ਆਕਲੈਂਡ ਵਿੱਚ ਚੋਰੀ ਹੋਈ ਕਰੀਬ $90,000 ਕੀਮਤ ਦੀ Rolex ਘੜੀ ਤਿੰਨ ਸਾਲ ਬਾਅਦ ਆਪਣੇ ਅਸਲ ਮਾਲਕ ਤੱਕ ਪਹੁੰਚ ਗਈ। ਇਹ ਘੜੀ 2023 ਵਿੱਚ ਇੱਕ ਬਦਨਾਮ ਚੋਰ ਦੇ ਘਰੋਂ ਪੁਲਿਸ ਰੇਡ ਦੌਰਾਨ ਬਰਾਮਦ ਹੋਈ ਸੀ, ਪਰ ਇਸ ਦੇ ਮਾਲਕ ਦਾ ਪਤਾ ਨਹੀਂ ਲੱਗ ਸਕਿਆ ਸੀ।
North Shore ਪੁਲਿਸ ਸਟੇਸ਼ਨ ਦੀ ਅਧਿਕਾਰੀ Lisa Clark ਨੇ ਪੁਲਿਸ ਦੇ ਸਟੋਰ ਵਿੱਚ ਪਈ ਘੜੀ ਨੂੰ ਦੇਖ ਕੇ ਮਾਲਕ ਦੀ ਭਾਲ ਸ਼ੁਰੂ ਕੀਤੀ। ਬਰਗਲਰੀ ਰਿਕਾਰਡਾਂ ਵਿੱਚ ਜਾਣਕਾਰੀ ਨਾ ਮਿਲਣ ’ਤੇ ਉਸ ਨੇ ਨਿਊਜ਼ੀਲੈਂਡ, ਆਸਟ੍ਰੇਲੀਆ ਅਤੇ ਹਾਂਗਕਾਂਗ ਤੱਕ Rolex ਡੀਲਰਾਂ ਤੇ ਸਰਵਿਸ ਸੈਂਟਰਾਂ ਨਾਲ ਸੰਪਰਕ ਕੀਤਾ।
ਲਗਾਤਾਰ ਪੰਜ ਮਹੀਨਿਆਂ ਦੀ ਕੋਸ਼ਿਸ਼ ਤੋਂ ਬਾਅਦ Clark ਨੂੰ ਘੜੀ ਦੇ ਮਾਲਕ Matt Kim ਦਾ ਪਤਾ ਆਸਟ੍ਰੇਲੀਆ ਵਿੱਚ ਲੱਗ ਗਿਆ। Kim ਨੇ ਦੱਸਿਆ ਕਿ ਇਹ Rolex ਉਸ ਵੱਲੋਂ ਆਪਣੀ ਪਤਨੀ ਨੂੰ ਦਿੱਤੇ ਪਹਿਲੇ ਤੋਹਫ਼ਿਆਂ ਵਿੱਚੋਂ ਇੱਕ ਸੀ।
2023 ਦੀ ਚੋਰੀ ਤੋਂ ਬਾਅਦ ਪਰਿਵਾਰ ਇੰਨਾ ਸਦਮੇ ਵਿੱਚ ਸੀ ਕਿ ਉਹ ਨਿਊਜ਼ੀਲੈਂਡ ਛੱਡ ਕੇ ਆਸਟ੍ਰੇਲੀਆ ਚਲਾ ਗਿਆ ਸੀ। ਘੜੀ ਮਿਲਣ ਦੀ ਖ਼ਬਰ ਸੁਣ ਕੇ Kim ਨੇ ਕਿਹਾ ਕਿ ਉਹ ਤੁਰੰਤ ਜਹਾਜ਼ ਫੜ ਕੇ ਇਸ ਨੂੰ ਲੈਣ ਆਵੇਗਾ।
ਘੜੀ ਦੇ ਨਾਲ Kim ਦੀ ਪਤਨੀ ਦੇ ਕੁਝ ਡਿਜ਼ਾਈਨਰ ਬੈਗ ਅਤੇ ਹੀਰੇ ਦੀ ਅੰਗੂਠੀ ਵੀ ਬਰਾਮਦ ਹੋਈ। ਪੁਲਿਸ ਮੁਤਾਬਿਕ ਸਮਾਨ ਵਾਪਸ ਲੈਂਦੇ ਸਮੇਂ Kim ਦੀਆਂ ਅੱਖਾਂ ਵਿੱਚ ਹੰਝੂ ਸਨ। ਉਸ ਨੇ Lisa Clark ਦਾ ਧੰਨਵਾਦ ਕਰਦਿਆਂ ਕਿਹਾ ਕਿ ਪਰਿਵਾਰ ਉਸ ਨੂੰ ਕਦੇ ਨਹੀਂ ਭੁੱਲੇਗਾ।
Detective Sergeant Beth Bates ਨੇ Clark ਦੀ ਲਗਨ ਅਤੇ ਮਿਹਨਤ ਦੀ ਸ਼ਲਾਘਾ ਕਰਦਿਆਂ ਕਿਹਾ ਕਿ ਉਸ ਨੇ ਮਾਲਕ ਤੱਕ ਪਹੁੰਚਣ ਲਈ ਆਪਣੀ ਡਿਊਟੀ ਤੋਂ ਵੀ ਅੱਗੇ ਵੱਧ ਕੇ ਕੰਮ ਕੀਤਾ।