ਨਿਊਜ਼ੀਲੈਂਡ: ਅਦਾਲਤ ਵੱਲੋਂ ਲਗਾਏ ਗਏ ਜੁਰਮਾਨੇ ਨਾ ਭਰਨ ਵਾਲੇ ਲੋਕਾਂ ਖ਼ਿਲਾਫ਼ ਨਿਊਜ਼ੀਲੈਂਡ ਵਿੱਚ ਸਰਕਾਰ ਨੇ ਕਾਰਵਾਈ ਤੇਜ਼ ਕਰ ਦਿੱਤੀ ਹੈ। ਇੱਕ ਦਿਨ ਦੀ ਵਿਸ਼ੇਸ਼ ਮੁਹਿੰਮ ਦੌਰਾਨ 70 ਤੋਂ ਵੱਧ ਵਾਹਨਾਂ ਨੂੰ ਕਲੈਂਪ ਕੀਤਾ ਗਿਆ ਜਾਂ ਜ਼ਬਤ ਕਰ ਲਿਆ ਗਿਆ।
ਨਿਆਂ ਮੰਤਰਾਲੇ ਨੇ ਇਸ ਕਾਰਵਾਈ ਲਈ 38 ਬੇਲਿਫ਼ਾਂ ਦੀਆਂ ਟੀਮਾਂ ਬਣਾਈਆਂ, ਜਿਨ੍ਹਾਂ ਨੂੰ ਆਕਲੈਂਡ, ਵੈਲਿੰਗਟਨ, ਕ੍ਰਾਈਸਟਚਰਚ, ਟੌਰੰਗਾ, ਹੈਮਿਲਟਨ, ਪਾਮਰਸਟਨ ਨੌਰਥ, ਹੇਸਟਿੰਗਜ਼, ਨੇਪੀਅਰ ਅਤੇ ਟਾਊਪੋ ਵਿੱਚ ਤਾਇਨਾਤ ਕੀਤਾ ਗਿਆ। ਬੇਲਿਫ਼ਾਂ ਨੇ ਵਾਹਨਾਂ ਦੀਆਂ ਨੰਬਰ ਪਲੇਟਾਂ ਸਕੈਨ ਕਰਨ ਲਈ ਆਟੋਮੈਟਿਕ ਨੰਬਰ ਪਲੇਟ ਰਿਕੋਗਨਿਸ਼ਨ ਤਕਨਾਲੋਜੀ ਦੀ ਵਰਤੋਂ ਕੀਤੀ।
ਬੁੱਧਵਾਰ ਨੂੰ ਕੁੱਲ 9,198 ਨੰਬਰ ਪਲੇਟਾਂ ਸਕੈਨ ਕੀਤੀਆਂ ਗਈਆਂ ਅਤੇ 224 ਅਜਿਹੇ ਲੋਕਾਂ ਦੀ ਪਛਾਣ ਹੋਈ, ਜਿਨ੍ਹਾਂ ਉੱਤੇ ਅਦਾਲਤੀ ਜੁਰਮਾਨੇ ਜਾਂ ਮੁਆਵਜ਼ੇ ਦੀ ਰਕਮ ਬਕਾਇਆ ਸੀ। ਇਸ ਦੌਰਾਨ 11 ਵਾਹਨ ਜ਼ਬਤ, 64 ਵਾਹਨ ਕਲੈਂਪ ਅਤੇ 113 ਚੇਤਾਵਨੀਆਂ ਜਾਰੀ ਕੀਤੀਆਂ ਗਈਆਂ।
ਮੌਕੇ ’ਤੇ ਹੀ 36 ਲੋਕਾਂ ਨੇ ਆਪਣੇ ਜੁਰਮਾਨੇ ਅਦਾ ਕੀਤੇ ਅਤੇ 34,000 ਨਿਊਜ਼ੀਲੈਂਡ ਡਾਲਰ ਤੋਂ ਵੱਧ ਦੀ ਰਕਮ ਇਕੱਠੀ ਕੀਤੀ ਗਈ। ਮੰਤਰਾਲੇ ਮੁਤਾਬਕ ਕਲੈਂਪ ਅਤੇ ਜ਼ਬਤ ਕੀਤੇ ਵਾਹਨਾਂ ਤੋਂ ਹੋਣ ਵਾਲੀ ਹੋਰ ਵਸੂਲੀ ਅਤੇ ਭੁਗਤਾਨ ਪ੍ਰਬੰਧਾਂ ਦੀ ਰਕਮ ਅਜੇ ਜੋੜੀ ਜਾ ਰਹੀ ਹੈ।
ਜੁਲਾਈ 2025 ਵਿੱਚ ਇਹ ਨਵੀਂ ਤਕਨਾਲੋਜੀ ਲਾਗੂ ਹੋਣ ਤੋਂ ਬਾਅਦ ਹੁਣ ਤੱਕ 4.2 ਮਿਲੀਅਨ ਡਾਲਰ ਦੇ ਬਕਾਇਆ ਜੁਰਮਾਨੇ ਵਸੂਲ ਕੀਤੇ ਜਾ ਚੁੱਕੇ ਹਨ। ਇਸ ਦੌਰਾਨ 400 ਤੋਂ ਵੱਧ ਵਾਹਨ ਜ਼ਬਤ, 750 ਵਾਹਨ ਕਲੈਂਪ ਅਤੇ 185 ਵਾਹਨ ਨਿਲਾਮੀ ਰਾਹੀਂ ਵੇਚੇ ਜਾ ਚੁੱਕੇ ਹਨ।