ਨਿਊਜ਼ੀਲੈਂਡ ਸਰਕਾਰ ਨੇ ਸੈਕੰਡਰੀ ਸਿੱਖਿਆ ਨੂੰ ਹੋਰ ਰੁਜ਼ਗਾਰ-ਕੇਂਦਰਿਤ ਬਣਾਉਣ ਲਈ ਵੱਡਾ ਕਦਮ ਚੁੱਕਦਿਆਂ 9 ਨਵੇਂ ਇੰਡਸਟਰੀ-ਅਧਾਰਿਤ ਵਿਸ਼ੇ ਸ਼ੁਰੂ ਕਰਨ ਦਾ ਐਲਾਨ ਕੀਤਾ ਹੈ। ਇਹ ਵਿਸ਼ੇ 2029 ਤੋਂ Year 12 ਅਤੇ Year 13 ਦੇ ਵਿਦਿਆਰਥੀਆਂ ਲਈ ਉਪਲਬਧ ਹੋਣਗੇ ਅਤੇ ਦੇਸ਼ ਦੀ ਨਵੀਂ ਯੋਗਤਾ ਪ੍ਰਣਾਲੀ ਦਾ ਹਿੱਸਾ ਬਣਨਗੇ, ਜੋ ਮੌਜੂਦਾ NCEA ਦੀ ਥਾਂ ਲਵੇਗੀ।
ਸਿੱਖਿਆ ਮੰਤਰੀ ਏਰਿਕਾ ਸਟੈਨਫੋਰਡ ਨੇ ਕਿਹਾ ਕਿ ਨਵੇਂ ਕੋਰਸ ਇਸ ਤਰ੍ਹਾਂ ਤਿਆਰ ਕੀਤੇ ਜਾਣਗੇ ਕਿ ਵਿਦਿਆਰਥੀ ਪੜ੍ਹਾਈ ਦੇ ਨਾਲ-ਨਾਲ ਉਹ ਹੁਨਰ ਵੀ ਹਾਸਿਲ ਕਰ ਸਕਣ, ਜਿਨ੍ਹਾਂ ਦੀ ਆਉਣ ਵਾਲੇ ਸਮੇਂ ਵਿੱਚ ਉਦਯੋਗਾਂ ਨੂੰ ਲੋੜ ਹੋਵੇਗੀ। ਇਸ ਨਾਲ ਨੌਜਵਾਨਾਂ ਲਈ ਰੁਜ਼ਗਾਰ, ਅਪ੍ਰੈਂਟਿਸਸ਼ਿਪ, ਟਰੇਡ ਟ੍ਰੇਨਿੰਗ ਅਤੇ ਉੱਚ ਸਿੱਖਿਆ ਦੇ ਰਸਤੇ ਹੋਰ ਮਜ਼ਬੂਤ ਹੋਣਗੇ।
ਸਰਕਾਰ ਵੱਲੋਂ ਐਲਾਨੇ ਗਏ ਨਵੇਂ ਵਿਸ਼ਿਆਂ ਵਿੱਚ Next-generation Manufacturing, Applied Intelligent Systems, Construction and Built Environment, Energy and Infrastructure, Engineering Technology, Food and Fibre Systems, Health Services and Care, Hospitality Food and Beverage ਅਤੇ Tourism ਸ਼ਾਮਿਲ ਹਨ। ਇਹ ਸਾਰੇ ਕੋਰਸ ਵੱਖ-ਵੱਖ ਉਦਯੋਗਾਂ ਦੀ ਭਾਗੀਦਾਰੀ ਨਾਲ ਤਿਆਰ ਕੀਤੇ ਜਾਣਗੇ ਤਾਂ ਜੋ ਪੜ੍ਹਾਈ ਅਤੇ ਰੁਜ਼ਗਾਰ ਵਿਚਕਾਰ ਦਾ ਅੰਤਰ ਘਟਾਇਆ ਜਾ ਸਕੇ।
Energy and Infrastructure Industry Skills Board ਦੇ ਮੁੱਖ ਕਾਰਜਕਾਰੀ ਫਿਲਿਪ ਐਲਡਰਿਜ ਨੇ ਕਿਹਾ ਕਿ ਇਹ ਬਦਲਾਅ ਵਿਦਿਆਰਥੀਆਂ ਨੂੰ ਆਪਣੇ ਕਰੀਅਰ ਦੀ ਦਿਸ਼ਾ ਚੁਣਨ ਵਿੱਚ ਵਧੀਆ ਮਦਦ ਦੇਣਗੇ। ਨਾਲ ਹੀ ਇਹ ਪਹਿਲ ਨਿਊਜ਼ੀਲੈਂਡ ਨੂੰ ਭਵਿੱਖ ਲਈ ਲੋੜੀਂਦੇ ਹੁਨਰਮੰਦ ਕਰਮਚਾਰੀ ਤਿਆਰ ਕਰਨ ਅਤੇ ਦੇਸ਼ ਦੀ ਆਰਥਿਕ ਤਰੱਕੀ ਨੂੰ ਮਜ਼ਬੂਤ ਕਰਨ ਵਿੱਚ ਵੀ ਅਹਿਮ ਭੂਮਿਕਾ ਨਿਭਾਏਗੀ।