ਆਕਲੈਂਡ: ਪਾਰਨੇਲ ਇਲਾਕੇ ਵਿੱਚ ਮਿਲੀਆਂ ਚਾਰ $85 ਦੀਆਂ ਪਾਰਕਿੰਗ ਟਿਕਟਾਂ ਨੂੰ ਲੈ ਕੇ ਆਕਲੈਂਡ ਦੇ ਪਾਲ ਰਾਇਨ ਨੇ ਆਕਲੈਂਡ ਟਰਾਂਸਪੋਰਟ (AT) ਨੂੰ ਅਦਾਲਤ ਵਿੱਚ ਚੁਣੌਤੀ ਦਿੱਤੀ। ਰਾਇਨ ਨੇ ਮਾਮਲੇ ਨਾਲ ਸਬੰਧਿਤ ਕੈਮਰਾ ਫੁਟੇਜ ਦੀ ਮੰਗ ਕਰਦਿਆਂ ਦਾਅਵਾ ਕੀਤਾ ਕਿ ਉਨ੍ਹਾਂ ਨੂੰ ਆਪਣੀ ਕਾਰ ਨਾਲ ਸਬੰਧਿਤ ਫੁਟੇਜ ਦੀ ਬਜਾਏ ਕਈ ਘੰਟਿਆਂ ਦੀ ਵਿਆਪਕ ਰਿਕਾਰਡਿੰਗ ਦਿੱਤੀ ਗਈ।
ਉਨ੍ਹਾਂ ਮੁਤਾਬਿਕ ਫੁਟੇਜ ਵਿੱਚ ਸੜਕਾਂ, ਲੋਕਾਂ, ਨਿੱਜੀ ਜਾਇਦਾਦਾਂ ਅਤੇ ਕਾਰੋਬਾਰਾਂ ਦੀਆਂ ਤਸਵੀਰਾਂ ਵੀ ਕੈਦ ਹੋ ਰਹੀਆਂ ਸਨ। ਇਸ ਕਾਰਨ ਉਨ੍ਹਾਂ ਨੇ AT ਦੀ ਆਟੋਮੈਟਿਕ ਨੰਬਰ ਪਲੇਟ ਪਛਾਣ (ANPR) ਕੈਮਰਾ ਪ੍ਰਣਾਲੀ ਰਾਹੀਂ ਲੋਕਾਂ ਦੀ ਨਿਗਰਾਨੀ ਅਤੇ ਗੋਪਨੀਯਤਾ ਨੂੰ ਲੈ ਕੇ ਸਵਾਲ ਖੜ੍ਹੇ ਕੀਤੇ।
AT ਦਾ ਕਹਿਣਾ ਹੈ ਕਿ ਮੋਬਾਈਲ ਕੈਮਰਾ ਵਾਹਨਾਂ ਦੀ ਵਰਤੋਂ ਪਾਰਕਿੰਗ ਨਿਯਮਾਂ ਦੀ ਉਲੰਘਣਾ ਦੇ ਸਬੂਤ ਇਕੱਠੇ ਕਰਨ ਲਈ ਕੀਤੀ ਜਾਂਦੀ ਹੈ ਅਤੇ ਲੋੜ ਤੋਂ ਬਾਹਰ ਦੀ ਫੁਟੇਜ ਬਾਅਦ ਵਿੱਚ ਮਿਟਾ ਦਿੱਤੀ ਜਾਂਦੀ ਹੈ।
ਮਾਮਲੇ ਦੀ ਸੁਣਵਾਈ ਵਾਲੇ ਦਿਨ ਹੀ AT ਨੇ ਰਾਇਨ ਖ਼ਿਲਾਫ਼ ਜਾਰੀ ਕੀਤੇ ਚਾਰੋਂ ਇਨਫ੍ਰਿੰਜਮੈਂਟ ਨੋਟਿਸ ਵਾਪਸ ਲੈ ਲਏ। ਹੁਣ ਰਾਇਨ ਆਪਣੇ ਕੇਸ ਦੀ ਤਿਆਰੀ ’ਤੇ ਹੋਏ ਖਰਚੇ ਦੀ ਵਸੂਲੀ ਦੀ ਮੰਗ ਕਰ ਰਹੇ ਹਨ। ਮਾਮਲੇ ਨੇ ਪਾਰਕਿੰਗ ਲਾਗੂ ਕਰਨ ਲਈ ਵਰਤੀ ਜਾ ਰਹੀ ਕੈਮਰਾ ਤਕਨਾਲੋਜੀ ਅਤੇ ਲੋਕਾਂ ਦੀ ਗੋਪਨੀਯਤਾ ਬਾਰੇ ਚਰਚਾ ਛੇੜ ਦਿੱਤੀ ਹੈ।