ਨਿਊਜ਼ੀਲੈਂਡ ਦੇ ਡੁਨੇਡਿਨ ਸ਼ਹਿਰ ਦੇ ਕੈਵਰਸ਼ਮ ਇਲਾਕੇ ‘ਚ ਸ਼ਨੀਵਾਰ ਦੁਪਹਿਰ ਇੱਕ ਰਿਹਾਇਸ਼ੀ ਘਰ ਨੂੰ ਭਿਆਨਕ ਅੱਗ ਲੱਗ ਗਈ। ਅੱਗ ਲੱਗਣ ਤੋਂ ਬਾਅਦ ਘਰ ਵਿੱਚੋਂ ਉੱਚੀਆਂ ਲਪਟਾਂ ਅਤੇ ਕਾਲੇ ਧੂੰਏਂ ਦਾ ਵੱਡਾ ਗੁਬਾਰ ਅਸਮਾਨ ਵੱਲ ਉੱਠਦਾ ਦਿਖਾਈ ਦਿੱਤਾ, ਜਿਸ ਕਾਰਨ ਇਲਾਕੇ ਵਿੱਚ ਹੜਕੰਪ ਮਚ ਗਿਆ।
Fire and Emergency New Zealand (FENZ) ਮੁਤਾਬਿਕ, ਦੁਪਹਿਰ ਕਰੀਬ 12:40 ਵਜੇ ਲੁੱਕਆਉਟ ਪੌਇੰਟ ਖੇਤਰ ਵਿੱਚ ਘਰ ਨੂੰ ਅੱਗ ਲੱਗਣ ਦੀ ਸੂਚਨਾ ਮਿਲੀ। ਸ਼ੁਰੂਆਤ ਵਿੱਚ ਰੇਵਨਬੋਰਨ, ਬਰਾਈਟਨ, ਪੋਰਟ ਚਾਲਮਰਜ਼ ਅਤੇ ਆਉਟਰਾਮ ਤੋਂ ਚਾਰ ਫਾਇਰ ਕਰੂਆਂ ਨੂੰ ਮੌਕੇ ‘ਤੇ ਭੇਜਿਆ ਗਿਆ।
ਫਾਇਰ ਕਰਮਚਾਰੀਆਂ ਦੇ ਮੌਕੇ ‘ਤੇ ਪਹੁੰਚਣ ਤੱਕ ਅੱਗ ਨੇ ਘਰ ਦੇ ਵੱਡੇ ਹਿੱਸੇ ਨੂੰ ਆਪਣੀ ਲਪੇਟ ਵਿੱਚ ਲੈ ਲਿਆ ਸੀ। ਸਥਿਤੀ ਦੀ ਗੰਭੀਰਤਾ ਨੂੰ ਦੇਖਦੇ ਹੋਏ ਲੁੱਕਆਉਟ ਪੌਇੰਟ ਅਤੇ ਰੋਜ਼ਲਿਨ ਤੋਂ ਹੋਰ ਦੋ ਫਾਇਰ ਟਰੱਕ ਵੀ ਭੇਜੇ ਗਏ, ਜਿਸ ਨਾਲ ਕੁੱਲ ਛੇ ਫਾਇਰ ਟਰੱਕ ਅੱਗ ਬੁਝਾਉਣ ਦੇ ਕੰਮ ਵਿੱਚ ਜੁਟੇ ਰਹੇ।
ਫਿਲਹਾਲ ਅੱਗ ਲੱਗਣ ਦੇ ਕਾਰਨਾਂ ਬਾਰੇ ਕੋਈ ਜਾਣਕਾਰੀ ਸਾਹਮਣੇ ਨਹੀਂ ਆਈ। ਪੁਲਿਸ ਅਤੇ ਹਾਟੂ ਹੋਨ ਸੇਂਟ ਜੌਨ (Hato Hone St John) ਤੋਂ ਵੀ ਇਸ ਘਟਨਾ ਸਬੰਧੀ ਜਾਣਕਾਰੀ ਮੰਗੀ ਗਈ ਹੈ। ਅਧਿਕਾਰੀ ਮਾਮਲੇ ਦੀ ਜਾਂਚ ਕਰ ਰਹੇ ਹਨ।