ਨਿਊਜ਼ੀਲੈਂਡ ਵਿੱਚ ਪਹਿਲੀ ਵਾਰ H5N1 ਐਵੀਅਨ ਇਨਫਲੂਐਂਜ਼ਾ (ਬਰਡ ਫਲੂ) ਦੇ ਇੱਕ ਮਾਮਲੇ ਦੀ ਪੁਸ਼ਟੀ ਹੋਈ ਹੈ। ਬਾਇਓਸਿਕਿਉਰਟੀ ਮੰਤਰੀ ਐਂਡਰੂ ਹੋਗਾਰਡ ਨੇ ਦੱਸਿਆ ਕਿ ਵੈਲਿੰਗਟਨ ਦੇ ਪੇਟੋਨੇ ਬੀਚ ‘ਤੇ ਮਿਲੇ ਇੱਕ ਸੰਕਰਮਿਤ ਬਰਾਊਨ ਸਕੂਆ ਸਮੁੰਦਰੀ ਪੰਛੀ ਵਿੱਚ H5N1 ਵਾਇਰਸ ਦੀ ਪੁਸ਼ਟੀ ਹੋਈ ਹੈ। ਮੰਤਰੀ ਨੇ ਕਿਹਾ ਕਿ ਇਹ H5N1 ਐਵੀਅਨ ਇਨਫਲੂਐਂਜ਼ਾ ਕਲੇਡ 2.3.4.4b ਹੈ, ਜੋ ਦੁਨੀਆ ਦੇ ਕਈ ਦੇਸ਼ਾਂ ਵਿੱਚ ਫੈਲ ਚੁੱਕਾ ਹੈ। ਹਾਲਾਂਕਿ ਨਿਊਜ਼ੀਲੈਂਡ ਵਿੱਚ ਇਹ ਪਹਿਲਾ ਮਾਮਲਾ ਹੈ।
ਉਨ੍ਹਾਂ ਦੇ ਅਨੁਸਾਰ, ਇਹ ਇੱਕ ਇਕੱਲੇ ਸਮੁੰਦਰੀ ਪੰਛੀ ਵਿੱਚ ਮਿਲਿਆ ਮਾਮਲਾ ਹੈ ਅਤੇ ਇਸ ਵੇਲੇ ਜੰਗਲੀ ਪੰਛੀਆਂ ਵਿੱਚ ਵੱਡੇ ਪੱਧਰ ‘ਤੇ ਮੌਤਾਂ ਜਾਂ ਵਾਇਰਸ ਫੈਲਣ ਦੇ ਕੋਈ ਸਬੂਤ ਨਹੀਂ ਮਿਲੇ ਹਨ। ਇਸ ਤੋਂ ਇਲਾਵਾ, ਦੇਸ਼ ਵਿੱਚ ਕਿਸੇ ਵੀ ਪੋਲਟਰੀ ਫਾਰਮ ਵਿੱਚ ਬਰਡ ਫਲੂ ਦੀ ਪੁਸ਼ਟੀ ਨਹੀਂ ਹੋਈ।
ਐਂਡਰੂ ਹੋਗਾਰਡ ਨੇ ਕਿਹਾ ਕਿ ਆਮ ਲੋਕਾਂ ਲਈ H5 ਬਰਡ ਫਲੂ ਦਾ ਖਤਰਾ ਬਹੁਤ ਘੱਟ ਹੈ, ਕਿਉਂਕਿ ਇਹ ਵਾਇਰਸ ਮਨੁੱਖਾਂ ਵਿੱਚ ਬਹੁਤ ਹੀ ਘੱਟ ਫੈਲਦਾ ਹੈ ਅਤੇ ਉਹ ਵੀ ਬਿਮਾਰ ਪੰਛੀਆਂ ਨਾਲ ਲੰਬੇ ਸਮੇਂ ਤੱਕ ਸਿੱਧੇ ਸੰਪਰਕ ਵਿੱਚ ਰਹਿਣ ‘ਤੇ। ਉਨ੍ਹਾਂ ਨੇ ਇਹ ਵੀ ਸਪੱਸ਼ਟ ਕੀਤਾ ਕਿ ਅੰਡੇ ਅਤੇ ਚਿਕਨ ਖਾਣ ਲਈ ਪੂਰੀ ਤਰ੍ਹਾਂ ਸੁਰੱਖਿਅਤ ਹਨ।
ਸਰਕਾਰ ਨੇ ਦੱਸਿਆ ਕਿ ਪੇਟੋਨੇ ਬੀਚ ਅਤੇ ਆਸ-ਪਾਸ ਦੇ ਇਲਾਕਿਆਂ ਦੀ ਨਿਗਰਾਨੀ ਕੀਤੀ ਜਾ ਰਹੀ ਹੈ। ਹੁਣ ਤੱਕ ਕਿਸੇ ਹੋਰ ਪੰਛੀ ਵਿੱਚ ਬਿਮਾਰੀ ਦੇ ਲੱਛਣ ਨਹੀਂ ਮਿਲੇ ਹਨ, ਪਰ ਹਾਲਾਤਾਂ ‘ਤੇ ਲਗਾਤਾਰ ਨਜ਼ਰ ਰੱਖੀ ਜਾ ਰਹੀ ਹੈ।
ਮੰਤਰੀ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਬਿਮਾਰ ਜਾਂ ਮਰੇ ਹੋਏ ਪੰਛੀਆਂ ਨੂੰ ਹੱਥ ਨਾ ਲਗਾਉਣ ਅਤੇ ਜੇਕਰ ਇੱਕੋ ਥਾਂ ‘ਤੇ ਤਿੰਨ ਜਾਂ ਇਸ ਤੋਂ ਵੱਧ ਬਿਮਾਰ ਜਾਂ ਮਰੇ ਹੋਏ ਪੰਛੀ ਨਜ਼ਰ ਆਉਣ ਤਾਂ ਤੁਰੰਤ ਇਸ ਦੀ ਸੂਚਨਾ ਮਿਨਿਸਟਰੀ ਫਾਰ ਪ੍ਰਾਈਮਰੀ ਇੰਡਸਟਰੀਜ਼ (MPI) ਦੀ ਐਕਜ਼ੋਟਿਕ ਅਤੇ ਪੈਸਟ ਡਿਜ਼ੀਜ਼ ਹਾਟਲਾਈਨ 0800 80 99 66 ‘ਤੇ ਦੇਣ।
ਰਿਪੋਰਟ ਕਰਦੇ ਸਮੇਂ ਪੰਛੀ ਦੀ ਕਿਸਮ, ਬਿਮਾਰ ਜਾਂ ਮਰੇ ਪੰਛੀਆਂ ਦੀ ਗਿਣਤੀ, ਸਹੀ ਸਥਾਨ (GPS ਜਾਂ ਹੋਰ ਜਾਣਕਾਰੀ) ਅਤੇ ਸੰਭਵ ਹੋਵੇ ਤਾਂ ਫੋਟੋ ਜਾਂ ਵੀਡੀਓ ਮੁਹੱਈਆ ਕਰਵਾਉਣ ਦੀ ਸਲਾਹ ਦਿੱਤੀ ਗਈ ਹੈ।
ਸਰਕਾਰ ਨੇ ਕਿਹਾ ਕਿ H5N1 ਨਾਲ ਨਜਿੱਠਣ ਲਈ ਪਹਿਲਾਂ ਹੀ ਤਿਆਰੀਆਂ ਕੀਤੀਆਂ ਜਾ ਚੁੱਕੀਆਂ ਹਨ। ਇਸ ਦਾ ਮਕਸਦ ਪੋਲਟਰੀ ਉਦਯੋਗ ਦੀ ਸੁਰੱਖਿਆ ਕਰਨਾ, ਜੰਗਲੀ ਜੀਵਾਂ ਦੀ ਰੱਖਿਆ ਕਰਨਾ ਅਤੇ ਭਾਈਚਾਰਿਆਂ ‘ਤੇ ਪੈਣ ਵਾਲੇ ਪ੍ਰਭਾਵ ਨੂੰ ਘੱਟ ਤੋਂ ਘੱਟ ਰੱਖਣਾ ਹੈ।
ਇਸ ਤੋਂ ਪਹਿਲਾਂ ਨਿਊਜ਼ੀਲੈਂਡ ਦੇ ਡਿਪਾਰਟਮੈਂਟ ਆਫ ਕਨਜ਼ਰਵੇਸ਼ਨ ਨੇ ਦੇਸ਼ ਦੇ ਪੰਜ ਸਭ ਤੋਂ ਵੱਧ ਖਤਰੇ ਵਾਲੇ ਪੰਛੀਆਂ ਦੀ ਸੁਰੱਖਿਆ ਲਈ ਟੀਕਾਕਰਨ ਮੁਹਿੰਮ ਵੀ ਸ਼ੁਰੂ ਕੀਤੀ ਸੀ।