ਫਰਾਂਸ ਦੇ ਦੱਖਣ-ਪੱਛਮੀ ਖੇਤਰ ਤੋਂ ਕਰੀਬ 12,000 ਲੋਕਾਂ ਨੂੰ ਸੁਰੱਖਿਅਤ ਥਾਵਾਂ ‘ਤੇ ਭੇਜਿਆ ਗਿਆ ਹੈ। ਗਿਰੋਂਦੇ ਖੇਤਰ ਵਿੱਚ ਜੰਗਲੀ ਅੱਗ ਫੈਲਦੀ ਜਾ ਰਹੀ ਹੈ, ਅਧਿਕਾਰੀਆਂ ਨੇ 8,800 ਹੋਰ ਲੋਕਾਂ ਨੂੰ ਕੱਢਣ ਦੀ ਪ੍ਰਕਿਰਿਆ ਸ਼ੁਰੂ ਕਰ ਦਿੱਤੀ ਹੈ। ਸਥਾਨਕ ਪ੍ਰਸ਼ਾਸਨ ਮੁਤਾਬਿਕ ਆਰਕਾਚੋਨ ਖਾੜੀ ਦੇ ਆਲੇ-ਦੁਆਲੇ ਦੀ ਕਰੀਬ 8,400 ਏਕੜ ਜ਼ਮੀਨ ਅੱਗ ਨਾਲ ਤਬਾਹ ਹੋ ਗਈ ਹੈ। ਕਰੀਬ 700 ਫਾਇਰਫਾਈਟਰ ਅੱਗ ‘ਤੇ ਕਾਬੂ ਪਾਉਣ ਲਈ ਲਗਾਤਾਰ ਕੰਮ ਕਰ ਰਹੇ ਹਨ।
ਫਰਾਂਸ ਤੋਂ ਇਲਾਵਾ ਸਪੇਨ ਅਤੇ ਇਟਲੀ ਵਿਚ ਵੀ ਹਾਲ ਦੇ ਦਿਨਾਂ ਵਿਚ ਜੰਗਲਾਂ ਵਿਚ ਅੱਗ ਲੱਗਣ ਦੀਆਂ ਘਟਨਾਵਾਂ ਸਾਹਮਣੇ ਆਈਆਂ ਹਨ। ਸਪੇਨ ਵਿੱਚ, ਮੈਡਰਿਡ ਦੇ ਪੱਛਮ ਅਤੇ ਦੱਖਣ ਵਿੱਚ ਕਈ ਖੇਤਰਾਂ ਵਿੱਚ ਹਜ਼ਾਰਾਂ ਲੋਕਾਂ ਨੂੰ ਆਪਣੇ ਘਰ ਖਾਲੀ ਕਰਨ ਦੇ ਆਦੇਸ਼ ਦਿੱਤੇ ਗਏ ਹਨ। ਇਟਲੀ ਦੇ ਸਿਸਲੀ ਇਲਾਕੇ ਵਿੱਚ ਅੱਗ ਬੁਝਾਉਣ ਦੌਰਾਨ ਇੱਕ ਫਾਇਰ ਫਾਈਟਰ ਦੀ ਸਿਹਤ ਵਿਗੜ ਜਾਣ ਕਾਰਨ ਮੌਤ ਹੋ ਗਈ ਸੀ।
ਗਿਰੋਂਡੇ ਦੀ ਪ੍ਰੀਫੈਕਟ ਸੋਫੀ ਬ੍ਰੋਕਾਸ ਨੇ ਕਿਹਾ ਕਿ ਰਾਤੋ-ਰਾਤ ਕੈਂਪ ਸਾਈਟਾਂ ਤੋਂ ਕੱਢੇ ਗਏ ਲੋਕਾਂ ਵਿੱਚ ਲਗਭਗ 10,000 ਸੈਲਾਨੀ ਸ਼ਾਮਿਲ ਸਨ। ਉਸਨੇ ਕਿਹਾ ਕਿ ਆਰਕਾਚੋਨ ਖਾੜੀ ਦੇ ਕੰਢੇ ਸਥਿਤ ਕਲੌਈ ਪਿੰਡ ਤੋਂ ਲੋਕਾਂ ਨੂੰ ਕੱਢਣ ਦਾ ਕੰਮ ਸ਼ਾਂਤੀਪੂਰਵਕ ਢੰਗ ਨਾਲ ਕੀਤਾ ਜਾ ਰਿਹਾ ਹੈ। ਸੋਫੀ ਬ੍ਰੋਕਾਸ ਨੇ ਇਹ ਵੀ ਕਿਹਾ ਕਿ ਹੁਣ ਤੱਕ ਕਿਸੇ ਦੇ ਜ਼ਖਮੀ ਹੋਣ ਦੀ ਰਿਪੋਰਟ ਨਹੀਂ ਹੈ। ਹਾਲਾਂਕਿ, ਸਾਵਧਾਨੀ ਵਜੋਂ ਕੁਝ ਸੜਕਾਂ ਅਤੇ ਖੁੱਲ੍ਹੇ ਜੰਗਲੀ ਖੇਤਰਾਂ ਵਿੱਚ ਥਾਵਾਂ ਨੂੰ ਬੰਦ ਕਰ ਦਿੱਤਾ ਗਿਆ ਹੈ।