤੇ ਸਭ ਤੋਂ ਘੱਟ ਧੁੱਪ ਵਾਲਾ ਸ਼ਹਿਰ ਰਿਹਾ।
ਜੂਨ ਮਹੀਨੇ ਦੌਰਾਨ ਆਰਥਰਜ਼ ਪਾਸ ਵਿੱਚ 20 ਜੂਨ ਨੂੰ ਇੱਕ ਹੀ ਦਿਨ ਵਿੱਚ 168 ਮਿਲੀਮੀਟਰ ਮੀਂਹ ਦਰਜ ਕੀਤਾ ਗਿਆ, ਜੋ ਸਭ ਤੋਂ ਵੱਧ ਰਿਹਾ। ਇਸੇ ਦਿਨ ਕੇਪ ਟਰਨਅਗੇਨ ਵਿੱਚ 183 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਸਭ ਤੋਂ ਤੇਜ਼ ਹਵਾ ਵੀ ਦਰਜ ਕੀਤੀ ਗਈ।
ਸਾਲ 2026 ਦੌਰਾਨ ਹੁਣ ਤੱਕ ਨੇਲਸਨ, ਨਿਊ ਪਲਾਇਮਥ, ਵਾਕਾਟਾਨੇ ਅਤੇ ਰਿਚਮੰਡ ਸਭ ਤੋਂ ਵੱਧ ਧੁੱਪ ਵਾਲੇ ਇਲਾਕੇ ਰਹੇ ਹਨ। ਜੂਨ ਦੇ ਅੰਤ ਤੱਕ ਦੱਖਣੀ ਪ੍ਰਸ਼ਾਂਤ ਮਹਾਂਸਾਗਰ ਵਿੱਚ ਐਲ ਨੀਨੋ ਦੀਆਂ ਸਥਿਤੀਆਂ ਬਣੀਆਂ ਰਹੀਆਂ ਅਤੇ ਨਿਊਜ਼ੀਲੈਂਡ ਦੇ ਆਲੇ-ਦੁਆਲੇ ਸਮੁੰਦਰ ਦਾ ਤਾਪਮਾਨ ਆਮ ਨਾਲੋਂ ਵੱਧ ਰਿਹਾ।
ਹਾਲਾਂਕਿ ਜੂਨ ਮਹੀਨਾ ਰਿਕਾਰਡ ਤੋੜ ਗਰਮ ਰਿਹਾ, ਪਰ ਹੁਣ ਦੇਸ਼ ਦੇ ਕਈ ਹਿੱਸਿਆਂ, ਖ਼ਾਸ ਕਰਕੇ ਦੱਖਣੀ ਟਾਪੂ ਵਿੱਚ, ਤਾਪਮਾਨ ਵਿੱਚ ਗਿਰਾਵਟ ਆਈ ਹੈ। ਸਾਊਦਰਨ ਡਿਸਟ੍ਰਿਕਟ ਪੁਲਿਸ ਅਤੇ ਨਿਊਜ਼ੀਲੈਂਡ ਟਰਾਂਸਪੋਰਟ ਏਜੰਸੀ ਨੇ ਬਰਫ਼ੀਲੀਆਂ ਸੜਕਾਂ ਨੂੰ ਲੈ ਕੇ ਲੋਕਾਂ ਨੂੰ ਸਾਵਧਾਨ ਰਹਿਣ ਦੀ ਚਿਤਾਵਨੀ ਜਾਰੀ ਕੀਤੀ ਹੈ।