ਅੱਜਕੱਲ੍ਹ ਸਕਿਨ ਕੇਅਰ ਰੁਟੀਨ ਵਿੱਚ ਫੇਸ ਪੈਕ ਦੀ ਵਰਤੋਂ ਕਾਫ਼ੀ ਆਮ ਹੋ ਗਈ ਹੈ। ਘਰੇਲੂ ਨੁਸਖਿਆਂ ਤੋਂ ਲੈ ਕੇ ਬਾਜ਼ਾਰ ਵਿੱਚ ਮਿਲਣ ਵਾਲੇ ਫੇਸ ਪੈਕ ਤੱਕ, ਲੋਕ ਚਮਕਦਾਰ ਅਤੇ ਤੰਦਰੁਸਤ ਚਮੜੀ ਲਈ ਇਨ੍ਹਾਂ ਦੀ ਵਰਤੋਂ ਕਰਦੇ ਹਨ। ਪਰ ਚਮੜੀ ਦੇ ਮਾਹਿਰਾਂ ਦਾ ਮੰਨਣਾ ਹੈ ਕਿ ਹਰ ਵਿਅਕਤੀ ਦੀ ਸਕਿਨ ਇੱਕੋ ਜਿਹੀ ਨਹੀਂ ਹੁੰਦੀ, ਇਸ ਲਈ ਹਰ ਕਿਸੇ ਲਈ ਫੇਸ ਪੈਕ ਲਾਭਦਾਇਕ ਨਹੀਂ ਹੁੰਦਾ। ਕੁਝ ਲੋਕਾਂ ਨੂੰ ਇਸ ਦੀ ਵਰਤੋਂ ਤੋਂ ਬਚਣਾ ਚਾਹੀਦਾ ਹੈ, ਨਹੀਂ ਤਾਂ ਚਮੜੀ ਨੂੰ ਨੁਕਸਾਨ ਵੀ ਹੋ ਸਕਦਾ ਹੈ।
ਜਿਨ੍ਹਾਂ ਲੋਕਾਂ ਨੂੰ ਮੁਹਾਂਸਿਆਂ (ਐਕਨੇ) ਦੀ ਸਮੱਸਿਆ ਹੈ, ਉਨ੍ਹਾਂ ਨੂੰ ਤੇਲ ਵਾਲੇ ਜਾਂ ਭਾਰੀ ਤੱਤਾਂ ਨਾਲ ਬਣੇ ਫੇਸ ਪੈਕ ਤੋਂ ਪਰਹੇਜ਼ ਕਰਨਾ ਚਾਹੀਦਾ ਹੈ। ਅਜਿਹੇ ਫੇਸ ਪੈਕ ਚਮੜੀ ਦੇ ਰੋਮ-ਛਿਦਰ (ਪੋਰਜ਼) ਬੰਦ ਕਰ ਸਕਦੇ ਹਨ, ਜਿਸ ਨਾਲ ਮੁਹਾਂਸਿਆਂ ਦੀ ਸਮੱਸਿਆ ਹੋਰ ਵੱਧ ਸਕਦੀ ਹੈ। ਇਸੇ ਤਰ੍ਹਾਂ ਜਿਨ੍ਹਾਂ ਲੋਕਾਂ ਨੂੰ ਕਿਸੇ ਖਾਸ ਚੀਜ਼, ਜਿਵੇਂ ਦੁੱਧ, ਫਲਾਂ ਜਾਂ ਕਿਸੇ ਹੋਰ ਸਮੱਗਰੀ ਨਾਲ ਐਲਰਜੀ ਹੈ, ਉਨ੍ਹਾਂ ਨੂੰ ਫੇਸ ਪੈਕ ਦੀ ਸਮੱਗਰੀ ਧਿਆਨ ਨਾਲ ਜਾਂਚਣੀ ਚਾਹੀਦੀ ਹੈ। ਬਿਨਾਂ ਜਾਂਚੇ ਇਸ ਦੀ ਵਰਤੋਂ ਕਰਨ ਨਾਲ ਚਮੜੀ ‘ਤੇ ਖੁਜਲੀ, ਰੈਸ਼ ਜਾਂ ਸੋਜ ਆ ਸਕਦੀ ਹੈ।
ਗਰਭ ਅਵਸਥਾ ਦੌਰਾਨ ਵੀ ਖਾਸ ਤੌਰ ‘ਤੇ ਕੈਮੀਕਲ ਵਾਲੇ ਫੇਸ ਪੈਕ ਦੀ ਵਰਤੋਂ ਤੋਂ ਬਚਣ ਦੀ ਸਲਾਹ ਦਿੱਤੀ ਜਾਂਦੀ ਹੈ। ਇਸ ਸਮੇਂ ਚਮੜੀ ਜ਼ਿਆਦਾ ਸੰਵੇਦਨਸ਼ੀਲ ਹੋ ਸਕਦੀ ਹੈ, ਇਸ ਲਈ ਕੋਈ ਵੀ ਨਵਾਂ ਉਤਪਾਦ ਵਰਤਣ ਤੋਂ ਪਹਿਲਾਂ ਡਾਕਟਰ ਜਾਂ ਸਕਿਨ ਮਾਹਿਰ ਦੀ ਸਲਾਹ ਲੈਣੀ ਚਾਹੀਦੀ ਹੈ।
ਗਲਤ ਫੇਸ ਪੈਕ ਲਗਾਉਣ ਨਾਲ ਚਮੜੀ ਲਾਲ ਹੋ ਸਕਦੀ ਹੈ, ਜਲਨ ਜਾਂ ਖੁਜਲੀ ਹੋ ਸਕਦੀ ਹੈ ਅਤੇ ਕਈ ਵਾਰ ਛੋਟੇ-ਛੋਟੇ ਦਾਣੇ ਵੀ ਨਿਕਲ ਸਕਦੇ ਹਨ। ਕੁਝ ਲੋਕਾਂ ਨੂੰ ਫੇਸ ਪੈਕ ਹਟਾਉਣ ਤੋਂ ਬਾਅਦ ਚਮੜੀ ਬਹੁਤ ਸੁੱਕੀ ਜਾਂ ਤਣੀ ਹੋਈ ਮਹਿਸੂਸ ਹੁੰਦੀ ਹੈ। ਜੇਕਰ ਕਿਸੇ ਸਮੱਗਰੀ ਨਾਲ ਐਲਰਜੀ ਹੋਵੇ ਤਾਂ ਚਿਹਰੇ ‘ਤੇ ਸੋਜ ਵੀ ਆ ਸਕਦੀ ਹੈ।
ਮਾਹਿਰਾਂ ਅਨੁਸਾਰ ਫੇਸ ਪੈਕ ਲਗਾਉਣ ਤੋਂ ਪਹਿਲਾਂ ਹੱਥ ਜਾਂ ਕੰਨ ਦੇ ਪਿੱਛੇ ਥੋੜ੍ਹਾ ਜਿਹਾ ਲਗਾ ਕੇ ਪੈਚ ਟੈਸਟ ਜ਼ਰੂਰ ਕਰਨਾ ਚਾਹੀਦਾ ਹੈ। ਜੇ 15 ਤੋਂ 20 ਮਿੰਟ ਤੱਕ ਕੋਈ ਰਿਐਕਸ਼ਨ ਨਾ ਹੋਵੇ ਤਾਂ ਹੀ ਇਸ ਨੂੰ ਚਿਹਰੇ ‘ਤੇ ਲਗਾਓ। ਫੇਸ ਪੈਕ ਨੂੰ ਲੋੜ ਤੋਂ ਵੱਧ ਸਮੇਂ ਤੱਕ ਚਿਹਰੇ ‘ਤੇ ਨਾ ਰੱਖੋ, ਕਿਉਂਕਿ ਇਸ ਨਾਲ ਚਮੜੀ ਸੁੱਕ ਸਕਦੀ ਹੈ। ਜੇਕਰ ਕਿਸੇ ਵੀ ਤਰ੍ਹਾਂ ਦੀ ਤਕਲੀਫ਼ ਮਹਿਸੂਸ ਹੋਵੇ ਤਾਂ ਤੁਰੰਤ ਚਿਹਰਾ ਪਾਣੀ ਨਾਲ ਧੋ ਕੇ ਡਾਕਟਰ ਨਾਲ ਸੰਪਰਕ ਕਰੋ। ਆਪਣੀ ਸਕਿਨ ਟਾਈਪ ਨੂੰ ਧਿਆਨ ਵਿੱਚ ਰੱਖ ਕੇ ਹੀ ਫੇਸ ਪੈਕ ਦੀ ਚੋਣ ਕਰਨੀ ਸਭ ਤੋਂ ਸੁਰੱਖਿਅਤ ਮੰਨੀ ਜਾਂਦੀ ਹੈ।