ਨਿਊਜ਼ੀਲੈਂਡ ਵਿੱਚ ਵਧਦੇ ਬਿਜਲੀ ਬਿੱਲਾਂ ਨੂੰ ਲੈ ਕੇ ਲੋਕਾਂ ਵਿੱਚ ਨਾਰਾਜ਼ਗੀ ਵਧ ਰਹੀ ਹੈ। ਖਾਸ ਗੱਲ ਇਹ ਹੈ ਕਿ ਬਿੱਲਾਂ ਵਿੱਚ ਵਾਧੇ ਦੇ ਨਾਲ ਵੱਡੀਆਂ ਬਿਜਲੀ ਕੰਪਨੀਆਂ ਦੇ ਮੁਨਾਫ਼ੇ ਵੀ ਕਰੋੜਾਂ ਡਾਲਰ ਤੱਕ ਪਹੁੰਚ ਰਹੇ ਹਨ।
Mercury Energy ਨੇ ਟੈਕਸ ਤੋਂ ਬਾਅਦ 321 ਮਿਲੀਅਨ ਡਾਲਰ ਦਾ ਮੁਨਾਫ਼ਾ ਕਮਾਇਆ, ਜਦਕਿ Contact Energy ਦਾ ਸ਼ੁੱਧ ਮੁਨਾਫ਼ਾ ਰਿਕਾਰਡ 423 ਮਿਲੀਅਨ ਡਾਲਰ ਰਿਹਾ। ਇਸ ਦੌਰਾਨ ਪਿਛਲੇ ਸਾਲ ਬਿਜਲੀ ਦੀਆਂ ਕੀਮਤਾਂ ਕਰੀਬ 12 ਫੀਸਦੀ ਅਤੇ ਇਸ ਸਾਲ ਅਪ੍ਰੈਲ ਵਿੱਚ ਲਗਭਗ 8 ਫੀਸਦੀ ਵਧੀਆਂ।
Electric Kiwi ਅਤੇ 2Degrees ਦੇ ਸਰਵੇਖਣ ਵਿੱਚ ਕਈ ਖਪਤਕਾਰਾਂ ਨੇ ਮੰਨਿਆ ਕਿ ਮੌਜੂਦਾ ਬਿਜਲੀ ਬਾਜ਼ਾਰ ਉਨ੍ਹਾਂ ਦੇ ਹਿੱਤਾਂ ਲਈ ਠੀਕ ਤਰ੍ਹਾਂ ਕੰਮ ਨਹੀਂ ਕਰ ਰਿਹਾ।
ਹੁਣ ਸਭ ਦੀ ਨਜ਼ਰ Electricity Authority ਦੇ ਨਵੇਂ ਨਿਯਮਾਂ ‘ਤੇ ਹੈ। ਇਨ੍ਹਾਂ ਤਹਿਤ ਵੱਡੀਆਂ ਕੰਪਨੀਆਂ ਨੂੰ ਬਿਜਲੀ ਵੇਚਣ ਵਿੱਚ ਹੋਰ ਖਰੀਦਦਾਰਾਂ ਨਾਲ ਨਿਰਪੱਖ ਵਿਵਹਾਰ ਕਰਨਾ ਪਵੇਗਾ। ਸਵਾਲ ਇਹ ਹੈ ਕਿ ਕੀ ਇਨ੍ਹਾਂ ਨਿਯਮਾਂ ਨਾਲ ਆਮ ਲੋਕਾਂ ਦੇ ਵਧਦੇ ਬਿਜਲੀ ਬਿੱਲਾਂ ਨੂੰ ਰਾਹਤ ਮਿਲੇਗੀ?