ਵੈਲਿੰਗਟਨ ਦੇ ਕਾਰੋਬਾਰੀ ਅਮਨਦੀਪ ਬਖ਼ਸ਼ੀ ਦੇ ਹੱਕ ‘ਚ ਹਾਈ ਕੋਰਟ ਨੇ ਵੱਡਾ ਫੈਸਲਾ ਸੁਣਾਉਂਦਿਆਂ ਬਦਨਾਮੀ ਵਾਲੀ ਵੀਡੀਓ ਮਾਮਲੇ ਵਿੱਚ $201,279 ਤੋਂ ਵੱਧ ਦੀ ਰਕਮ ਦੇਣ ਦਾ ਹੁਕਮ ਦਿੱਤਾ ਹੈ।
ਮਾਮਲਾ ਜੁਲਾਈ 2025 ‘ਚ ਟਿਕਟੌਕ ’ਤੇ ਪਾਈ ਗਈ ਇੱਕ ਪੰਜਾਬੀ ਵੀਡੀਓ ਨਾਲ ਜੁੜਿਆ ਹੈ। ਵੀਡੀਓ ਵਿੱਚ ਬਖ਼ਸ਼ੀ ਦਾ ਨਾਮ ਸਿੱਧੇ ਤੌਰ ’ਤੇ ਨਹੀਂ ਲਿਆ ਗਿਆ ਸੀ, ਪਰ ਅਦਾਲਤ ਨੇ ਮੰਨਿਆ ਕਿ ਵੇਰਵਿਆਂ ਅਤੇ ਸੰਦਰਭ ਰਾਹੀਂ ਲੋਕ ਉਨ੍ਹਾਂ ਦੀ ਪਛਾਣ ਕਰ ਸਕਦੇ ਸਨ।
ਜਸਟਿਸ ਰੇਚਲ ਡਨਿੰਗਹਮ ਨੇ ਵੀਡੀਓ ਨੂੰ ਬਦਨਾਮੀ ਵਾਲਾ ਕਰਾਰ ਦਿੰਦਿਆਂ ਹਰਨੂਰ ਗਿੱਲ ਨੂੰ $100,000 ਅਤੇ ਸਾਬਕਾ ਕਰਮਚਾਰੀ ਪਰਸ ਕੰਬੋਜ ਨੂੰ ਇਸਨੂੰ ਇੰਸਟਾਗ੍ਰਾਮ ’ਤੇ ਸਾਂਝਾ ਕਰਨ ਲਈ $50,000 ਹਰਜਾਨਾ ਦੇਣ ਦਾ ਹੁਕਮ ਦਿੱਤਾ। ਇਸ ਤੋਂ ਇਲਾਵਾ $51,279 ਕਾਨੂੰਨੀ ਖਰਚੇ ਵੀ ਅਦਾ ਕਰਨੇ ਹੋਣਗੇ।
ਅਦਾਲਤ ਮੁਤਾਬਿਕ ਵੀਡੀਓ ਵਿੱਚ ਕਰਮਚਾਰੀਆਂ ਦੇ ਸ਼ੋਸ਼ਣ, ਔਰਤਾਂ ਨਾਲ ਜਬਰਦਸਤੀ ਅਤੇ ਧਮਕੀਆਂ ਵਰਗੇ ਗੰਭੀਰ ਦੋਸ਼ ਲਗਾਏ ਗਏ ਸਨ। ਬਖ਼ਸ਼ੀ ਨੇ ਕਿਹਾ ਕਿ ਵੀਡੀਓ ਤੋਂ ਬਾਅਦ ਭਾਰਤੀ ਭਾਈਚਾਰੇ ਵਿੱਚ ਉਨ੍ਹਾਂ ਦੀ ਸਾਖ ਪ੍ਰਭਾਵਿਤ ਹੋਈ ਅਤੇ ਪਰਿਵਾਰ ਨੂੰ ਵੀ ਮਾਨਸਿਕ ਪਰੇਸ਼ਾਨੀ ਝੱਲਣੀ ਪਈ।