ਨਿਊਜ਼ੀਲੈਂਡ ਦੇ ਇਮੀਗ੍ਰੇਸ਼ਨ ਵਿਭਾਗ (INZ) ਨੂੰ ਆਪਣੀ ਪ੍ਰਸ਼ਾਸਕੀ ਲਾਪਰਵਾਹੀ ਦਾ ਖਮਿਆਜ਼ਾ ਭੁਗਤਣਾ ਪਿਆ ਹੈ। ਵਿਭਾਗ ਨੇ 21 ਕੰਪਨੀਆਂ ਤੋਂ ਵਸੂਲੇ ਗਏ ਕਰੀਬ 44,000 ਨਿਊਜ਼ੀਲੈਂਡ ਡਾਲਰ ਦੇ ਜੁਰਮਾਨੇ ਵਾਪਸ ਕਰ ਦਿੱਤੇ ਹਨ, ਕਿਉਂਕਿ ਇਹ ਜੁਰਮਾਨੇ ਜਾਰੀ ਕਰਨ ਵਾਲੇ ਅਧਿਕਾਰੀਆਂ ਕੋਲ ਲੋੜੀਂਦੇ ਕਾਨੂੰਨੀ ਅਧਿਕਾਰ ਨਹੀਂ ਸਨ।
ਜਾਂਚ ਦੌਰਾਨ ਸਾਹਮਣੇ ਆਇਆ ਕਿ 2024 ਤੋਂ ਜਾਰੀ ਕੀਤੇ ਗਏ ਉਲੰਘਣਾ ਨੋਟਿਸ ਕਾਨੂੰਨੀ ਪ੍ਰਕਿਰਿਆ ਅਨੁਸਾਰ ਵੈਧ ਨਹੀਂ ਸਨ। ਨਵੇਂ ਨੋਟਿਸ ਜਾਰੀ ਕਰਨ ਦੀ ਤਿੰਨ ਮਹੀਨੇ ਦੀ ਕਾਨੂੰਨੀ ਮਿਆਦ ਵੀ ਖਤਮ ਹੋ ਚੁੱਕੀ ਸੀ, ਜਿਸ ਕਾਰਨ INZ ਮੁੜ ਕਾਰਵਾਈ ਨਹੀਂ ਕਰ ਸਕਿਆ ਅਤੇ ਸਾਰੀ ਰਕਮ ਸਬੰਧਿਤ ਕੰਪਨੀਆਂ ਨੂੰ ਵਾਪਿਸ ਕਰਨੀ ਪਈ।
ਇਸੇ ਮਾਮਲੇ ਵਿੱਚ 17 ਕੰਪਨੀਆਂ ‘ਤੇ ਵਿਦੇਸ਼ੀ ਕਰਮਚਾਰੀਆਂ ਦੀ ਭਰਤੀ ਲਈ 12 ਮਹੀਨੇ ਦੀ ਪਾਬੰਦੀ ਲਗਾ ਦਿੱਤੀ ਗਈ ਸੀ, ਜਦਕਿ ਨਿਯਮਾਂ ਅਨੁਸਾਰ ਇਹ ਪਾਬੰਦੀ ਸਿਰਫ਼ 6 ਮਹੀਨੇ ਲਈ ਹੋਣੀ ਚਾਹੀਦੀ ਸੀ। ਗਲਤੀ ਸਾਹਮਣੇ ਆਉਣ ਤੋਂ ਬਾਅਦ INZ ਨੇ ਇਨ੍ਹਾਂ ਕੰਪਨੀਆਂ ਦੇ ਨਾਮ ਜਨਤਕ ਸੂਚੀ ਵਿੱਚੋਂ ਵੀ ਹਟਾ ਦਿੱਤੇ ਹਨ।
ਵਿਭਾਗ ਮੁਤਾਬਿਕ ਪ੍ਰਭਾਵਿਤ ਜ਼ਿਆਦਾਤਰ ਨਿਯੋਗਤਾ ਛੋਟੇ ਕਾਰੋਬਾਰ ਹਨ। ਇਨ੍ਹਾਂ ਵਿੱਚੋਂ 5 ਕੰਪਨੀਆਂ ਕੋਲ ਮਾਨਤਾ ਪ੍ਰਾਪਤ (Accredited) ਨਿਯੋਗਤਾ ਦਾ ਦਰਜਾ ਨਹੀਂ ਸੀ, ਜਦਕਿ ਬਾਕੀ 16 ਮਾਨਤਾ ਪ੍ਰਾਪਤ ਨਿਯੋਗਤਾਵਾਂ ਕੋਲ ਕੁੱਲ 55 ਪ੍ਰਵਾਸੀ ਕਰਮਚਾਰੀ ਕੰਮ ਕਰ ਰਹੇ ਸਨ।
ਜ਼ਿਕਰਯੋਗ ਹੈ ਕਿ ਵਿੱਤੀ ਸਾਲ 2024–25 ਦੌਰਾਨ ਇਮੀਗ੍ਰੇਸ਼ਨ ਨਿਯਮਾਂ ਦੀ ਉਲੰਘਣਾ ਕਰਨ ਦੇ ਦੋਸ਼ ਹੇਠ ਕੁੱਲ 118 ਨਿਯੋਗਤਾਵਾਂ ਖ਼ਿਲਾਫ਼ ਜੁਰਮਾਨੇ ਜਾਰੀ ਕੀਤੇ ਗਏ ਸਨ। ਇਹ ਘਟਨਾ INZ ਦੀਆਂ ਅੰਦਰੂਨੀ ਪ੍ਰਕਿਰਿਆਵਾਂ ਅਤੇ ਕਾਨੂੰਨੀ ਨਿਗਰਾਨੀ ‘ਤੇ ਸਵਾਲ ਖੜ੍ਹੇ ਕਰਦੀ ਹੈ।