ਆਕਲੈਂਡ: ਇਕਨਾਮਿਸਟ ਇੰਟੈਲੀਜੈਂਸ ਯੂਨਿਟ (Economist Intelligence Unit – EIU) ਵੱਲੋਂ ਜਾਰੀ ਕੀਤੇ ਗਏ ਗਲੋਬਲ ਲਿਵੇਬਿਲਿਟੀ ਇੰਡੈਕਸ 2026 ਅਨੁਸਾਰ, ਨਿਊਜ਼ੀਲੈਂਡ ਦਾ ਸਭ ਤੋਂ ਵੱਡਾ ਸ਼ਹਿਰ ਆਕਲੈਂਡ ਦੁਨੀਆ ਦੇ ਸਭ ਤੋਂ ਵੱਧ ਰਹਿਣਯੋਗ (Most Liveable) ਸ਼ਹਿਰਾਂ ਦੀ ਟਾਪ-10 ਸੂਚੀ ਤੋਂ ਬਾਹਰ ਹੋ ਗਿਆ ਹੈ। ਤਾਜ਼ਾ ਰੈਂਕਿੰਗ ਮੁਤਾਬਿਕ, ਪਿਛਲੇ ਸਾਲ ਸਾਂਝੇ ਤੌਰ ‘ਤੇ ਸੱਤਵੇਂ ਸਥਾਨ ‘ਤੇ ਰਹਿਣ ਵਾਲਾ ਆਕਲੈਂਡ ਇਸ ਸਾਲ ਪੰਜ ਸਥਾਨ ਹੇਠਾਂ ਖਿਸਕ ਕੇ 12ਵੇਂ ਨੰਬਰ ‘ਤੇ ਪਹੁੰਚ ਗਿਆ ਹੈ। ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਹੋਰ ਸ਼ਹਿਰਾਂ ਦੀ ਰਹਿਣਯੋਗਤਾ ਵਿੱਚ ਸੁਧਾਰ ਹੋਣ ਦੇ ਨਾਲ-ਨਾਲ ਆਕਲੈਂਡ ਦੇ ਸਿਹਤ ਸੇਵਾਵਾਂ ਅਤੇ ਬੁਨਿਆਦੀ ਢਾਂਚੇ (Infrastructure) ਦੇ ਅੰਕਾਂ ਵਿੱਚ ਵੀ ਹਲਕੀ ਗਿਰਾਵਟ ਦਰਜ ਕੀਤੀ ਗਈ ਹੈ।
ਉੱਥੇ ਹੀ, ਨਿਊਜ਼ੀਲੈਂਡ ਦੀ ਰਾਜਧਾਨੀ ਵੈਲਿੰਗਟਨ ਦੀ ਰੈਂਕਿੰਗ ਵੀ ਲਗਾਤਾਰ ਦੂਜੇ ਸਾਲ ਘਟੀ ਹੈ ਅਤੇ ਇਹ ਹੁਣ ਦੁਨੀਆ ਦੇ ਟਾਪ-20 ਰਹਿਣਯੋਗ ਸ਼ਹਿਰਾਂ ਦੀ ਸੂਚੀ ਤੋਂ ਵੀ ਬਾਹਰ ਹੋ ਗਿਆ ਹੈ।
ਇਹ ਨਿਊਜ਼ੀਲੈਂਡ ਦੇ ਦੋਵੇਂ ਵੱਡੇ ਸ਼ਹਿਰਾਂ ਲਈ ਇੱਕ ਵੱਡੀ ਗਿਰਾਵਟ ਮੰਨੀ ਜਾ ਰਹੀ ਹੈ। ਸਾਲ 2021 ਵਿੱਚ ਕੋਵਿਡ-19 ਮਹਾਮਾਰੀ ਦੌਰਾਨ ਨਿਊਜ਼ੀਲੈਂਡ ਦੇ ਪ੍ਰਭਾਵਸ਼ਾਲੀ ਪ੍ਰਬੰਧਨ ਕਾਰਨ ਆਕਲੈਂਡ ਦੁਨੀਆ ਦਾ ਸਭ ਤੋਂ ਵੱਧ ਰਹਿਣਯੋਗ ਸ਼ਹਿਰ (ਨੰਬਰ 1 ) ਅਤੇ ਵੈਲਿੰਗਟਨ ਚੌਥੇ ਸਥਾਨ ‘ਤੇ ਸੀ। ਇਸ ਸਾਲ ਡੈਨਮਾਰਕ ਦੀ ਰਾਜਧਾਨੀ ਕੋਪਨਹੇਗਨ ਨੇ ਦੁਨੀਆ ਦੇ ਸਭ ਤੋਂ ਰਹਿਣਯੋਗ ਸ਼ਹਿਰ ਦਾ ਖਿਤਾਬ ਬਰਕਰਾਰ ਰੱਖਿਆ ਹੈ।
ਆਸਟ੍ਰੇਲੀਆ ਦੇ ਸ਼ਹਿਰਾਂ ਨੇ ਵੀ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਹੈ। ਮੈਲਬਰਨ ਤੀਜੇ, ਸਿਡਨੀ ਚੌਥੇ ਅਤੇ ਐਡੀਲੇਡ ਅੱਠਵੇਂ ਸਥਾਨ ‘ਤੇ ਰਹੇ ਹਨ। ਇਸ ਤਰ੍ਹਾਂ ਆਸਟ੍ਰੇਲੀਆ ਦੇ ਤਿੰਨ ਸ਼ਹਿਰ ਦੁਨੀਆ ਦੇ ਟਾਪ-10 ਵਿੱਚ ਸ਼ਾਮਿਲ ਹਨ।
ਹਰ ਸਾਲ ਜਾਰੀ ਹੋਣ ਵਾਲਾ ਇਹ ਇੰਡੈਕਸ ਦੁਨੀਆ ਦੇ 173 ਸ਼ਹਿਰਾਂ ਦਾ ਮੁਲਾਂਕਣ ਪੰਜ ਮੁੱਖ ਮਾਪਦੰਡਾਂ—ਸਥਿਰਤਾ, ਸਿਹਤ ਸੇਵਾਵਾਂ, ਸੱਭਿਆਚਾਰ ਅਤੇ ਵਾਤਾਵਰਣ, ਸਿੱਖਿਆ ਅਤੇ ਬੁਨਿਆਦੀ ਢਾਂਚਾ—ਦੇ ਆਧਾਰ ‘ਤੇ ਕਰਦਾ ਹੈ।
ਰਿਪੋਰਟ ਮੁਤਾਬਕ, ਇਸ ਸਾਲ ਦੀਆਂ ਰੈਂਕਿੰਗਾਂ ‘ਤੇ ਮੱਧ-ਪੂਰਬ ਵਿੱਚ ਈਰਾਨ, ਇਜ਼ਰਾਈਲ ਅਤੇ ਅਮਰੀਕਾ ਵਿਚਾਲੇ ਵਧੇ ਤਣਾਅ ਅਤੇ ਜੰਗ ਦਾ ਵੀ ਅਸਰ ਪਿਆ। ਈਰਾਨ ਵੱਲੋਂ ਗੁਆਂਢੀ ਦੇਸ਼ਾਂ ‘ਤੇ ਹਮਲੇ ਅਤੇ ਹੋਰਮੁਜ਼ ਜਲਡਮਰੂ (Strait of Hormuz) ਵਿੱਚ ਸਮੁੰਦਰੀ ਆਵਾਜਾਈ ਪ੍ਰਭਾਵਿਤ ਹੋਣ ਕਾਰਨ ਖੇਤਰ ਦੇ ਕਈ ਸ਼ਹਿਰਾਂ ਦੀ ਰੈਂਕਿੰਗ ਵਿੱਚ ਔਸਤ ਤਿੰਨ ਤੋਂ ਵੱਧ ਸਥਾਨਾਂ ਦੀ ਗਿਰਾਵਟ ਦਰਜ ਕੀਤੀ ਗਈ।
ਸੂਚੀ ਦੇ ਸਭ ਤੋਂ ਹੇਠਲੇ ਸਥਾਨ ‘ਤੇ ਸੀਰੀਆ ਦੀ ਰਾਜਧਾਨੀ ਦਮਿਸ਼ਕ ਇੱਕ ਵਾਰ ਫਿਰ ਦੁਨੀਆ ਦਾ ਸਭ ਤੋਂ ਘੱਟ ਰਹਿਣਯੋਗ ਸ਼ਹਿਰ ਕਰਾਰ ਦਿੱਤਾ ਗਿਆ ਹੈ। ਇਸ ਤੋਂ ਇਲਾਵਾ ਈਰਾਨ ਦੀ ਰਾਜਧਾਨੀ ਤਹਿਰਾਨ ਵੀ ਇਸ ਸਾਲ ਸਭ ਤੋਂ ਹੇਠਲੇ 10 ਸ਼ਹਿਰਾਂ ਦੀ ਸੂਚੀ ਵਿੱਚ ਸ਼ਾਮਲ ਹੋ ਗਈ ਹੈ।
ਦੁਨੀਆ ਦੇ ਟਾਪ-10 ਸਭ ਤੋਂ ਰਹਿਣਯੋਗ ਸ਼ਹਿਰ (2026)
ਕੋਪਨਹੇਗਨ (ਡੈਨਮਾਰਕ)
ਵੀਅਨਾ (ਆਸਟ੍ਰੀਆ)
ਮੈਲਬਰਨ (ਆਸਟ੍ਰੇਲੀਆ)
ਸਿਡਨੀ (ਆਸਟ੍ਰੇਲੀਆ)
ਜ਼ਿਊਰਿਖ (ਸਵਿਟਜ਼ਰਲੈਂਡ)
ਜਨੇਵਾ (ਸਵਿਟਜ਼ਰਲੈਂਡ)
ਓਸਾਕਾ (ਜਾਪਾਨ)
ਐਡੀਲੇਡ (ਆਸਟ੍ਰੇਲੀਆ)
ਵੈਨਕੂਵਰ (ਕੈਨੇਡਾ)
ਟੋਕੀਓ (ਜਾਪਾਨ)