ਨਿਊਜ਼ੀਲੈਂਡ ‘ਚ ਪੈਟਰੋਲ ਦੀਆਂ ਕੀਮਤਾਂ ਵਿੱਚ ਹੋ ਰਹੇ ਵਾਧੇ ਦੇ ਮੱਦੇਨਜ਼ਰ ਸਰਕਾਰੀ ਕਰਮਚਾਰੀਆਂ ਲਈ “ਵਰਕ ਫ੍ਰੋਮ ਹੋਮ” ਨੀਤੀ ਲਾਗੂ ਕਰਨ ਦੀ ਮੰਗ ਉੱਠ ਰਹੀ ਹੈ। ਪਬਲਿਕ ਸਰਵਿਸ ਐਸੋਸੀਏਸ਼ਨ ਨੇ ਸਰਕਾਰ ਨੂੰ ਅਪੀਲ ਕੀਤੀ ਹੈ ਕਿ ਜਿੱਥੇ ਸੰਭਵ ਹੋਵੇ ਉੱਥੇ ਕਰਮਚਾਰੀਆਂ ਨੂੰ ਘਰੋਂ ਕੰਮ ਕਰਨ ਦੀ ਆਗਿਆ ਦਿੱਤੀ ਜਾਵੇ, ਤਾਂ ਜੋ ਫਿਊਲ ਦੀ ਖਪਤ ਘਟ ਸਕੇ ਅਤੇ ਲੋਕਾਂ ‘ਤੇ ਵਧ ਰਹੇ ਖਰਚੇ ਦਾ ਬੋਝ ਕੁਝ ਘੱਟ ਹੋ ਸਕੇ।
ਸੰਸਥਾ ਦੀ ਰਾਸ਼ਟਰੀ ਸਕੱਤਰ ਫਲੂਰ ਫਿਟਜ਼ਸਿਮਨਜ਼ ਨੇ ਕਿਹਾ ਕਿ ਜੇ ਕਰਮਚਾਰੀ ਘਰੋਂ ਕੰਮ ਕਰਨ ਤਾਂ ਰੋਜ਼ਾਨਾ ਦਫ਼ਤਰ ਆਉਣ-ਜਾਣ ਦੀ ਲੋੜ ਘੱਟ ਹੋਵੇਗੀ, ਜਿਸ ਨਾਲ ਫਿਊਲ ਦੀ ਬਚਤ ਵੀ ਹੋਵੇਗੀ ਅਤੇ ਲੋਕਾਂ ਨੂੰ ਮਹਿੰਗੇ ਪੈਟਰੋਲ ਤੋਂ ਕੁਝ ਰਾਹਤ ਮਿਲ ਸਕੇਗੀ। ਮੱਧ ਪੂਰਬ ‘ਚ ਚੱਲ ਰਹੇ ਤਣਾਅ ਕਾਰਨ ਵਿਸ਼ਵ ਪੱਧਰ ‘ਤੇ ਤੇਲ ਦੀ ਸਪਲਾਈ ਪ੍ਰਭਾਵਿਤ ਹੋ ਰਹੀ ਹੈ, ਜਿਸਦਾ ਅਸਰ ਨਿਊਜ਼ੀਲੈਂਡ ਵਿੱਚ ਵੀ ਵੇਖਣ ਨੂੰ ਮਿਲ ਰਿਹਾ ਹੈ। ਕਈ ਇਲਾਕਿਆਂ ਵਿੱਚ ਪੈਟਰੋਲ ਦੀ ਕੀਮਤ ਕਰੀਬ 3 ਡਾਲਰ ਪ੍ਰਤੀ ਲੀਟਰ ਤੱਕ ਪਹੁੰਚ ਗਈ ਹੈ, ਜਿਸ ਨਾਲ ਆਮ ਲੋਕਾਂ ਲਈ ਰੋਜ਼ਾਨਾ ਦੀ ਯਾਤਰਾ ਮਹਿੰਗੀ ਪੈ ਰਹੀ ਹੈ।
ਇਸੇ ਤਰ੍ਹਾਂ ਕੁਝ ਹੋਰ ਦੇਸ਼ਾਂ, ਜਿਵੇਂ ਵੀਆਤਨਾਮ ਅਤੇ ਥਾਈਲੈਂਡ, ਵਿੱਚ ਵੀ ਲੋਕਾਂ ਨੂੰ ਫਿਊਲ ਦੀ ਬਚਤ ਲਈ ਘਰੋਂ ਕੰਮ ਕਰਨ ਦੀ ਸਲਾਹ ਦਿੱਤੀ ਜਾ ਰਹੀ ਹੈ। ਦੂਜੇ ਪਾਸੇ ਨਿੱਜੀ ਖੇਤਰ ਦੀਆਂ ਕੁਝ ਵੱਡੀਆਂ ਕੰਪਨੀਆਂ ਪਹਿਲਾਂ ਹੀ ਲਚਕਦਾਰ ਕੰਮ ਪ੍ਰਣਾਲੀ ਅਪਣਾ ਰਹੀਆਂ ਹਨ ਅਤੇ ਆਪਣੇ ਕਰਮਚਾਰੀਆਂ ਨੂੰ ਹਫ਼ਤੇ ਵਿੱਚ ਕੁਝ ਦਿਨ ਘਰੋਂ ਕੰਮ ਕਰਨ ਦੀ ਸੁਵਿਧਾ ਦੇ ਰਹੀਆਂ ਹਨ।