ਨਿਊਜ਼ੀਲੈਂਡ ਦੀ ਰਾਸ਼ਟਰੀ ਏਅਰਲਾਈਨ Air New Zealand ਨੇ ਜੈੱਟ ਫਿਊਲ ਦੀਆਂ ਵਧਦੀਆਂ ਕੀਮਤਾਂ ਦੇ ਮੱਦੇਨਜ਼ਰ ਆਪਣੀਆਂ ਉਡਾਣਾਂ ਦੇ ਕਿਰਾਏ ਵਧਾਉਣ ਦਾ ਫੈਸਲਾ ਕੀਤਾ ਹੈ। ਏਅਰਲਾਈਨ ਦਾ ਕਹਿਣਾ ਹੈ ਕਿ ਮੱਧ ਪੂਰਬ ਵਿੱਚ ਚੱਲ ਰਹੇ ਤਣਾਅ ਕਾਰਨ ਤੇਲ ਦੀਆਂ ਕੀਮਤਾਂ ਵਿੱਚ ਤੇਜ਼ ਵਾਧਾ ਹੋਇਆ ਹੈ, ਜਿਸਦਾ ਸਿੱਧਾ ਅਸਰ ਹਵਾਈ ਯਾਤਰਾ ਦੇ ਖਰਚੇ ‘ਤੇ ਪਿਆ ਹੈ।
ਨਵੇਂ ਫੈਸਲੇ ਤਹਿਤ ਘਰੇਲੂ ਉਡਾਣਾਂ ਦੇ ਇਕ ਪਾਸੇ ਦੇ ਕਿਰਾਏ ਵਿੱਚ ਕਰੀਬ $10 ਦਾ ਵਾਧਾ ਕੀਤਾ ਗਿਆ ਹੈ। ਇਸੇ ਤਰ੍ਹਾਂ ਛੋਟੀ ਦੂਰੀ ਵਾਲੀਆਂ ਅੰਤਰਰਾਸ਼ਟਰੀ ਉਡਾਣਾਂ ਲਈ $20 ਵੱਧ ਲੱਗੇਗਾ, ਜਦਕਿ ਲੰਬੀ ਦੂਰੀ ਵਾਲੀਆਂ ਉਡਾਣਾਂ ਵਿੱਚ $90 ਤੱਕ ਦਾ ਵਾਧਾ ਕੀਤਾ ਗਿਆ ਹੈ।
ਇਸ ਵਾਧੇ ਦਾ ਸਿੱਧਾ ਅਸਰ ਯਾਤਰੀਆਂ ਦੀ ਜੇਬ ‘ਤੇ ਪਵੇਗਾ। ਉਦਾਹਰਨ ਵਜੋਂ, ਜੇ ਚਾਰ ਮੈਂਬਰਾਂ ਦਾ ਪਰਿਵਾਰ ਵਿਦੇਸ਼ ਯਾਤਰਾ ਕਰਦਾ ਹੈ ਤਾਂ ਉਨ੍ਹਾਂ ਨੂੰ ਟਿਕਟਾਂ ‘ਤੇ ਲਗਭਗ $720 ਤੱਕ ਵੱਧ ਖਰਚਾ ਕਰਨਾ ਪੈ ਸਕਦਾ ਹੈ।
ਮੌਜੂਦਾ ਕਿਰਾਏ ਅਨੁਸਾਰ Auckland ਤੋਂ New York ਲਈ ਇਕਾਨੋਮੀ ਕਲਾਸ ਦੀ ਟਿਕਟ ਲਗਭਗ $3058 ਦੇ ਕਰੀਬ ਹੈ। ਇਸ ਤੋਂ ਇਲਾਵਾ Auckland ਤੋਂ Rotorua ਤੱਕ ਘਰੇਲੂ ਉਡਾਣਾਂ ਦੇ ਕਿਰਾਏ ਕਰੀਬ $159 ਤੋਂ ਸ਼ੁਰੂ ਹੁੰਦੇ ਹਨ, ਜਦਕਿ Blenheim ਤੋਂ Wellington ਤੱਕ ਇਕ ਪਾਸੇ ਦਾ ਕਿਰਾਇਆ ਲਗਭਗ $145 ਦੱਸਿਆ ਗਿਆ ਹੈ।
ਏਅਰਲਾਈਨ ਦੇ ਅਨੁਸਾਰ ਪਹਿਲਾਂ ਜੈੱਟ ਫਿਊਲ ਦੀ ਕੀਮਤ ਲਗਭਗ $85 ਪ੍ਰਤੀ ਬੈਰਲ ਮੰਨੀ ਜਾ ਰਹੀ ਸੀ, ਪਰ ਹੁਣ ਇਹ ਵਧ ਕੇ $150 ਤੋਂ $200 ਪ੍ਰਤੀ ਬੈਰਲ ਦੇ ਦਰਮਿਆਨ ਪਹੁੰਚ ਗਈ ਹੈ।
ਹਵਾਈ ਉਦਯੋਗ ਦੇ ਮਾਹਿਰਾਂ ਦਾ ਕਹਿਣਾ ਹੈ ਕਿ ਜੇ ਫਿਊਲ ਦੀਆਂ ਕੀਮਤਾਂ ਇੰਝ ਹੀ ਉੱਚੀਆਂ ਰਹਿੰਦੀਆਂ ਹਨ ਤਾਂ ਆਉਣ ਵਾਲੇ ਸਮੇਂ ਵਿੱਚ ਹਵਾਈ ਯਾਤਰਾ ਹੋਰ ਵੀ ਮਹਿੰਗੀ ਹੋ ਸਕਦੀ ਹੈ, ਜਿਸ ਨਾਲ ਯਾਤਰੀਆਂ ਨੂੰ ਵਧੇਰੇ ਖਰਚੇ ਦਾ ਸਾਹਮਣਾ ਕਰਨਾ ਪਵੇਗਾ।