ਨਿਊਜ਼ੀਲੈਂਡ ਦੇ ਕੈਂਟਰਬਰੀ ਖੇਤਰ ਵਿੱਚ ਪੁਲਿਸ ਵੱਲੋਂ ਕੀਤੀ ਗਈ ਕਾਰਵਾਈ ਦੌਰਾਨ ਮੋਂਗਰਲ ਮੌਬ ਗੈਂਗ ਦੇ ਦੋ ਮੈਂਬਰਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਇਸ ਦੌਰਾਨ ਚੋਰੀ ਕੀਤੀਆਂ ਗੱਡੀਆਂ, ਨਸ਼ੀਲੇ ਪਦਾਰਥ, ਹਥਿਆਰ ਅਤੇ ਨਕਦੀ ਵੀ ਬਰਾਮਦ ਕੀਤੀ ਗਈ ਹੈ। ਡਿਟੈਕਟਿਵ ਸੀਨੀਅਰ ਸਰਜੰਟ ਡੇਮਨ ਵੇਲਜ਼ ਨੇ ਦੱਸਿਆ ਕਿ ਪਿਛਲੇ ਦੋ ਹਫ਼ਤਿਆਂ ਦੌਰਾਨ ਪੁਲਿਸ ਨੇ ਕ੍ਰਾਈਸਟਚਰਚ ਅਤੇ ਨਾਰਥ ਕੈਂਟਰਬਰੀ ਵਿੱਚ ਮੋਂਗਰਲ ਮੌਬ ਗੈਂਗ ਨਾਲ ਸੰਬੰਧਿਤ ਜਾਇਦਾਦਾਂ ‘ਤੇ ਕਈ ਤਲਾਸ਼ੀ ਵਾਰੰਟਾਂ ਅਧੀਨ ਛਾਪੇ ਮਾਰੇ ਹਨ।
ਇਸ ਕਾਰਵਾਈ ਦੌਰਾਨ ਪੁਲਿਸ ਨੇ ਹਜ਼ਾਰਾਂ ਡਾਲਰ ਮੁੱਲ ਦੀ ਮੈਥਐਂਫੈਟਾਮਿਨ, ਕਈ ਹਥਿਆਰ ਅਤੇ ਗੋਲਾ-ਬਾਰੂਦ ਬਰਾਮਦ ਕੀਤਾ। ਇਸਦੇ ਨਾਲ ਹੀ ਇੱਕ ਕਥਿਤ “ਚਾਪ ਸ਼ਾਪ” ਵੀ ਬੇਨਕਾਬ ਕੀਤੀ ਗਈ, ਜਿੱਥੇ ਚੋਰੀ ਕੀਤੀਆਂ ਗੱਡੀਆਂ ਨੂੰ ਤੋੜ ਕੇ ਪੁਰਜ਼ਿਆਂ ਵਜੋਂ ਵੇਚਿਆ ਜਾਂਦਾ ਜਾਂ ਫਿਰ ਉਨ੍ਹਾਂ ਨੂੰ ਬਿਨਾਂ ਪਛਾਣ ਨਿਸ਼ਾਨਾਂ ਦੇ ਨਾਲ ਮੁੜ ਜੋੜਿਆ ਜਾਂਦਾ ਸੀ।
ਪੁਲਿਸ ਨੇ ਇੱਥੋਂ ਕਈ ਚੋਰੀਸ਼ੁਦਾ ਵਾਹਨ ਵੀ ਬਰਾਮਦ ਕੀਤੇ। ਇਸਦੇ ਇਲਾਵਾ ਅਦਾਲਤੀ ਕਾਰਵਾਈ ਰਾਹੀਂ ਜੁਰਮਾਨੇ ਨਾ ਭਰਨ ਕਾਰਨ ਹੋਰ ਪੰਜ ਵਾਹਨ ਵੀ ਜ਼ਬਤ ਕੀਤੇ ਗਏ ਹਨ।
ਪੁਲਿਸ ਨੇ ਮੋਂਗਰਲ ਮੌਬ ਦੇ ਦੋ ਮੈਂਬਰਾਂ ਨੂੰ ਗ੍ਰਿਫ਼ਤਾਰ ਕਰਕੇ ਹਿਰਾਸਤ ਵਿੱਚ ਭੇਜ ਦਿੱਤਾ ਹੈ। 34 ਸਾਲਾ ਅਤੇ 29 ਸਾਲਾ ਦੋਵੇਂ ਮੁਲਜ਼ਮ ਆਉਣ ਵਾਲੇ ਹਫ਼ਤਿਆਂ ਵਿੱਚ ਕ੍ਰਾਈਸਟਚਰਚ ਜ਼ਿਲ੍ਹਾ ਅਦਾਲਤ ਵਿੱਚ ਪੇਸ਼ ਹੋਣਗੇ।
ਉਨ੍ਹਾਂ ‘ਤੇ ਵਾਹਨ ਚਲਾਉਣ ਨਾਲ ਸੰਬੰਧਿਤ ਉਲੰਘਣਾਵਾਂ, ਨਸ਼ੇ ਦੀ ਸਪਲਾਈ ਲਈ ਮੈਥਐਂਫੈਟਾਮਿਨ ਰੱਖਣ, ਕੈਨੇਬਿਸ ਰੱਖਣ ਅਤੇ ਗੈਰਕਾਨੂੰਨੀ ਤੌਰ ‘ਤੇ ਗੋਲਾ-ਬਾਰੂਦ ਰੱਖਣ ਵਰਗੇ ਦੋਸ਼ ਲਗਾਏ ਗਏ ਹਨ।