ਨਿਊਜ਼ੀਲੈਂਡ ਦੇ ਕ੍ਰਾਈਸਚਰਚ ਸ਼ਹਿਰ ਦੇ ਬਰਨਸਾਈਡ ਇਲਾਕੇ ਵਿੱਚ ਇੱਕ ਸ਼ੱਕੀ ਅਤੇ ਉੱਚ-ਖਤਰੇ ਵਾਲਾ ਧਮਾਕੇਖੇਜ਼ ਪਦਾਰਥ ਮਿਲਣ ਤੋਂ ਬਾਅਦ ਲੋਕਾਂ ਨੂੰ ਤੁਰੰਤ ਇਲਾਕਾ ਖਾਲੀ ਕਰਨ ਲਈ ਕਿਹਾ ਗਿਆ ਸੀ। ਬਾਅਦ ਵਿੱਚ ਪੁਲਿਸ ਨੇ ਦੱਸਿਆ ਕਿ ਇਸ ਪਦਾਰਥ ਨੂੰ ਹੁਣ ਸੁਰੱਖਿਅਤ ਢੰਗ ਨਾਲ ਹਟਾ ਦਿੱਤਾ ਗਿਆ ਹੈ। ਪੁਲਿਸ ਨੂੰ ਵੀਰਵਾਰ ਦੁਪਹਿਰ ਕਰੀਬ 2:30 ਵਜੇ ਸ਼ੈਫੀਲਡ ਕ੍ਰੈਸੈਂਟ (Sheffield Crescent) ਇਲਾਕੇ ਵਿੱਚ ਇੱਕ “ਚਿੰਤਾਜਨਕ ਪਦਾਰਥ” ਬਾਰੇ ਸੂਚਨਾ ਮਿਲੀ ਸੀ। ਇਸ ਤੋਂ ਬਾਅਦ ਪੁਲਿਸ ਨੇ ਇਲਾਕੇ ‘ਚ ਘੇਰਾਬੰਦੀ ਕਰ ਦਿੱਤੀ ਅਤੇ ਨੇੜਲੇ ਲੋਕਾਂ ਨੂੰ ਐਮਰਜੈਂਸੀ ਮੋਬਾਈਲ ਅਲਰਟ ਭੇਜ ਕੇ ਤੁਰੰਤ ਇਲਾਕਾ ਖਾਲੀ ਕਰਨ ਦੀ ਅਪੀਲ ਕੀਤੀ।
ਅਲਰਟ ਵਿੱਚ ਕਿਹਾ ਗਿਆ ਕਿ:
“ਸ਼ੈਫੀਲਡ ਕ੍ਰੈਸੈਂਟ, ਬਰਨਸਾਈਡ, ਕ੍ਰਾਈਸਟਚਰਚ ਅਤੇ ਨੇੜਲੇ ਇਲਾਕਿਆਂ ਵਿੱਚ ਮੌਜੂਦ ਸਾਰੇ ਲੋਕ ਤੁਰੰਤ ਇਲਾਕਾ ਛੱਡ ਦੇਣ, ਕਿਉਂਕਿ ਇੱਥੇ ਉੱਚ-ਖਤਰੇ ਵਾਲਾ ਧਮਾਕੇਖੇਜ਼ ਪਦਾਰਥ ਮਿਲਿਆ ਹੈ।”
ਇਸ ਘਟਨਾ ਕਾਰਨ ਕੁਝ ਕਾਰੋਬਾਰਾਂ ਨੂੰ ਵੀ ਖਾਲੀ ਕਰਵਾਇਆ ਗਿਆ, ਜਿਨ੍ਹਾਂ ਵਿੱਚ Orion ਕੰਪਨੀ ਅਤੇ ਇੱਕ ਡਾਂਸ ਸਟੂਡੀਓ ਵੀ ਸ਼ਾਮਿਲ ਸੀ। ਸਿਲਹੂਐਟ ਸਟੂਡੀਓਜ਼ ਦੀ ਕੇਟ ਲਿਮੁਲੋਆ ਨੇ ਮੀਡੀਆ ਨੂੰ ਦੱਸਿਆ ਕਿ ਉਹ ਲਗਭਗ 3 ਵਜੇ ਸਟੂਡੀਓ ਛੱਡ ਕੇ ਚਲੀ ਗਈ ਸੀ। ਉਸਨੇ ਕਿਹਾ ਕਿ ਉਸਦੇ 15 ਡਾਂਸ ਵਿਦਿਆਰਥੀਆਂ ਵਿੱਚੋਂ ਕਿਸੇ ਨੂੰ ਵੀ ਐਮਰਜੈਂਸੀ ਅਲਰਟ ਪ੍ਰਾਪਤ ਨਹੀਂ ਹੋਇਆ।
ਨੇੜਲੇ ਇੱਕ ਜਿਮ ਨੇ ਵੀ ਦੱਸਿਆ ਕਿ ਉਨ੍ਹਾਂ ਦੇ ਸਿਰਫ਼ ਇੱਕ ਗ੍ਰਾਹਕ ਨੂੰ ਹੀ ਇਹ ਐਮਰਜੈਂਸੀ ਅਲਰਟ ਮਿਲਿਆ ਸੀ। ਕ੍ਰਾਈਸਟਚਰਚ ਏਅਰਪੋਰਟ ਨੇ ਪੁਸ਼ਟੀ ਕੀਤੀ ਹੈ ਕਿ ਇਸ ਘਟਨਾ ਨਾਲ ਹਵਾਈ ਅੱਡੇ ਦੀ ਕਾਰਵਾਈ ‘ਤੇ ਕੋਈ ਅਸਰ ਨਹੀਂ ਪਿਆ। ਪੁਲਿਸ ਨੇ ਕਿਹਾ ਹੈ ਕਿ ਸ਼ੱਕੀ ਪਦਾਰਥ ਨੂੰ ਸੁਰੱਖਿਅਤ ਤਰੀਕੇ ਨਾਲ ਨਸ਼ਟ ਕਰ ਦਿੱਤਾ ਗਿਆ ਹੈ ਅਤੇ ਹੁਣ ਮਾਮਲੇ ਵਿੱਚ ਰੁਟੀਨ ਜਾਂਚ ਜਾਰੀ ਹੈ।