ਫਿਜੀ ਦੇ ਨਾਡੀ ਅੰਤਰਰਾਸ਼ਟਰੀ ਹਵਾਈ ਅੱਡੇ ’ਤੇ ਈਂਧਨ ਦੀ ਕਮੀ ਕਾਰਨ ਏਅਰ ਨਿਊਜ਼ੀਲੈਂਡ ਸਮੇਤ ਕਈ ਏਅਰਲਾਈਨਾਂ ਦੀਆਂ ਉਡਾਣਾਂ ਪ੍ਰਭਾਵਿਤ ਹੋਈਆਂ ਹਨ। ਈਂਧਨ ਦੀ ਕਮੀ ਦੇ ਚਲਦਿਆਂ ਕੁਝ ਉਡਾਣਾਂ ਰੱਦ ਕੀਤੀਆਂ ਗਈਆਂ ਹਨ, ਜਦਕਿ ਕੁਝ ਜਹਾਜ਼ ਵਾਧੂ ਈਂਧਨ ਨਾਲ ਫਿਜੀ ਪਹੁੰਚ ਰਹੇ ਹਨ।
ਏਅਰ ਨਿਊਜ਼ੀਲੈਂਡ ਦੀ ਘੱਟੋ-ਘੱਟ ਇੱਕ ਨਾਡੀ ਉਡਾਣ ਰੱਦ ਕੀਤੀ ਗਈ ਹੈ। ਏਅਰਲਾਈਨ ਦੇ ਬੁਲਾਰੇ ਮੁਤਾਬਕ ਪਿਛਲੇ ਦੋ ਦਿਨਾਂ ਦੌਰਾਨ ਫਿਜੀ ਵਿੱਚ ਈਂਧਨ ਦੀਆਂ ਪਾਬੰਦੀਆਂ ਨੂੰ ਸੰਭਾਲਣ ਲਈ ਕਈ ਕਦਮ ਚੁੱਕੇ ਗਏ ਹਨ। ਇਨ੍ਹਾਂ ਵਿੱਚ ਵਾਧੂ ਈਂਧਨ ਲੈ ਕੇ ਉਡਾਣ ਭਰਨਾ, ਇੱਕ ਸੇਵਾ ਰੱਦ ਕਰਨਾ ਅਤੇ ਦੋ ਸੇਵਾਵਾਂ ਲਈ ਵੱਡੇ ਵਾਈਡਬਾਡੀ ਜਹਾਜ਼ਾਂ ਦੀ ਵਰਤੋਂ ਕਰਨਾ ਸ਼ਾਮਿਲ ਹੈ।
ਏਅਰਲਾਈਨ ਨੇ ਕਿਹਾ ਕਿ ਪ੍ਰਭਾਵਿਤ ਸਾਰੇ ਯਾਤਰੀਆਂ ਨੂੰ ਉਸੇ ਦਿਨ ਰਵਾਨਾ ਹੋਣ ਵਾਲੀਆਂ ਹੋਰ ਉਡਾਣਾਂ ਵਿੱਚ ਜਗ੍ਹਾ ਦੇ ਦਿੱਤੀ ਗਈ ਹੈ। ਏਅਰ ਨਿਊਜ਼ੀਲੈਂਡ ਨੇ ਯਾਤਰੀਆਂ ਦਾ ਸਬਰ ਅਤੇ ਸਹਿਯੋਗ ਲਈ ਧੰਨਵਾਦ ਕੀਤਾ ਅਤੇ ਕਿਹਾ ਕਿ ਵਿਘਨ ਨੂੰ ਘੱਟ ਤੋਂ ਘੱਟ ਕਰਨ ਦੀ ਕੋਸ਼ਿਸ਼ ਜਾਰੀ ਹੈ।
ਆਸਟ੍ਰੇਲੀਆ ਦੀਆਂ ਏਅਰਲਾਈਨਾਂ ਵੀ ਇਸ ਸੰਕਟ ਤੋਂ ਪ੍ਰਭਾਵਿਤ ਹੋਈਆਂ ਹਨ। ਵਰਜਿਨ ਆਸਟ੍ਰੇਲੀਆ ਨੇ ਦੱਸਿਆ ਕਿ ਫਿਜੀ ਵਿੱਚ ਈਂਧਨ ਦੀ ਕਮੀ ਕਾਰਨ ਉਸ ਦੀਆਂ ਨਾਡੀ ਜਾਣ ਵਾਲੀਆਂ ਕੁਝ ਉਡਾਣਾਂ ਵਿੱਚ ਪੋਰਟ ਵਿਲਾ ਜਾਂ ਨੂਮੇਆ ਵਿੱਚ ਈਂਧਨ ਭਰਿਆ ਜਾ ਰਿਹਾ ਹੈ। ਕੁਝ ਉਡਾਣਾਂ ਰੱਦ ਵੀ ਕੀਤੀਆਂ ਗਈਆਂ ਹਨ।
ਕੈਂਟਾਸ ਨੇ ਵੀ ਦੱਸਿਆ ਕਿ ਇਹ ਸਮੱਸਿਆ ਸਾਰੀਆਂ ਏਅਰਲਾਈਨਾਂ ਨੂੰ ਪ੍ਰਭਾਵਿਤ ਕਰ ਰਹੀ ਹੈ। ਇਸ ਤੋਂ ਬਚਣ ਲਈ ਕੈਂਟਾਸ ਸਿਡਨੀ-ਨਾਡੀ ਰੂਟ ’ਤੇ A330 ਜਹਾਜ਼ਾਂ ਦੀ ਵਰਤੋਂ ਕਰ ਰਹੀ ਹੈ, ਤਾਂ ਜੋ ਫਿਜੀ ਵਿੱਚ ਮੁੜ ਈਂਧਨ ਭਰਨ ਦੀ ਲੋੜ ਨਾ ਪਵੇ।
ਇਸ ਦੌਰਾਨ ਫਿਜੀ ਏਅਰਵੇਜ਼ ਨੇ ਕਿਹਾ ਹੈ ਕਿ ਉਸ ਨੂੰ ਆਪਣੀਆਂ ਉਡਾਣਾਂ ਵਿੱਚ ਵੱਡੇ ਵਿਘਨ ਦੀ ਉਮੀਦ ਨਹੀਂ ਹੈ। ਏਅਰਲਾਈਨ ਮੁਤਾਬਿਕ ਉਸ ਦੇ ਇੱਕ ਸਪਲਾਇਰ ਵੱਲੋਂ ਭੇਜਿਆ ਗਿਆ ਈਂਧਨ ਵਰਤੋਂਯੋਗ ਨਾ ਹੋਣ ਕਾਰਨ ਦੇਸ਼ ਵਿੱਚ ਈਂਧਨ ਦੀ ਕਮੀ ਪੈਦਾ ਹੋਈ ਹੈ।
ਫਿਜੀ ਏਅਰਵੇਜ਼ ਦੇ ਚੀਫ਼ ਓਪਰੇਸ਼ਨਜ਼ ਅਫਸਰ ਐਰੋਨ ਡੀਨ ਨੇ ਕਿਹਾ ਕਿ ਏਅਰਲਾਈਨ ਸਰਕਾਰੀ ਏਜੰਸੀਆਂ, ਫਿਜੀ ਏਅਰਪੋਰਟਸ ਲਿਮਟਿਡ ਅਤੇ ਉਦਯੋਗਿਕ ਭਾਈਵਾਲਾਂ ਨਾਲ ਮਿਲ ਕੇ ਕੰਮ ਕਰ ਰਹੀ ਹੈ, ਤਾਂ ਜੋ ਉਡਾਣਾਂ ਦਾ ਸੰਚਾਲਨ ਸੁਚਾਰੂ ਢੰਗ ਨਾਲ ਜਾਰੀ ਰਹੇ।
ਨਿਊਜ਼ੀਲੈਂਡ ਦੇ ਲੋਕਾਂ ਲਈ ਫਿਜੀ ਇੱਕ ਪ੍ਰਸਿੱਧ ਛੁੱਟੀਆਂ ਮਨਾਉਣ ਵਾਲੀ ਮੰਜ਼ਿਲ ਹੈ। ਪਿਛਲੇ ਸਾਲ 2.19 ਲੱਖ ਤੋਂ ਵੱਧ ਨਿਊਜ਼ੀਲੈਂਡ ਵਾਸੀਆਂ ਨੇ ਫਿਜੀ ਦਾ ਦੌਰਾ ਕੀਤਾ ਸੀ।