ਵਾਇਕਾਟੋ: ਨਿਊਜ਼ੀਲੈਂਡ ਦੇ ਵਾਇਕਾਟੋ ਇਲਾਕੇ ਵਿੱਚ ਪੁਲਿਸ ਨੇ ਇੱਕ ਵੱਡੇ ਪੱਧਰ ’ਤੇ ਚੱਲ ਰਹੇ ਕੈਨਾਬਿਸ ਉਗਾਉਣ ਦੇ ਨੈੱਟਵਰਕ ਦਾ ਪਰਦਾਫਾਸ਼ ਕੀਤਾ ਹੈ। ਪੁਲਿਸ ਨੇ ਹਾਲੀਆ ਮਹੀਨਿਆਂ ਦੌਰਾਨ 14 ਵੱਡੇ ਕੈਨਾਬਿਸ ਗਰੋ ਹਾਊਸ ਬੇਨਕਾਬ ਕੀਤੇ ਹਨ, ਜਿਨ੍ਹਾਂ ਦਾ ਸਬੰਧ ਵੀਅਤਨਾਮੀ ਨਾਗਰਿਕਾਂ ਨਾਲ ਦੱਸਿਆ ਜਾ ਰਿਹਾ ਹੈ। ਕਾਰਵਾਈ ਦੌਰਾਨ ਵੱਡੀ ਮਾਤਰਾ ਵਿੱਚ ਕੈਨਾਬਿਸ ਜ਼ਬਤ ਕੀਤੀ ਗਈ ਅਤੇ 8 ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ।
ਇੱਕ ਘਰ ’ਚੋਂ ਹੀ 750 ਕਿਲੋ ਕੈਨਾਬਿਸ!
ਵਾਇਕਾਟੋ ਆਰਗੇਨਾਈਜ਼ਡ ਕ੍ਰਾਈਮ ਸਕੁਆਡ ਵੱਲੋਂ ਕੀਤੀਆਂ ਤਲਾਸ਼ੀਆਂ ਦੌਰਾਨ ਹਰ ਇੱਕ ਜਾਇਦਾਦ ਵਿੱਚ ਲਗਭਗ 200 ਤੋਂ 600 ਕੈਨਾਬਿਸ ਦੇ ਪੌਦੇ ਮਿਲੇ। ਪੁਲਿਸ ਮੁਤਾਬਿਕ ਇੱਕ ਜਾਇਦਾਦ ਵਿੱਚੋਂ ਹੀ ਕਰੀਬ 750 ਕਿਲੋਗ੍ਰਾਮ ਕੈਨਾਬਿਸ ਬਰਾਮਦ ਕੀਤੀ ਗਈ।
ਡਿਟੈਕਟਿਵ ਸੀਨੀਅਰ ਸਰਜੈਂਟ ਨਾਈਜਲ ਕੀਲ ਨੇ ਦੱਸਿਆ ਕਿ ਇਨ੍ਹਾਂ ਗਰੋ ਹਾਊਸਾਂ ਵਿੱਚ ਬਿਜਲੀ ਦੀ ਗੈਰਕਾਨੂੰਨੀ ਵਰਤੋਂ ਵੀ ਕੀਤੀ ਜਾ ਰਹੀ ਸੀ। ਅੰਦਾਜ਼ਾ ਹੈ ਕਿ ਇੱਕ-ਇੱਕ ਥਾਂ ’ਤੇ ਬਿਜਲੀ ਚੋਰੀ ਰਾਹੀਂ ਮਹੀਨੇ ਦੇ 10,000 ਡਾਲਰ ਤੱਕ ਦਾ ਨੁਕਸਾਨ ਕੀਤਾ ਜਾ ਰਿਹਾ ਸੀ।
ਕਿਰਾਏ ਦੀਆਂ ਜਾਇਦਾਦਾਂ ਨੂੰ ਬਣਾ ਦਿੱਤਾ ‘ਗੁਪਤ ਫਾਰਮ’
ਪੁਲਿਸ ਅਨੁਸਾਰ ਕਿਰਾਏ ਦੇ ਰਿਹਾਇਸ਼ੀ ਅਤੇ ਕਮਰਸ਼ੀਅਲ ਮਕਾਨਾਂ ਨੂੰ ਅੰਦਰੋਂ ਪੂਰੀ ਤਰ੍ਹਾਂ ਬਦਲ ਕੇ ਕਮਰਸ਼ੀਅਲ ਗਰੋ ਓਪਰੇਸ਼ਨਾਂ ਲਈ ਵਰਤਿਆ ਜਾ ਰਿਹਾ ਸੀ। ਇਨ੍ਹਾਂ ਥਾਵਾਂ ’ਤੇ ਹਵਾ ਦੀ ਨਿਕਾਸੀ ਲਈ ਵੈਂਟੀਲੇਸ਼ਨ ਸਿਸਟਮ, ਪਾਣੀ ਦੀਆਂ ਲਾਈਨਾਂ ਅਤੇ ਹੋਰ ਵਿਸ਼ੇਸ਼ ਪ੍ਰਬੰਧ ਕੀਤੇ ਗਏ ਸਨ ਤਾਂ ਜੋ ਬਾਹਰੋਂ ਕਿਸੇ ਨੂੰ ਸ਼ੱਕ ਨਾ ਪਵੇ।
19 ਅਗਸਤ ਨੂੰ ਛਾਪਾ, ਪੰਜ ਵੀਅਤਨਾਮੀ ਨਾਗਰਿਕ ਗ੍ਰਿਫ਼ਤਾਰ
19 ਅਗਸਤ ਨੂੰ ਇੱਕ ਜਾਇਦਾਦ ’ਤੇ ਪੁਲਿਸ ਨੇ ਸਰਚ ਵਾਰੰਟ ਤਹਿਤ ਕਾਰਵਾਈ ਕੀਤੀ। ਇਸ ਦੌਰਾਨ ਪੰਜ ਵੀਅਤਨਾਮੀ ਨਾਗਰਿਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ, ਜਿਨ੍ਹਾਂ ’ਤੇ ਸਪਲਾਈ ਲਈ ਕੈਨਾਬਿਸ ਦੀ ਕਾਸ਼ਤ ਕਰਨ ਦੇ ਦੋਸ਼ ਲਗਾਏ ਗਏ। ਅਗਲੇ ਦਿਨ ਉਸੇ ਪਤੇ ਤੋਂ ਤਿੰਨ ਹੋਰ ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ।
ਫੇਕ ਕੰਧ ਪਿੱਛੇ ਬਣਿਆ ਸੀ ਪੂਰਾ ਇੰਡੋਰ ਗਰੋ ਓਪਰੇਸ਼ਨ
ਫ੍ਰੈਂਕਟਨ ਦੀ ਇੱਕ ਕਿਰਾਏ ਦੀ ਉਦਯੋਗਿਕ ਜਾਇਦਾਦ ’ਤੇ ਪੁਲਿਸ ਨੂੰ ਇੱਕ ਹੈਰਾਨ ਕਰਨ ਵਾਲਾ ਸੈਟਅੱਪ ਮਿਲਿਆ। ਇੱਥੇ ਕਈ ਗਰੋ ਰੂਮ, ਪਾਣੀ ਦੀਆਂ ਪ੍ਰਣਾਲੀਆਂ ਅਤੇ ਗੈਰਕਾਨੂੰਨੀ ਤਰੀਕੇ ਨਾਲ ਲਈ ਜਾ ਰਹੀ ਬਿਜਲੀ ਮੌਜੂਦ ਸੀ।
ਸਭ ਤੋਂ ਹੈਰਾਨੀਜਨਕ ਗੱਲ ਇਹ ਸੀ ਕਿ ਸੜਕ ਵੱਲੋਂ ਗਰੋ ਰੂਮਾਂ ਨੂੰ ਲੁਕਾਉਣ ਲਈ ਇੱਕ ਨਕਲੀ ਕੰਧ ਬਣਾਈ ਗਈ ਸੀ। ਪੁਲਿਸ ਨੇ ਇੱਥੋਂ ਵੱਖ-ਵੱਖ ਉਮਰ ਦੇ 580 ਕੈਨਾਬਿਸ ਪੌਦੇ ਬਰਾਮਦ ਕੀਤੇ।
ਮਾਲਕਾਂ ਨੂੰ ਵੀ ਨਹੀਂ ਸੀ ਪਤਾ !
ਪੁਲਿਸ ਨੇ ਦੱਸਿਆ ਕਿ ਜਿਨ੍ਹਾਂ ਜਾਇਦਾਦਾਂ ਵਿੱਚ ਇਹ ਕਾਰਵਾਈਆਂ ਚੱਲ ਰਹੀਆਂ ਸਨ, ਉਨ੍ਹਾਂ ਦੇ ਮਾਲਕ ਅਤੇ ਲੈਂਡਲਾਰਡ ਕਥਿਤ ਤੌਰ ’ਤੇ ਇਸ ਗਤੀਵਿਧੀ ਤੋਂ ਅਣਜਾਣ ਸਨ ਅਤੇ ਬਰਾਮਦਗੀ ਤੋਂ ਬਾਅਦ ਉਹ ਹੈਰਾਨ ਰਹਿ ਗਏ।
ਪੁਲਿਸ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਜੇਕਰ ਕਿਸੇ ਜਾਇਦਾਦ ਤੋਂ ਅਜੀਬ ਗੰਧ, ਅਸਧਾਰਨ ਉਪਕਰਨ ਜਾਂ ਸ਼ੱਕੀ ਗਤੀਵਿਧੀ ਨਜ਼ਰ ਆਵੇ ਤਾਂ ਇਸ ਬਾਰੇ ਪੁਲਿਸ ਨੂੰ ਜਾਣਕਾਰੀ ਦਿੱਤੀ ਜਾਵੇ।
ਲੈਂਡਲਾਰਡਾਂ ਨੂੰ ਇਨ੍ਹਾਂ ਨਿਸ਼ਾਨੀਆਂ ਤੋਂ ਰਹਿਣਾ ਹੋਵੇਗਾ ਸਾਵਧਾਨ
ਪੁਲਿਸ ਨੇ ਕਿਰਾਏ ਦੀਆਂ ਜਾਇਦਾਦਾਂ ਦੇ ਮਾਲਕਾਂ ਅਤੇ ਪ੍ਰਾਪਰਟੀ ਮੈਨੇਜਰਾਂ ਨੂੰ ਕੁਝ ‘ਰੈੱਡ ਫਲੈਗ’ ’ਤੇ ਨਜ਼ਰ ਰੱਖਣ ਲਈ ਕਿਹਾ ਹੈ:
ਖਿੜਕੀਆਂ ਨੂੰ ਕਾਲਾ ਕਰਨਾ ਜਾਂ ਹਮੇਸ਼ਾ ਲਈ ਢੱਕ ਕੇ ਰੱਖਣਾ।
ਵੱਡੇ ਐਗਜ਼ਾਸਟ ਫੈਨ ਜਾਂ ਵੈਂਟੀਲੇਸ਼ਨ ਸਿਸਟਮ ਲਗਾਉਣਾ।
ਜਾਇਦਾਦ ਦੇ ਢਾਂਚੇ ਵਿੱਚ ਬਿਨਾਂ ਇਜਾਜ਼ਤ ਤਬਦੀਲੀਆਂ ਕਰਨਾ।
ਕਿਰਾਇਆ ਨਕਦ ਦੇਣ ਦੀ ਪੇਸ਼ਕਸ਼ ਕਰਨਾ।
ਪ੍ਰਾਪਰਟੀ ਇੰਸਪੈਕਸ਼ਨ ਤੋਂ ਬਚਣ ਲਈ ਵੱਧ ਕਿਰਾਇਆ ਦੇਣ ਦੀ ਪੇਸ਼ਕਸ਼ ਕਰਨਾ।
ਪੁਲਿਸ ਨੇ ਦੱਸਿਆ ਕਿ ਇਸ ਮਾਮਲੇ ਵਿੱਚ ਚਾਰਜ ਕੀਤੇ ਗਏ ਵਿਅਕਤੀਆਂ ਸਬੰਧੀ ਇਮੀਗ੍ਰੇਸ਼ਨ ਨਿਊਜ਼ੀਲੈਂਡ ਨਾਲ ਵੀ ਕੰਮ ਕੀਤਾ ਜਾ ਰਿਹਾ ਹੈ।
ਆਕਲੈਂਡ ’ਚ ਵੀ ਕੁਝ ਦਿਨ ਪਹਿਲਾਂ ਵੱਡੀ ਕਾਰਵਾਈ
ਵਾਇਕਾਟੋ ਦੀ ਇਸ ਕਾਰਵਾਈ ਤੋਂ ਪਹਿਲਾਂ ਪੁਲਿਸ ਨੇ ਆਕਲੈਂਡ ਵਿੱਚ ਵੀ ਇੱਕ ਕਥਿਤ ਵੀਅਤਨਾਮੀ ਕੈਨਾਬਿਸ ਸਿੰਡੀਕੇਟ ਖ਼ਿਲਾਫ਼ ਵੱਡੀ ਕਾਰਵਾਈ ਕੀਤੀ ਸੀ। ਪੁਲਿਸ ਨੇ 19 ਥਾਵਾਂ ’ਤੇ ਛਾਪੇ ਮਾਰੇ ਅਤੇ 12 ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਸੀ।
ਫਲੈਟ ਬੁਸ਼, ਹਾਵਿਕ, ਸਿਲਵੀਆ ਪਾਰਕ, ਵਿਰੀ ਅਤੇ ਮੈਸੀ ਸਮੇਤ ਕਈ ਇਲਾਕਿਆਂ ਵਿੱਚ ਹੋਈ ਇਸ ਕਾਰਵਾਈ ਨੂੰ ਪੁਲਿਸ ਨੇ ਕਥਿਤ ਤੌਰ ’ਤੇ ਦੇਸ਼ ਦੇ ਸਭ ਤੋਂ ਵੱਡੇ ਸਿੰਡੀਕੇਟਾਂ ਵਿੱਚੋਂ ਇੱਕ ਦੱਸਿਆ।
ਛਾਪਿਆਂ ਦੌਰਾਨ ਕਰੀਬ 12.5 ਲੱਖ ਨਿਊਜ਼ੀਲੈਂਡ ਡਾਲਰ ਦਾ ਕੈਨਾਬਿਸ ਉਗਾਉਣ ਵਾਲਾ ਸਾਮਾਨ ਅਤੇ 80,000 ਡਾਲਰ ਨਕਦ ਵੀ ਜ਼ਬਤ ਕੀਤਾ ਗਿਆ। ਕਥਿਤ ਸਿੰਡੀਕੇਟ ਦਾ 36 ਸਾਲਾ ਫਲੈਟ ਬੁਸ਼ ਵਾਸੀ ਮੁੱਖ ਸਰਗਨਾ ਵੀ ਗ੍ਰਿਫ਼ਤਾਰ ਕੀਤੇ ਗਏ ਲੋਕਾਂ ਵਿੱਚ ਸ਼ਾਮਲ ਸੀ।